Бүген күп кенә хуҗабикәләр кыяр, помидор тозлау, салат ясау белән мәшгуль. Мәктәп ашханәсе дә кышка хәзерләнә.Пешекчеләребез, укучылар һәм укытучылар бик яратып ашый торган, тәмле итеп кыяр һәм помидорларны маринадлыйлар. 

4 августта район комиссиясе мәктәпләрдә булды. Комиссия мәктәбебездә бу уку елында бик күп эшләр башкарылганын билгеләп үтте. Чәчәклегебез дә комиссия членнарына бик ошады.  

“Яшәр өчен кояш, ирек һәм кечкенә чәчәк кирәк, - дигән бөек әкиятче Ганс Андерсен. Әйе, борын-борыннан ук чәчәкләр тормышыбызның аерылмас юлдашы.  Чәчәкләр дә тормышка ямь бирәләр, матурлык һәм шатлык чыганагы булып торалар. Чәчәкләр тормышка матурлык биреп кенә калмыйлар, кешеләр арасында эчкерсез дуслык билгесе булып та хезмәт итәләр. Алар илһам чыганагы да.Чәчәкләргә сокланып,шагыйрьләр шигырьләр иҗат итәләр, композиторлар җырлар язалар.

Июль-август айларында мәктәбебез төрледән-төрле чәчәкләргә, гөлләргә күмелде. Бу матурлык-укытучыларыбыз һәм укучыларыбызның тырыш хезмәте нәтиҗәсе.

Бүген бакчада график буенча эшләүче укучыларыбыз бәрәңге чүбе утадылар.

Бу көннәрдә мәктәбебез үзгәрешләр кичерә. Бүген тәрәзәләргә жалюзилар куелды. Жалюзилар алу өчен акчаны “Мәктәбеңә ярдәм ит” акциясенә кушылган ата-аналар һәм укытучылар  бирде.

Алтын куллы кызыбыз

Мәктәбебезне 2013 нче елда тәмамлаган укучыбыз Хәйретдинова Ләйсән ашханәне бизәде. Пешекчеләребез пешергән тәмле ашларны ашарга ашханәгә бик теләп керәбез. Ләйсән бизәгән ашханәдә ашавы тагын да уңайлырак булыр, чыгасы да килмәс мөгаен.  

Ләйсән шулай ук теремкәйдәге хайваннарның сыннарын ясады, яңа куелган су багын бизәде. Бик зур рәхмәт сиңа, Ләйсән. Үз игелегең үзеңә әйләнеп кайтсын! Барыбыз да сиңа саулык-сәламәтлек, бәхет, зур уңышлар телибез.

Башлангыч сыйныфлар чәчәклеге көннән-көн матурлана.  Бүген бу чәчәклеккә бик матур кечкенә өй куйдылар. Өй куйгач чәчәклек тагын да ямьләнеп китте. Укытучылар, укучылар  аны теремкәй дип атады. Бу өйне мәктәпкә Ахунҗанов  Фирдүс Таһир улы бүләк итте.  

Бу көннәрдә укытучылар, техник хезмәткәрләр, балалар бакчасында эшләүчеләр,  тәрәзәләрнең тышкы ягын буядылар, нигезләрне, алмагачларны  агарттылар, гөлҗимешне кистеләр һ.б. шундый эшләр белән шөгыльләнделәр . Укучылар белән бергәләп территорияне җыештырдылар.

Апас  районында урнашкан “Свияга” балаларны сәламәтләндерү лагеренда укучыларыбыз теләп ял итәләр.  1 нче сменада Хәйртдинов Илмас , 2 нче сменада   Садриев Салават һәм  Шәрәфиев Айрат , хәрби-патриотик сменада  Әхмәтшин Илнур, Насретдинов Динар, Фәйзуллин Шәфкать һәм Нәфкать ял итеп кайткан булсалар,13 июльдән башланган сменада исә 4 укучыбыз ял итә һәм сәламәтлекләрен ныгыта. Алар- апалы-сеңелле кызларыбыз Гыйрфанова Әдилә һәм Ләйлә, Сабирова Илсия һәм Гөлияләр. Файдалы һәм күңелле яллар, кызлар!

 Үскәндә яфрагын ашыйлар, үсеп җиткәч, тамырын ашыйлар. Ул нәрсә? Әлбәттә суган.

17 июльдә мәктәпнең укыту-тәҗрибә кишәрлегендә үскән суганны  җыеп алдык. Суган уңышы куандырырлык булды. Кыш буена  җитәрлек запас тупланды.