2 декабрь көнне Казан федераль университетында “Лев Толстой исемендәге конференция”нең икенче этабы үтте. Әлеге конкурста Казан шәһәренең төрле районнарыннан егетләр һәм кызлар катнашты. 9 нчы сыйныф укучысы Закирова Ильвина “Халкыбызның гүзәл энҗеләрен беләсезме?”, дип аталган фәнни-эзләнү эшен яклады һәм диплом белән бүләкләнде.

Ел саен, Халыкара Кеше хокуклары көнен бәйрәм итү кысаларында, “Кеше хокуклары” Бөтенроссия бердәм дәресе үткәрелә. Шушы көннәрдә гимназиябездә Кеше хокуклары буенча бердәм дәрес узды. Быел ул гражданлык һәм сәяси хокуклар турында Халыкара пактка кул куелуга 55 ел тулуга багышлана. Дәрес барышында укучылар күптөрле таныш булмаган төшенчәләр белән таныштылар һәм күп кенә файдалы мәгълүмат тупладылар.

Мәгълүмати стенд укучыларга мөһим мәгълүматларны, белешмәләрне җиткерү ысулларының берсе булып тора. Укучылар бик теләп әлеге белешмәләр белән кызыксыналар. Стендка урнаштырылган мәгълүматлар һәрдаим яңартылып тора. Шушы көннәрдә стендка "Сәламәтлекне яшьтән сакла!" дигән белешмә урнаштырылды. Биредә сәламәт булу  өчен укучыларга киңәшләр бирелгән.

Бүген гимназиябездә Халыкара кеше хокуклары көне уңаеннан, Бөтенроссия бердәм хокук дәресләре, викториналар, интеллектуаль уеннар үтте.

Тематик дәрес вакытында укучылар «Кеше хокуклары» тарихы турында сөйләштеләр, Кеше хокуклары гомум декларациясенең кыскартылган варианты турында фикер алыштылар, кызыклы сорауларга җавап бирделәр. 

3В сыйныфында Әниләр көненә багышланган бик матур чара үтте.  Укучылар әниләре турында сөйләделәр, аларга шигырьләр, җырлар багышладылар, әкиятләрдән өзекләр күрсәттеләр. Шулай ук үз куллары белән матур открытка ясадылар. Әниләренең портретларыннан күргәзмә дә оештырылган иде.

Сәламәтлекне ныгытуны балачактан башларга кирәк. Шуны күз уңында тотып, башлангыч сыйныф укучылары өчен физкультура дәресләрендә кызыклы спорт уеннары оештырыла. Укучылар бик теләп спортта көчләрен сыныйлар, вакытларын файдалы үткәрергә өйрәнәләр.

Терроризм белән көрәшү, аны булдырмый калу – һәр кешенең бурычы ул. Терроризм кешелек өчен зур куркыныч тудыра. Бүген гимназиядә, террорчылык акты турында ялган хәбәрләр өчен җинаять җаваплылыгы турында, сыйныф сәгатьләре үтте.

29 ноябрь көне В.И.Ленин исемендәге Мәдәният сараенда “Татар кызы, татар егете – 2021” бәйгесенең шәһәр этабы үтте. Әлеге бәйгедә Казан шәһәренең 7 районыннан егетләр һәм кызлар катнашты. Вахитов районы данын безнең гимназиянең 11А сыйныфы укучысы Зиннәтова Гүзәл һәм 27 нче гимназия укучысы Шакиров Рүзәл яклады. Алар “Таныш булыйк”, “Драматургия” һәм “Милли ашлар”ны тәкъдим итү бәйгеләрендә көч сынаштылар. Чыгышларын бик оста итеп башкарып, алар 3 нче урынга лаек булдылар. Гүзәлне зур җиңүе белән котлыйбыз, укуында һәм иҗатында зур уңышларга ирешүен телибез.

7А сыйныфы укучылары М.Горький исемендәге мәдәният һәм ял паркында булдылар. Алар сугышта һәлак булганнарга куелган һәйкәл янында батырларны 1 минут тынлык белән искә алдылар. Аннан соң бер-берсенә паркның тарихы турында сөйләделәр, соңыннан саф һавада хәрәкәтле уеннар уйнадылар. 

Әйләнә-тирә дөньяга сакчыл караш тәрбияләү максатыннан, 2 нче сыйныфта "Табигатьнең дусты бул " темасы буенча сыйныфтан тыш чара үтте. Укучылар "Табигать" темасы буенча белемнәрен күрсәттеләр,  кешенең табигатькә йогынтысы турында фикер алыштылар. Кызыклы биремнәрне чишү аларга бик ошады.