Мәктәптә укучыларыбыз, укытучыларыбыз тематик конкурсларда, конференцияләрдә актив катнашалар. Республика күләмендә үткәрелгән экологик конференциядә 9 нчы сыйныф укучысы Ганиева Гөлчәчәк, "Водная экология и гидробиология" темасына уңышлы чыгыш ясап, II  урынны яулады, Диплом белән истәлекле бүләк тапшырылды. Җитәкчесе -  химия-биология укытучысы Хәбибуллина Энҗе Әнәсовна. Аларга дирекция исеменнән зур рәхмәт белдерелә, шулай ук  һәр икесенә   алга таба да зур уңышлар телибез!

Мәктәптә сыйныфтан тыш чаралар план нигезендә  төрле эш формалары белән  алып барыла.  Бүген "Начар гадәтләргә ничек каршы торырга?" дип исемләнгән тематик очрашу үткәрелде. Очрашуга Саба урта мәктәбендә  16 ел  психолог булып эшләгән Сафина Әлфия Тимербаевна килде. Ул укучыларга начар гадәтләргә каршы тору юлларын тормыштан мисаллар китереп сөйләде, характер үзенчәлекләре буенча тестлар үткәрде, аларга нәтиҗә ясап, укучыларга олы  тормыш юлында югалып калмау, ихтыяр көче тәрбияләү турында тәфсилләп аңлатты. Лекциядән соң, теләкләре булган укучылар белән индивидуаль эш алып барды.

Гомумән алганда, укучылар әлеге очрашудан бик канәгать калдылар,кайбер сорауларына җавап алдылар. Алга таба да мондый эшлекле очрашулар булыр әле.

Тимурчылык эше мәктәптә яхшы куелган. Өлкәннәребезгә, чишмәләргә шефлык итү- укучыларның теләп башкарган хезмәтләрнең берсе. 9 нчы  сыйныф укучылары җитәкчеләре Гөлфинә Ринатовна белән "Әрәкә" чишмәсен чистартырга бардылар. Эш кораллары белән җиһазланган укучылар чишмә тирәсен чүп-чардан арындырдылар, сукмакны рәтләделәр, тротуарны чистарттылар.

Чишмәләр - яшәү чыганагы. Чишмәләрне кадерлик һәм саклыйк!

"Пионерская правда" газетасының баш редакторы М.Н.Баранников газетага язылу буенча мөрәҗәгать белән чыкты. Нәкъ бер елдан газета редакциясе үзенең 90 еллыгын билгеләп үтәргә әзерләнә. Балалар газетасы озын тормыш юлы үтә, укучыларыбызның тормыш юлын чагылдыра, аларны уртак идеяләр белән таныштыра, кавыштыра. Күпләргә тормыш  юлламасы биргән бу газетаны Тимершык урта мәктәбе алдыра, 2013-204 нче уку елына да язылып куйдык. Китапханәдә  "Пионерская правда" газетасы белән укучылар  даими танышып баралар, яшьтәшләренең уй-теләкләре белән уртаклашалар.

1 ноябрьдән 30 нчы ноябрь кереп, Рәсәй күләмендә "Спорт - начар гадәтләргә каршы көрәш чарасы" акциясе үткәрелә. Шушы уңайдан мәктәптә күп төрле чаралар  оештырыла. Һәр көнне эш  иртәнге гимнастикадан башлана. Шулай ук тематик буклетлар, рәсемнәр конкурсы, сыйныф сәгатьләре  үткәрелә, спорт чаралары оештырыла..

Каникул чорында мәктәптә  балалар тавышы бер дә кимемәде. Өстәмә белем бирү түгәрәкләре, дәүләт йомгаклау аттестациясенә әзерлек максатыннан консультацияләр, бәйрәм-кичәләр махсус график нигезендә үткәрелде. 6 нчы ноябрь көнне  мәктәптә "Әти, әни, мин - спорт гаиләсе" дигән бәйрәм оештырылды. Спорт бәйрәмендә 5 гаилә катнашты. Физкультура укытучысы Р.Ш.Шакиров  10 эстафета әзерләгән иде, гаиләләр бу эстафеталарны  бик тырышып башкардылар. Димәк, спортны үз итәләр икән. Бәйрәм җыр белән аралаштырылып алып барылды. Укучылар арасында "Иң күп табышмак белүче" билгеләнде, ул - 5 нче сыйныф укучысы Нәҗипова Илзидә. Спорт бәйрәмендә Хаҗиев Айратлар гаиләсе җиңү яулады. 5 гаиләгә дә Грамоталар һәм истәлекле бүләкләр бирелде. Бәйрәмдә катнашкан ата-аналарга, укытучыларга, укучыларга дирекция исеменнән зур рәхмәт белдерелә.

Гомумән алганда, Тимершык урта мәктәбендә ата-аналар белән эшләүгә зур игътибар бирелә.

2 нче ноябрь көнне мәктәптә I чирек нәтиҗәләре буенча педсовет булды.Педсоветның темасы:"Укучылар эшчәнлеген мотивацияләү". Педсовет темасы буенча рус теле һәм әдәбият укытучысы Валиева Гөлфинә Ринатовна чыгыш ясады.Тема буенча фикер алышулар үткәрелде.ФГОС ка күчү шартларында мотивацияләүнең әһәмияте азсызыкланды.Педсоветда карар кабул ителде, II чиреккә бурычлар куелды.

4 нче ноябрь- Халык бердәмлеге көне. Татарстан - дуслык иле. Халыклар дуслыгы- халык байлыгы. Халык бердәмлеге көне уңаеннан, мәктәптә күп төрле чаралар үтә. Тематик сыйныф сәгатьләре, "Халык бердәмлеге-ил байлыгы" темасына дәресләр үткәрелә, китапханәдә тематик күргәзмә оештырылды. 6 нчы сыйныфларда үткән тарих   дәресендә шушы уңайдан дәрес-презентация үткәрелде. укучылар шулай ук викторина сорауларына җавап бирделәр.

Укучыларны, укытучылар коллективын, мәктәп хезмәткәрләрен, әти-әниләрне бәйрәм белән котлыйбыз, эшегездә, укуыгызда зур уңышлар юлдаш булсын. Бергә булыйк, бердәм булыйк!!!

Олимпия уеннарына битараф кеше юктыр.Сочи шәһәрендә үтәчәк олимпиада уеннары һәм аңа әзерлек максатыннан, мәктәптә дәресләрдә, сыйныф сәгатьләрендә сөйләшүләр алып барыла. Бүген  5 нче сыйныфның тарих дәресендә олимпия уеннарына багышланган үзенчәлекле дәрес - презентация үткәрелде. Тарих укытучысы А.Х.Хәҗиев  укучыларны олимпиада уеннары тарихы, уен үзенчәлекләре, анда булган спорт төрләре  белән таныштырды. Укучылар дәресне,  зур җаваплылык тоеп, кызыксыну белән тыңладылар, сораулар бирделәр. Дәрес нәтиҗәле үтте.

Мәктәптә өстәмә белем бирү түгәрәкләре график нигезендә бик җанлы үтә. "Бадминтон" түгәрәгенә укучылар бик яратып йөриләр, җитәкчеләре Р.Ш.Шакиров белән бадминтон уйнау серләренә өйрәтә. Һәр атнаның сишәмбесе белән пәнҗешәмбесендә мәктәпнен спортзалы укучылар тавышыннан гөрләп тора. Киләчәк спортсменнары шулай әзерләнә инде ул! Уңышлар  юлдаш булсын, укучылар!