9 нчы гыйнвар, 2014 нче ел. Лагерьның соңгы көне. Әле кайчан гына 20 бала белән “Кояшкай” лагеры үз эшен  башлап җибәргән иде. Инде 7 көн шаулап-гөрләп узып та киткән.Бу көн аралыкларында балалар рәхәтләнеп ял иттеләр, экскурсияләргә бардылар, белемнәрен ныгыттылар, яңа ел маҗараларын күрделәр, чыршы тирәсендә әйлән-бәйлән уйнадылар... Кыскасы бик күңелле булды.

        Ә бүген исә, алар, лагерьны ябу тантанасында, үз көчләре белән әзерләгән җырлы-биюле концерт күрсәттеләр, алар өчен бар көчләрен куйган тәрбияче апаларына, пешекчеләргә һәм мәктәп хезмәткәрләренә рәхмәтләрен  җиткерделәр.

Бүгеннән мәктәбебездә кышкы лагерь эшли башлады.  Тәрбиячеләр белән бергәлектә  лагерьны ачу тантанасы бик күңелле узды. Балалар чыршы әйләнәсендә концерт куйдылар, рәхәтләнеп ял иттеләр, саф һавада хәрәкәтле уеннар уйнадылар. Балаларның йөзләрендә елмаю, күтәренке кәеф рухы чагылды. 

Бүген  мәктәбебездә кышкы каникуллар башланды.Балалар 28 нче декабрьдән 12 нче январьга кадәр ял итәчәкләр. Бу чорда мәктәптә алар өчен төрле түгәрәкләр,кышкы лагерь эшләячәк.Каникуллар күңелле үтсен!

Бүген мәктәбебездә  башлангыч һәм уртанчы сыйныф укучыларының Яңа ел бәйрәмнәре булып узды. Һәр укучы матур-матур киемнәрдән,күңелләре шат. Әлбәттә, нинди Яңа ел Кыш бабайсыз!? Ә Кыш бабай булган җирдә төрле тылсымнар һәм маҗаралар була. Барысы да җырлап- биеп, күңел ачып Кыш бабайның бүләкләрен алып,җылы хисләр белән,киләсе Яңа елга зур өметләр баглап өйләренә таралышты.Бәйрәм бик кызык һәм күңелле узды!

Яңа ел белән тәбрик итәбез!

Бәйрәмнәрдә – бәхет тантанасы,

Җан сафлыгы, күңел яктысы.

Гомер буе озатып бара безне

Бәйрәмнәрнең керсез ак төсе.

Җир өстенә аклык-пакълек алып килгән Яңа ел бәйрәме котлы булсын!

Киләсе елның 365 көне дә бәхет-шатлык кына китерсен. Аткан таңнарның барысы да алсу булсын. Тормыш юлларында шатлыклы очрашулар, бәхетле елмаюлар, куанычлы мизгелләр күп булсын!

Экология  һәм  тирә-юнь  мөхитне  саклау елы  кысаларында  мәктәптә  төрле чаралар узды. 20 нче декабрь көнне  1-9 нчы сыйныфларда сыйныф  сәгатьләре  үткәрелде. География укытучысы  Насретдинов  И.Р. “Туган авылымның елга,  күлләре” дигән темага  дәрес-викторина үткәрде.

17 нче декабрь  көнне  район күләмендә “ Туган телем – серле тел” конкурсы  узды. Бу конкурста безнең  мәктәптән   “Көмеш  каләм”  түгәрәгенә йөрүчеләр Гарифуллина  Чулпан, Гирфанова  Ләйлә  катнаштылар. Чулпан 3 нче урынга лаек булып, диплом  белән  бүләкләнде. Ләйлә актив катнашучы буларак   сертификат  алды.

Укучыларыбыз  һәм  укытучыларыбыз  Яңа елга  хәзерләнә  башладылар. Бәйрәм  программалары төзелде.Балалар Яңа ел турында җырлар, шигырьләр, биюләр өйрәнәләр, классларны бизиләр. Мәктәп  алдында  һәр класс  үзенә  бүлеп  бирелгән  урында  кардан  төрле  сыннар  ясарга  керештеләр. Туңмыйча, авырмыйча  Яңа еллар күңелле үтсен!

Алдан билгеле булганча, 4 нче сыйныф укучылары 10, 13, 16 һәм 18 декабрьдә математика, рус теле, татар теле һәм әйләнә тирә фәннәреннән мониторинг тикшерү үтәчәкләр. Бу чара Татарстан Республикасы мәгариф үсеше стратегиясен реализацияләү мероприятияләре кысасында үткәрелә. Тикшерү вакытында узган тест нәтиҗәләренә билге куелмый. Балаларга уңышлар телик.