Әкият  укыганда  без барыбыз да  андагы  геройлар  белән  сихри дөньяда,  кеше  эз дә  басмаган  сукмакларда  йөрибез,  аккошлар белән  кардан  салынган  сарайларга  очабыз, Гөлчәчәкне  коткарабыз.Әкиятләрдәге образларны, вакыйгаларны күз алдына китереп балалар үзләрен шул вакыйгалар эчендә итеп хис итәләр, хыялланалар, фикер йөртергә өйрәнәләр. Бүген исә без барыбызда башлангыч сыйныф укучылары һәм укытучылары  бергәләп сәхнәләштергән татар халкының “Өч кыз” әкияте геройлары өчен борчылдык та, куандык та.  Һәрбер “артист”  образга чын-чынлап  кереп безне әкият дөньясына чакырды.

Әниләрне беркайчан да рәнҗетмәгез. Ана хакы бик олы. Әниләрегезнең кадерен белегез, аларны саклагыз! Әкият бу мәңгелек фәлсәфәне тагын бер кат күңелләребездә ныгытты.

Бөтен  районыбыз кебек безнең мәктәпнең барлык укучылары да бүген чаңгыга басты. Инде традициягә әйләнгән бу спорт бәйрәме берничә этапта оештырылды: 1-3 нче сыйныфлар, 4-6 сыйныфлар, 7-9 нчы сыйныфлар һәм өлкәннәр. Узыштан соң  пешекчеләребез барыбызны да кайнар чәй һәм бәрәңге белән сыйладылар. Барлык җиңүчеләр дә Грамоталар белән бүләкләнде, ә 1 нче урынны алучыларга бүләкләр дә бирелде. Ярышта иң актив катнашкан сыйныфлар да Грамотага лаек булды. Бу - 3 нче, 5 нче  һәм 9 нчы сыйныфлар.  Бүләкләрне Кошман авылы җирлеге башлыгы Сафина Лилия хәзерләгән иде.  Спорт бәйрәменнән барыбыз  да күтәренке күңел белән таралаштык.

“Татарстан чаңгы юллары - 2014” нәтиҗәләре:

 Бүген  ягъни 8 нче февральдә Яшел Үзән шәһәрендә узган волейбол буенча узган ярышларда Кайбыч районы командасы 2 нче урынны алды. Бу ярышларда безнең мәктәпнең директоры Хәмидуллин И. И. һәм физкультура укытучысы Насретдинов А.Л. та катнашты.

 Бүген 1 нче сыйныф укучыларын, әти-әниләре белән бергә  кабатланмас балачак иленең иң шәп бәйрәмнәренең берсе Әлифба бәйрәменә укытучылары Сайранова Р.Р. җыйды. Җир йөзендә кем генә булмасын, кайда гына хезмәт итмәсен, ул зур дулкынлану белән үзенең нәни кулларына тәүге тапкыр Әлифба алганын искә төшерә. Чөнки һәркемнең дә белем дөньясына аяк атлавы Әлифбадан, Азбукадан башланган. Димәк, Әлифба китабы озын гомерле, тирән мәгънәле, бәһасез байлык ул.

        Балаларның барысы да укырга, язарга, матур итеп сөйләргә, хикәяләр төзергә, шигырьләр сөйләргә өйрәнде. Әлифба бәйрәме безнең өчен  зур тантана. Әти- әниләр дә сынатмады, күңелле  сынаулар аша уздылар. 1 урынны Мотыйгуллиннар гаиләсе, 2 урынны Фәизовлар гаиләсе, 3 урынны Гарифуллиннар гаиләсе алды һәм Мактау грамоталары белән бүләкләнделәр. Балалар кулларына, әлифбаны укып бетергәнлеккә таныклык алдылар. Беренче зур җиңүегез белән Сезне, кадерле укучылар, хөрмәтле әти-әниләр!

 Башлангыч сыйныфлар укытучысы Хәмидуллина М.С. үткәргән чара 22 нче кышкы олимпия уеннарын ачуга багышланган иде.  Олимпиада — 4 ел саен уздырыла торган дөньядагы иң зур спорт ярышлары. Хәзерге вакытта Олимпия уеннары җәйге һәм кышкы уеннардан тора. Алар ике ел саен чиратлашып уздырылалар. Олимпия уеннарында меңләрчә атлет ярыша. Олимпия чемпионы булу спортчылар өчен иң югары дәрәҗәләрнең берсе. Иртәгә ачылачак олимпиада турында укучыларыбыз нәрсә белә? Ә нәрсәне әле белеп җиткермиләр?  Монда барысы да ачыкланды. Олимпиададан соң параолимпиада турында искә төшереп үтте укытучы. Сочидагы олимпиадада катнашучы спортсменнарыбызга уңышлар, җиңүләр теләп таралыштык бу чарадан.

Безгә, бер төркем Кошман мәктәбе укучыларына  Галия Кайбицкая исемен йөрткән музейда булу  бәхете елмайды. Анда без сыйныф җитәкчебез Айгөл апа белән бардык. Музей директоры Энҗе Рамил кызы Мингалиева һәм Эльмира Равил кызы Сафина  безне районыбыз тарихы, аның кешеләре турында сәяхәткә алып кереп китте. Сәяхәтнең башы Кайбыч төбәгенә багышланган этнографик залдан гыйбарәт. Бу залда Кайбыч районы кешеләренең көнкүреше турында белешмәләр, эш кораллары, киемнәр  җыелган. Икенче тукталышыбыз Галия Кайбицкая иҗаты, яшәеше турындагы зал булды. Опера йолдызының үзенә күчкәнче аның ата-анасы,туган җиренә багышланган фотолар, мәгълүматлар белән таныштык. Галия Төхвәтуллина бик ишле гаиләдә туа: алар барысы 15 бала! Әмма унбиш баланың нибары 7се исән-имин кала. Аталары Мотыйгулла Төхвәтуллин балаларының сәнгатькә хезмәт итүче, музыкаль белемле итеп күрәсе килә. Һәм теләкләре кабул була. Опера сәхнәсендә яңа йолдыз -Галия Кайбицкая  кабына! Аның иҗаты турында музейда гаять күп күләмдә мәгълүмат тупланган. Галиянең кайда укуы, кемнәр белән дуслашуы, нинди операларда җырлавы турындагы белешмәләр музейда байтак җыелган.

Сәяхәтебезнең өченче ноктасы Музыкаль зал булды. Бу залда Галия Кайбицкаяның моңлы тавышын ишеттек. Анда без Галия Кайбицкаяның өлкән абыйсы Камиль Төхвәтуллин турында  да  белешмә алдык. Аның да мәшһүр сәнгать кешесе булуына тагын бер кат инандык. Мәгълүматлар туплагач Эльмира Равилевна безнең игътибарлылыкны тикшерү өчен викторина тәкъдим итте. Сынатмадык бугай!

8 нче сыйныф укучысы Чулпан Гарифуллина

Профориентация эше башлангыч сыйныфларда ук башланырга тиеш. Шуңа да инде башлангыч сыйныфлар атналыгындагы бүгенге көн һөнәрләргә багышлаган иде. Укытучы Садриева Э.Р. хәзерләгән бу чарада укучылар һөнәрләр турында бик мәгълүмат алдылар. Чарада “Төзүчеләр” һәм “Шофёрлар” командалары катнашты. Башта укучылар әти-әниләренең һөнәрләре турыда шигырьләр сөйләделәр. Ә аннары соң кызу ярыш башланды: “Нәрсә артык?”, “Кем кайсы һөнәр иясе”  “Табиб һөнәре юнәлешләре”  , “Кайсы һөнәр ияләренә бу эш кораллары кирәк? “ һ.б.  Балалар берсен-берсе уздырып һөнәрләр турында белгәннәрен сөйләделәр. Киләчәктә укучыларыбыз тырыш, эш сөючән, уңган һәм булган балалар булып үсәрләр, кешеләргә һәм илебезгә файда китерә торган эшләр генә башкарырлар дип өметләнеп калабыз.

Укытучыларының 3 февральдә Олы Кайбыч мәктәбендә узган кышкы  спартакидасының  район финалында мәктәп директоры Хәмидуллин И.И. канат тарту һәм дартс төрләрендә 3 нче урынны , ә физкультура укытучысы Насретдинов А.Л. турникта тартылу буенча  2 нче урынны яулды. Укытучыларыбызны бу җиңүләре белән чын күңелдән котлыйбыз!  Аларга Яшел Үзән шәһәрендәволейбол буенча узачак  зона ярышларында уңышлар телибез. 

Күңелле тәнәфесләребез дәвам итә. Бүген башлангыч сыйныфлары атналыгы  Саттарова Гүзәл Фәритовна үткәргән “Күңелле стартлар” белән башланып китте.  “Бөркетләр” һәм “Пантералар” командалары җитезлеккә, тизлеккә көч сынашты. Ике команда да җиңүгә ирешү өчен бөтен көчен куйды, җанатарлар да кимен куймады.  Шулай да “Бөркетләр”  көчлерәк булып чыкты.

 Башлангыч сыйныфлар атналыгында алдагы көннәрдә түбәндәге чаралар үтәчәк:

4 февраль-  “Милли уеннар”

5 февраль - “Һөнәрле үлмәс, һөнәрсез көн күрмәс”(уен-викторина)

6 февраль- “Өч кыз” әкиятен сәхнәләштерү

7 февраль- “Белем иленә сәяхәт”(дәрес-викторина)

8 февраль- Йомгаклау. “Безнең уңышларыбыз”

Кайтыйк әле, онытмыйк без дуслар

Канат ярган туган ояны.

Кыңгыраулар чыңы дәшсен кабат,

Мәктәпкә дип килдек без тагын.

Безнең мәктәптә бәйрәм - очрашу кичәсе. Мәктәпне, укытучыларын яраткан, онытмаган укучыларыбыз 1 февраль көнне  безгә кунакка килделәр. Югары сыйныф укучылары өчен төрле һөнәр ияләре белән очрашу, фикер алышу бик мөһим. Очрашуның максаты  да   югары класста укучы балаларга азмы-күпме киләчәкләрен күзалларга ярдәм итү, һөнәр сайлаганда  югалып калмас өчен киңәшләр алу, шулай ук теге яки бу уку йорты, аңа керү шартлары турында мәгълүмат ишетү бит. Студентларыбыз белән без әнә шул турыда әңгәмә кордык.

 Килгән кунакларыбыз арасында   мәктәбебезне 10 ел элек һәм аннан соң тәмамлаган, бүгенге көндә үзләре сайлаган һөнәрләренең чын осталары булып өлгергән һөнәр ияләре һәм төрле уку йортларында белем алучы студентларыбыз бар иде. 10 ел элек бетергән укучыларыбызны махсус чакырган идек.  Гыйсмәтуллина(Фатыйхова) Сиринә, Насретдинова Резедә, Сафина(Җәләлиева) Эльмираларның  чыгышлары туган мәктәпләрен, укыткан укытучыларын, балачакны сагыну сүзләре белән сугарылган иде, шуңа күрә  беребезне дә битараф калдырмады. Студентларга да, укучыларга да мәктәптә һәм башка уку йортларында укыганда кирәкле матур  киңәшләрен дә кызганмадылар юбилярларыбыз. Аларның хәзерге вакыттагы  тормышлары, уңышлары белән горурландык та, шатландык та.  Аларны күрергә дип беренче укытучылары, хәзерге вакытта Олы Кайбыч мәктәбендә башлангыч сыйныфлар укытучысы, Гиниятуллина Гөлинә Әмир кызы һәм пенсионер укытучы Абзалов Фәрит Әбзәл улының да килүе бу укучылар өчен дә, коллектив өчен дә икеләтә куанычлы булды.  Очрашу ике өлештән торды. 1 нче өлеш “Бер очрашу - үзе бер гомер” дип аталды.  Бу өлештәге сөйләшү бик эчкерсез, дустанә барды, кызыклы моментларга бай булды.

"Акыл - тезген, белем - ат, тезгенеңне белеп тарт"дип аталган 2 нче өлештә исә “Студентлар” һәм “Профессионаллар” командалары арасында мавыктыргыч уен-ярыш булды. Бик җанлы үткән бу ярышта “Студентлар” командасы җиңеп чыкты.