Укучыларда үз сәламәтлекләренә карата аңлы караш формалаштыру, аларны начар гадәтләргә бирешмәскә өйрәтү максатыннан, урта сыйныфларда “Алкоголь сине ничек үтерә?” дип аталган темага сыйныф сәгатьләре үтте. Укучылар әлеге темага карата үзләренең фикерләрен белдерделәр һәм сәламәтлекне саклау өчен начар гадәтләргә “Юк!” дияргә кирәк дигән уртак фикергә килделәр.

Гимназиядә башлангыч һәм урта сыйныф укучылары арасында “Мин сәламәт яшәү рәвешен сайлыйм” дип аталган темага рәсем бәйгесе үтте. Рәсемнәрдә сәламәтлекне ныгытучы һәм зыян салучы факторлар сурәтләнгән иде. Барлык укучылар да бәйгедә актив катнаштылар.

Гимназиябездә, укучыларга татар милләтенең күренекле шәхесләре турында тирән мәгълүмат бирүче, “Музыкаль тәнәфес” проекты эшләп килә. Бу көннәрдә, җәйге ялдан соң, “Музыкаль тәнәфес” янәдән эфирга чыкты. Традиция буенча, тәнәфес вакытында, укучылар татар милли мәдәнияты үсешенә зур өлеш керткән күренекле шәхесләрнең иҗат юлы белән танышуны дәвам иттеләр. Бу атнада алар Татарстанның халык артисты Рөстәм Маликовның иҗат юлы һәм моңлы җырлары белән таныштылар.

Бүген Казанда август конференциясе узды. Әлеге конференциядә иң мәртәбәле мөгаллимнәрне бүләкләдерләр. Бу чара гимназия өчен аеруча истәлекле булып, аның тарихына уелып калды.

Гимназиябездә бик күп еллар хезмәт куючы, татар әдәбияты дәреслекләре авторы, татар теле һәм әдәбияты укытучысы Чулпан Рәҗәповна, Татарстан Республикасы президенты указы нигезендә, “Татарстанның атказанган укытучысы” исеменә лаек булды.

Хөрмәтле, Чулпан Рәҗәповна! Сезне чын күңелебездән әлеге шатлыклы вакыйга – мактаулы исемегез белән тәбрик итәбез. Сезгә алга таба да иҗади, фәнни уңышлар, гаилә бәхете, матур тормыш телибез. Киләчәктә дә уй-фикерләрегезгә, куйган максат-хыялларыгызга ирешергә насыйп булсын!

Сәламәт яшәү рәвешен пропагандалау максатыннан, укучылар өчен, тәмәке тарту һәм эчкечелек кебек начар гадәтләрне кисәтү чарасы буларак, белешмәлекләр  әзерләнде. Биредә аларның сәламәтлеккә зыяны, бу гадәтләрне булдырмый калу юллары турында мәгълүмат бирелгән.

Бу атнада “Көзге игелек атнасы” акциясе старт алды. Гадәттәгечә, гимназиябездә әлеге акция кысаларында “Игелек дәресләре” үтте. Әлеге дәресләрдә сыйныф җитәкчеләре игелеклелек, мәрхәмәтлелек, әхлак турында сөйләделәр. Укучыларга әлеге темаларны яктырткан презентацияләр күрсәтелде.

Яңа уку елы башлану белән гимназиябездә яңа тормыш башлана. Традицияләрне дәвам итеп, быел да электрон газета, иртәнге зарядка һәм мәктәп радиосы беренче көннән үк үз эшләрен башлап җибәрделәр.

Бүген мәктәп радиосы, яңа уку елында беренче тапкыр, эфирга чыкты. Әлбәттә инде, беренче булып, 11А сыйныф укучылары чыгыш ясадылар. Алар укытучыларны, укучыларны яңа уку елы башлану белән котлап, үткән атна яңалыклары белән таныштырдылар һәм киләсе атнада булачак чаралар турында искәрттеләр. Шулай ук куркынычсызлык кагыйдәләре буенча мәгълүмат бирделәр.

Бүген гимназиябездә Бөтенроссия куркынычсызлык дәресе үтте. Укытучылар һәм укучылар, гимназия хезмәткәрләре төрле ситуацияләрдә үз – үзләрен тоту кагыйдәләрен искә төшерделәр. Алар тиешле барлык таләпләрне дә үтиләр.  Шәхси куркынычсызлык – һәрберебезнең үз кулында икәнен онытмасак иде. Игътибарлы булыйк, бер-беребезне саклыйк!

“2021 елда Туган телләр һәм Халыклар бердәмлеге елы кысаларында Татарстан Республикасы территориясендә яшәүче халыкларның телләрен, гореф – гадәтләрен, мәдәниятләрен саклап калуга һәм үстерүгә юнәлдерелгән проектларны гамәлгә ашыруда муниципаль мәктәпкәчә белем бирү һәм муниципаль гомуми белем бирү оешмаларына ярдәм итү” грантының җиңүчеләр исемлегендә безнең гимназиябез дә бар. Әлеге зур җиңү белән һәммәгезне дә котлыйбыз һәм киләчәктә дә зур уңышлар теләп калабыз.

Янгын куркынычсызлыгы, аның турында белем - балалар тәрбияләүдә мөһим роль уйный. Янгын теләсә кайсы урында һәм теләсә кайсы вакытта килеп чыгарга мөмкин. Укучылар да бу афәткә әзер булырга тиеш. Аларга бу бәла - казаны булдырмас өчен үзеңне ничек тотарга кирәклеген белергә кирәк. Шул максаттан, башлангыч сыйныфлар янгын куркынычсызлыгы почмагы әзерләделәр. Әлеге почмакларда укучылар өчен файдалы мәгълүмат тупланган. Бәла-каза китереп чыгармас өчен ниләр эшләргә ярамый, ә килеп чыккан очракта иң беренче нәрсә эшләргә, үзеңне ничек тотарга икәнлеге аңлатып язылган.