Тимершык урта мәктәбендә спортка зур әһәмият бирелә. Укучылар спорт түгәрәкләренә яратып йөри, район ярышларында актив катнаша. Кичә, 18 нче октябрь көнне, Килдебәктә мәктәпләр арасында оештырылган баскетбол  ярышында  кызлар командасы 2 нче урынны  яулады. Менә алар:

1.Габдрахманова Гөлшат

2.Вәлиева Гөльяз

3.Гарифуллина Илсинә

4.Фазылова Зәринә

5.Дәүләтҗанова Айсинә

6.Харисова Ләйсән

7.Нәгыймова Айзилә

8.Хөсәенова Тансылу

9.Закарова Илнара

10.Гаттарова Илзидә

Афәрин, кызлар! Җитәкчеләре Ш.Х.Шакировка һәм кызларга дирекция исеменнән зур рәхмәт белдерелә, алда тагы да югары үрләр яулавыгызда зур уңышлар тели.

Мәктәбебездә шигъри җанлы укучыларның күп булуы шатландыра. Шигырьләрне башта  китапханәдә бер-беребезгә укыйбыз, киңәшләр бирәбез. Бу өлкәдә безгә татар теле һәм әдәбияты укытучылары, китапханәче Гөлсинә  Касыймовна ярдәм итә. Шуннан соң "Саба таңнары", "Сабантуй" газеталарына җибәрәбез.  "Сабантуй" газетасының 40 нчы санында (05.10.2013) 6 нчы сыйныф укучысы Зилә Галимҗанованың "Дустым Алинә" дигән шигыре басылган. Зилә дустының гөлләр яратуы, тырыш, эшчән булуы турында яза.  Дусты Алинәне бик мактаган.

Афәрин, Зилә!

Тимершык урта мәктәбе  китапханәсендә  һәр тәнәфестә, шулай ук дәресләрдән соң, укучылар өзелми. Китапханәче Гөлсинә Касыймовна да үзләре белән төрле эшләр алып бара. Китапларны рәтләү буенча да укучылар ярдәм итә үзенә. Газеталардан яңалыклар белән танышулар, "Әкиятләр илендә" дип исемләнгән сәяхәтләр, "Син беләсеңме?" дигән викториналарны укучылар бик яраталар. Айлык кысаларында  бүген "Әкиятләр илендә" дигән темага 6-7 нче сыйныфлар арасында  сөйләшүләр үткәрелде. Укучылар бик канәгать калдылар.

Кичә, 13 нче октябрь көнне, Тимершык урта мәктәбенең 2-5 нче сыйныф укучылары Казан шәһәренә экскурсиягә бардылар. Алар Г.Камал исемендәге академия театрының музеенда булдылар, зур залда  Илгиз Зәйниевның "Кечтүкле уен" спектаклен карадылар. Татар фольклорына нигезләнеп иҗат ителгән бу спектакль яхшылык һәм яманлык, дуслык һәм нәфрәт кебек мәңгелек төшенчәләр хакында сөйли. Спектакль фэнтэзи жанрында, алдынгы технологияләр белән  куелган, заманча музыка һәм хореографиягә корылган. Бик тәрбияви, эчтәлекле спектакль укучылар күңеленә хуш килде. Балаларны  театрга  алып барырга  бушлай автобус белән  ярдәм иткән  өчен   Саба районы кулланучылар җәмгыяте рәисе    Гайнетдинов Шәүкәт Әсгадетдин улына, мәктәп директоры И.Г.Давлиевка   ата-аналар, балалар  исеменнән зур рәхмәт әйтәбез. Укучыларны экскурсиягә алып барып ял иттергәннәре өчен сыйныф җитәкчеләре Гарифуллина М.М., Фальванова А.Ф., Хазиев А.Х., тәрбия эшләре буенча директор урынбасары Х.С.Нәҗиповаларга  дирекция исеменнән рәхмәт белдерелә.

Күңелле экскурсия һәм  искиткеч сәяхәт мизгелләре укучылар күңелендә әле озак сакланыр.

"Наркотикларсыз тормыш" айлыгы дәвамында мәктәптә күп эшләр башкарылды.Укучылар, ата-аналар, укытучылар белән эш төрле формада алып барылды: түгәрәк өстәл артында тематик  сөйләшүләр, әңгәмәләр үткәрелде,   фильмнар каралды, җыелышлар үтте. Үткәрелгән чараларга Тимершык авыл җирлеге башлыгы Вафина Н.С., балигъ булмаганнар белән эшләү инспекторы, полиция майоры И.Т.Зәкиев, район хакимияте каршында балигъ булмаган балалар  белән эшләү комиссиясенең җаваплы сәркатибе Р.М.Билалов, Тимершык авылы фельдшеры Нуриева З.Ф.лар укучылар алдында сәламәт яшәү рәвешен алып бару буенча чыгышлар ясадылар, киңәш-тәкъдимнәрен бирделәр.

14 нче октябрь көнне балигъ булмаган балалар белән эшләү комиссиясенең җаваплы сәркатибе Р.М.Билалов  зарарлы гадәтләргә каршы көрәшү буенча чыгыш ясады, бирелгән гомерне файдалы, нәтиҗәле итеп үткәрү өчен,  сәламәт яшәү рәвешен сайлауның зарур икәненә басым ясады.

Гомумән алганда, балалар өчен барыбыз да җаваплы. "Сәламәт тәндә- сәламәт акыл" дигән гыйбарәне тагы бер искә төшерергә һәм аңа омтылыш тәрбияләргә генә кала.

Кичә, 11 нче октябрь көнне, 8-11 нче сыйныфлар өчен мәктәптә "Көз патшабикәсе-2013" бәйрәме оештырылды. Бәйрәм программасы түбәндәгеләрне үз эченә алды:

1.КВН

2.Көзге табын.

3.Дискәтүк.

Бәйрәмгә кадәр укучыларның "Көз бизәкләре" темасына  әзерләгән күргәзмәләре буенча нәтиҗә ясалды.

11 класс-I урын

10 класс-II урын

8 класс-III урын

КВНда  "Көз балкышлары" белән "Укучылар" командасы 8  турда көч сынашты. КВНны  Фазылова Зәринә белән Карамов Альмир бик матур итеп алып бардылар. Командалар да  ныклы әзерлек белән килгәннәр иде. "Әйдә, танышабыз!", "Табышмаклар беләсеңме?", "Кем тизрәк?", "Школьное меню", "Көзнең баш тегүчесе", "Көзге коллекция" (мода күрсәтү), "Табигать могҗизалары" (өй эше), "Көзге сәхнә"  турларында командалар  зур осталыкларын күрсәттеләр. Көз патшабикәсе соңыннан укучыларны көзге табынга чакырып сыйлады. Бәйрәм дискотекасында укучыларыбыз рәхәтләнеп биеделәр.

Гомумән алганда, бәйрәм күңелле үтте. Аның күңелле мизгелләре укучылар, укытучылар күңелендә әле озак сакланыр.