Гимназиябезнең 8А сыйныф укучылары, Бөек Җиңүнең 79 еллыгын каршылап, Бөек Ватан сугышы турында язылган китаплар белән таныштылар һәм "Солдатка хат" бөтенроссия акциясенә кушылып, өчпочмаклы хатлар яздылар.

КОТЛЫЙБЫЗ!
Гимназиябезнең 9 сыйныф укучысы Шакирова Лиана Алтай републикасында узган туган телләр буенча Регионара Себер һәм Көнчыгыш илләре олимпиадасында "Туган телне популярлаштыруы өчен" номинациясе җиңүчесе булды.
Укытучысы Чулпан Рәмзил кызы Шәрипова.

Гимназиябезнең 5, 6 сыйныф укучылары бүген инглиз теленнән телдән имтихан тапшырды.
Инглиз теле укытучылары Сания Мөдәрис кызы Гыймранова, Румия Данис кызы Темел, Рузилә Айдар кызы Мусина имтихан вакытында укучылар белән әңгәмә корды. Укучылар сөйләшү осталыгы, авазларның әйтелеше, җөмләләрнең дөрес төзелеше буенча сынау узды.

Гимназиябезнең кыйбласын, җанын һәм рухын чагылдырган “Гимназия – гомер бишегем” концертыннан соң, әле һаман җылы теләкләр, ихлас рәхмәт сүзләре, эчкерсез сокланулар кабул итәбез. Үзебез дә әле сихри мәдәни дөньяда яшәвебезне дәвам итәбез. Татар рухын, милли аһәңен чагылдырган концертыбызны яраткан тамашачыбыз, милләттәшләребез әле кабаттан сорар. Һич шигебез юк. Тансык булды, җитми калды!
Тарихны без бергәләп язабыз, саклап, килер буынга тапшырабыз. Концертыбыз һөнәри югарылыкта фото һәм видеотасмага да язып алынды. Алары белән дә уртаклашырбыз!
Татарның гореф-гадәтләрен, йолаларын барлап, балаларга өйрәтү, асылын аңлап, яңа милли төсмерләр белән баету гимназиябезнең терәге булган әти-әниләр, дәү әти-дәү әниләр белән бергә башкарыла. Концерттан соң да иң беренче бәяне алар бирде, иңнәребезгә канатларны алар куйды.
Гимназиям! Син бит гомер бишегем! Татар җанының бишеге!

ӘДӘБИ ДӨНЬЯ: Татар халкының бөек шагыйре Габдулла Тукайның 138 еллыгы уңаеннан узган дәресләрдә 5Б сыйныфы язучының иҗаты буенча уен-викторина, 7А, 8Б сыйныфлары, китапханәче Эльвира Мәүлетдин кызы Исламова белән,
презентация эшләде.

Актаныш районының 103 нче янгын сүндерү-коткару бүлеге җитәкчесе, лейтенант Илдар Мортазин гимназиябезнең 10-11 сыйныф укучылары белән очрашты. Илдар Минсалих улы укучыларны коткаручы һөнәре, янгын сүндерү-коткару бүлеге хезмәте белән таныштырды. Әлеге һөнәрне сайлаган очракта, уку йортларына укырга керү тәртибе, куелган таләпләрне аңлатты.

Гимназиябез укучыларына "Тоталь диктант - 2024" текстын рус теле һәм әдәбияты укытучысы Ирина Альбин кызы Нуриева укыды.
Диктант тексты көндәлекләргә багышланды.
«Тотальный диктант» Филология советы рәисе Владимир Пахомов билгеләп үткәнчә, диктант текстыннан катнашучылар көндәлекнең жанр буларак тарихы, кызыклы тарихи шәхесләр, шулай ук атаклы көндәлек авторлары турында белде.

Диктант авторы - язучы, журналист һәм мөхәррир Анна Матвеева. Анна Матвеева - язучы, журналист һәм мөхәррир, 1972 елда Свердловскида (хәзерге Екатеринбургта) А.М. Горький исемендәге Урал дәүләт университеты укытучылары гаиләсендә туган.

КОТЛЫЙБЫЗ!
Бөтендөнья татар конгрессы, "Татарлар" газетасы белән берлектә, 1 февральдән 18 февральгә кадәр "Солдат альбомы" бәйгесен үткәрде. Быел ул "Безнең якташ героебыз" номинациясе буенча уздырылды. Катнашучылар махсус хәрби операциядә катнашучы якташы турында инша язарга тиеш иделәр.
Әлеге бәйгедә гимназиянең 9 класс укучысы Лиана Шакирова да катнашты һәм җиңүче исеменә лаек булды. 12 апрель көнне Казан шәһәре Бөтендөнья татар конгрессы бинасында "Солдат альбомы-2024" конкурсында җиңүчеләрне бүләкләү тантанасында Лиана диплом һәм истәлек бүләкләре белән бүләкләнде.

Гимназиябезнең башлангыч сыйныф укучылары Юл хәрәкәте иминлеген пропагандалау бүлеге җитәкчесе Ләйсән Рәдиф кызы Мөхәммәтова белән очрашты.
Юл хәрәкәте куркынычсызлыгы темасына багышланган «Домовенок озорник» спектаклен карап, үзләре дә тамашада катнаштылар, юл иминлеге кагыйдәләрен искә төшерделәр.

Гимназиябезнең 8 сыйныф укучылары география һәм тарих фәннәреннән Бөтенроссия тикшерү эшләрен башкара бүген.
Уңышлар телибез!