ТЕАТР АЙЛЫГЫ: Гимназиябезнең 2Б класс укучылары
"Өч кыз" татар халык әкиятен әти-әниләр, сыйныф җитәкчесе Гөлназ Дильшат кызы Солтанова белән берлектә яңача форматта сәхнәгә куйды. Әкият күмәк җыр-биюләр, татар халык уеннары белән тулыландырылып эшкәртелгән.
Рольләрдә:
Әни - Могътазирова Айгөл,
1 нче кыз - Загертдинова Мәрьям,
2 нче кыз - Габделхәева Зәлинә,
3 нче кыз- Фәрхиева Ләйлә,
Тиен - Локманов Нуриман.
Зур кызлар: 1 нче кыз- Загертдинова Венера,
2 нче кыз - Локманова Айзирәк,
3 нче кыз һәм кияү - Ландыш һәм Фәндәлис Кирамовлар.
Дәү әни һәм автор: Солтанова Гөлназ.
Уеннарда, җырларда - 2Б класс кызлары, малайлары.
Афәрин, укучылар! Булдырдыгыз!

МАТЕМАТИКА АТНАЛЫГЫ: Бүген - 11 март көнне 6-7 класслар арасында "Быстрый счетовод" конкурсы узды. Укучылар 10 минут эчендә иң күп мисаллар чишүдә ярыштылар.
Җиңүчеләр дүшәмбе линейкасында бүләкләнәчәкләр.

"Алдынгылар хәрәкәте"нең район активистлары узган елга йомгак ясап, агымдагы елга планнар билгеләде.
"Яшьлек" үзәгендә узган киңәшмәдә гимназиябезнең тәрбия эшчәнлеге уңай яктан билгеләнде, республика алдынгыларына үрнәк буларак тәкъдим ителде.

ТУГАН ТЕЛЛӘР АЙЛЫГЫ:Гимназиябездә ай дәвамында татар мохитендә яшәдек. Татарның күренекле шәхесләре белән очраштык. Шагыйрь Мөхәммәт Мирза(Илфак Ибраһимов), “Мәдәни җомга” газетасы журналисты Сөембикә Кашапова белән очрашу да якты хатирәләр калдырды. Илфак ага, “Шагыйрь дәрес бирә” проекты кысаларында, гимназиябезнең яшь иҗатчылары белән очрашып, алар язган шигырьләргә бәяләмә бирде.
Сөембикә ханым гимназиябез укучыларының шәхси проектлары белән танышты. Татарның милли-гореф гадәтләрен саклап, проект эшләрен заманча рухта яшьләргә тәкъдим итүче укучылар белән аралашты. Республиканың мәдәни яңалыклары, Казанда эшләп килүче күргәзмәләр белән укучыларны таныштырды.

РАЙОН БАШЛЫГЫ ЛЕНАР ЗАРИПОВ ГИМНАЗИЯБЕЗДӘ УЗУЧЫ ПАРЛАМЕНТ ДӘРЕСЕНДӘ КАТНАШТЫ
Гимназиябездә 8, 10 сыйныф укучылары катнашында узучы Парламент дәресендә бүген Актаныш район башлыгы Ленар Рафак улы Зарипов катнашып чыгыш ясады.
Парламент дәресе - Татарстан Республикасы Дәүләт Советы, Мәгариф һәм фән министрлыгы һәм мәгарифне үстерү институтының уртак проекты - 2009 елдан бирле уңышлы тормышка ашырыла. Быел ул уналтынчы тапкыр үтте.
Дәресне тарих һәм җәмгыять белеме укытучысы Миләүшә Мәгъсүм кызы Абдуллина үткәрде. Дәрес “Киләчәкне сайлыйбыз!” темасына багышланды. Россия Конституциясе, 17 мартта Россия Президентын сайлау, тәкъдим ителгән кандидатлар, илнең сәясәте, бүгенге вәзгыять хакында укучылар түгәрәк өстәл артында фикер алыштылар. Гимназиябез директоры Венера Хәмәтнәсыйх кызы Хәева, Ленар Рафак улы Зарипов “Лидерлык дәресләре” кысаларында укучылар алдында чыгыш ясадылар.

КОТЛЫЙБЫЗ!
Физик культура фәненнән Бөтенроссия олимпиадасының төбәк этабында гимназиябезнең 9 сыйныф укучылары Амерзьянов Роман, Хөсәенов Ирхан, Солтанов Әмир, 10 сыйныф укучысы Шагалиева Зилия призер булдылар! Укытучылары Харрасова Алсу Рәскат кызы, Исламов Ильмир Рузил улы.

ИНГЛИЗ ТЕЛЕ АТНАЛЫГЫ: Гимназиябезнең 5А сыйныфы укучылары белән инглиз теле укытучысы Сания Мөдәрис кызы Гыймранова
“Mind sports” викторинасы үткәрде.

Әлифбаны өйрәнеп, тәүге китапларын укуны тәмамлау хөрмәтенә, 1В классында "Әлифба бәйрәме" узды. Кунак булып Әлифба, Әдәби уку, Татар теле, Шүрәле татар теле китаплары кунакка килде.
Бәйрәмдә катнашучы әти-әниләр белән Туган тел җырын да җырлады укучылар.
Әти-әниләр дә үзләренең изге теләкләрен җиткерделәр. Бәйрәмдә балалар инглиз телендә дә үзләренең hөнәрләрен күрсәттеләр.

ХӘРБИ-ПАТРИОТИК АЙЛЫК:15 февраль – Әфганчылар көне!

Гимназиябез укучылары район мәдәният йортында узган район чарасында катнашып, әфган сугышында катнашкан сугышчы-интернационалистлар белән очрашты.

“Әйләнә-тирә дөнья” дәресендә гимназиябезнең 2А һәм 2Б сыйныф укучылары «Автомобильдән саклан!» темасын өйрәнә. Ания Хәсип кызы Мусина һәм Гөлназ Дильшат кызы Солтанова бүгенге дәрескә Юл хәрәкәте иминлегенең Актаныш бүлеге профилактика җитәкчесе Ләйсән Рәдиф кызы Мөхәммәтованы чакырды. Укучылар юл хәрәкәте кагыйдәләрен искә төшерделәр. Юл хәрәкәтендә үзеңне тоту буенча биремнәр үтәделәр, белгеч сорауларына җавап бирделәр.