"Халкым белән бергә яшә, Тукай! Яшә Шигырь, яшә Туган тел!" девизы астында  Республикабыз Казан шәһәрендә узган  "Туган тел бәйрәме"ндә безнең колллектив вәкилләре культура йорты белән берлектә чыгыш ясадылар. "Өммегөлсем" фольклор ансамбленә йөрүчеләр "Туган тел" бәйрәмендә "Чишмә буенда" күренеше белән чыгыш ясадылар.  Тамашачылар чыгышны алкышларга күмгән. Коллектив бәйрәмнән югары күтәренке рух белән кайтты.

       Табигатьне саклап тотуның икеайлыгы дәвам итә. Мәктәп территориясендә чистарту эшләре акрын гына бара. Чонки эле кар эреп кенә бетте, көн саен яңгыр ява, чистарту эшләрен алып барырга комачаулый.  Бер төркем ир укытучылар бүген теплица ясау эшен дәвам иттеләр. Помидор, кыярларны җәйге кыраулардан, көзге салкыннардан саклау өчен менә дигән урын булачак бу. Укучы балалар, хатын- кыз укытучылар эре чүпләрне җыйнап алдылар. Җир кибеп беткәч, авыл территориясен дә җыештырырбыз.

    Мәктәптә Г.Тукай иҗатын өйрәнү буенча эш бара. 5 класс укучылары  өчен бүген авыл китапханәсендә "Бөек Тукай" дип аталган кичә оештырылды. Китапханәче В.Мустафина укучыларны Г.Тукайның әкият дөньясына, шигъри иҗатына алып китте. Тукай тормышы һәм иҗаты буенча викторина, кроссворд, сорауларга җаваплар тәкъдим итте. Кичә Г.Тукайның  "Туган тел" җырын башкару белән тәмамланды.

 Тукай иҗатын сөючеләр өчен бүген районда "Тукай конкурсы" дип аталган шигырь уку буенча бәйге булып узды. Бу бәйгедә мәктәбебезнең Г.Тукай иҗатын сөюче 4 укучы катнашты.  Башлангыч класс укучылары Алсу Касыймова, Фирдинә Галәветдинова, 6 класс укучысы Рәсүл Галиев һәм 5 класс укучысы Айрат Ханафиев  уңышлы гына чыгыш ясадылар. Алар "Пар ат", "Таз", "Туган авылым" шигырьләрен яттан сөйләделәр.

   Бүген мәктәптә "Су көне" билгеләп үтелде. География һәм биология-химия укытучылары Р.Г.Камалиев һәм Н.И.Мухаметзянова эчтәлекле лекция әзерләгәннәр иде. Лекция барышында су турында кинофильм карау, су белән төрле тәҗрибәләр эшләнде. Кичә файдалы, кызыклы материалларга бай иде.

   4 класс укучыларының белем дәрәҗәләрен тикшерү буенча мониторинг уза. Бүген рус теленнән йомгаклау эше башкардылар. Эш барышын  район билгеләгән вәкил Н.Р.Нигматуллина  күзәтте.

    Бөек Җиңүнең 70 еллыгына багышланган чаралар дәвам итә. Бүген  өстәмә белем педагогы Ф.Х.Кашшапов үзе җитәкләгән түгәрәк әгъзалары белән "Безгә сугыш кирәкми" дип аталган әдәби-музыкаль композиция оештырды.  Ул бу чарада сугышның бар куркынычын, тылдагы хатын-кызларның, балаларның хезмәтен ачып бирүгә иреште. Чарада хатлар, хатын кызлар язган бәетләр уку, сугыш чоры балаларының истәлекләрен хәтергә төшерү - барысы да укучыларның күңелендә тирән тәэсир калдырды. Безгә сугыш кирәкми!

"Язгы изгелек атнасы" кысаларында 6 класс укучылары авылыбызның уртасында Бөек Ватан сугышында һәлак булган авылдашларыбыз истәлегенә куелган һәйкәлне чистарттылар. Һәйкәл янында эш бик күп. Тирә-якта юеш булганлыктан, чистарту эшләрен даими башкарырга кирәк. Авылдашларның исемнәре уңган. Аларны яңарту өстендә дә эш оештыру кирәк. Бу турыда тиешле урынга хәбәр ителде.

    21 апрель көнне Яңа Кенәр укучылар сараенда Ә.Шәяхмәтов призына рус шашкасы буенча ярышлар булып узды. Бу ярышларда мәктәбебез командасы 2 нче призлы урын яулады. 2 класс укучысы Фәттеров Фәнгиз үз яшьтәшләре арасында 1 нче урынга, бертуганнар Галаветдинов Рәмис һәм Галаветдинова Ралинәләр 3 нче урынга лаек булдылыр. Зур уңышлар телибез сезгә!