Хәрби-патриотик айлык кысаларында укучылар арасында спорт ярышлары үтте. Традицион рәвештә ел да үткәрелә торган бу чарада барлык укучылар да катнаша. Бүген ярышларга нәтиҗә ясалды. Кызлар арасында  барлык төр спорт ярышлары буенча  җиңүче дип,  7 нче сыйныф укучысы Фатыйхова Нәзилә, егетләр арасында 9 нчы сыйныф укучысы Галимов Альберт табылды. Аларга күчмә кубок бирелде. Спортны үз итүче кызыбыз Фатыйхова Нәзилә икенче ел рәттән Кубок иясе булды. Галимов Альбертны, Фатыйхова Нәзиләне зур җиңүләре белән кайнар котлыйбыз, алга таба да зур уңышлар телибез. Афәрин, укучылар!

7  нче март көнне мәктәптә,   Халыкара хатын-кызлар бәйрәме уңаеннан, матур  концерты оештырылды. Аны 7 нче сыйныф укучылары җитәкчеләре М.Ф.Миннеханова белән берлектә әзерләделәр һәм укытучыларны, укучы кызларны, әниләрне  котлап концерт күрсәттеләр. Концерт бию-җырлар белән аралашып алып барылды. 7 нче сыйныф укучыларына, сыйныф  җитәкчеләре М.Ф.Миннехановага   дирекция исеменнән зур рәхмәт белдерелә.

"Беркем дә читтә калмасын!" Волонтерларның девизы нәкъ шундый. Мәктәпкә район волонтерлары килде, укучыларыбыз арасында тренинглар үткәрделәр, яшәү рәвешен, ярдәмгә мохтаҗ  кешеләргә булышу турында проект эшләре башкардылар. Мәктәбебездә волонтерлар координаторы итеп бертавыштан 10 нчы сыйныф укучысы Закарова Эльмира сайланды. Аның урынбасарлары 10 нчы сыйныф укучылары Гаттарова Илзидә белән Загидуллин Искәндәрләр сайланды.

Мәктәптә тимурчылык эше  нәтиҗәле эшли. Ялгыз әби-бабайларга ярдәм итү, чишмәләрне чистартып тору укучыларга бүлеп бирелгән. Бәйрәм вакытларында котлау белән барабыз, хәл-әхвәлләрен сорашабыз. Миңгәр авылында яшәүче Зиннурова Гөлфәрах апаны  Халыкара хатын-кызлар көне белән тимурчылар Закарова  Илнара  белән Хөсәенова Таңсылулар котлап бардылар. Гөлфәрах апа зур рәхмәтләрен белдерде.

Бүген, 6 нчы март көнне, мәктәбебезнең бер төркем укучылары тәрбия эшләре буенча директор урынбасары Х.С.Нәҗипова җитәкчелегендә "Саба дулкыннары" телерадиокомпаниясендә "Мәктәпләр тормышыннан" тапшыруында турыдын-туры эфирда катнаштылар. 7 нче сыйныф укучысы Нуриева Ләйсәния белән 6 нчы сыйныф укучысы Гыйниятуллин Илназлар тапшыруны аһәңле итеп алып бардылар.  Мәктәп директоры И.Г.Дәүлиев мәктәбебезнең материал-техник  базасы, укудагы  уңышларыбыз   белән таныштырды. 7 нче сыйныф укучысы Закарова Илнара "Спорт- минем тормыш девизым!" дигән чыгышын тәкъдим итсә, шигъри күңелле кызыбыз Галимова Зилә, йөрәкләргә үтеп керерлек итеп,  "Әниемә" шигырен сөйләде. Моңлы сандугачыбыз, 3 нче сыйныф укучысы Гарифуллина Айзилә  Тимершык мәктәбендә эшләүче һәркемгә үзенең матур җырын бүләк итте. Халыкара хатын-кызлар көне уңаеннан, барлык әниләргә багышлап, "Пар канатым" җырын башкарды. Гомумән, тапшыруда мәктәбебезнең мавыктыргыч, кызыклы, могҗизаларга бай тормышы сөйләнде.

1  нче март көнне мәктәпнең бер төркем укучылары татар теле һәм әдәбияты укытучысы белән берлектә  Казанга "Дулкыннар"  республикакүләм конкурсының финал этабында катнашырга бардылар. 11 нче сыйныф укучысы Гәйфиев Рәдиф,  10 нчы сыйныфтан - Закарова Эльмира, 9 нчы сыйныфтан - Фазылова Таңсылу, 6  нчы сыйныфтан - Галимова Зилә белән Гыйниятуллин Илназлар  "Нәфис сүз" номинациясендә  матур чыгыш ясап кайттылар. Алга таба да  үзләренә зур уңышлар юлдаш булсын!

ФГОС шартларында  башлангыч сыйныфларда дәрестән тыш өстәмә шөгыльләр үткәрелә. Татар теле һәм әдәбияты укытучысы М.Ф.Миннеханова "Театр студиясе" шөгыле алып бара. Аларның инде иҗат җимешләрен күрергә була. Бүген ясле-бакча балаларына  2 нче сыйныф укучылары  А.Алишның "Куян кызы" әсәрен сәхнәләштереп күрсәттеләр. Бәләкәчләр бик яратып карадылар.

28 нче февраль көнне бездә мәктәпне төрле елларда тәмамлаган һөнәр ияләре, студентлар белән "Яратып эшләгән эш кенә куаныч китерә" дип исемләнгән очрашу-кичә үткәрелде. Бәйрәмгә Саба районы халыкны эш белән тәэмин итү үзәге дәүләт казна оешмасы директоры Габдрахманов Данис Рәкыйпович,  Саба район мәгариф бүлегенең тәрбия эшләре буенча  урынбасары Шафикова Гөлнар Илдаровна, Балалар иҗат үзәге директоры Хафизов Фидан Мидхәтович,  Саба җәмгыятенең  Кызыл-Мишә  филиалы агрономы Мөхәммәтҗанов Дамир Вакыйфович, Тимершык авыл җирлеге башлыгы Вафина Нуршат Сабирулловна, Тимершык мәдәният йорты сәнгать җитәкчесе  Хантимеров Айдар Шаһинуровичлар  чакырылды. 8-11 нче сыйныф укучылары каршында мәртәбәле кунаклар һөнәр сайлауда укучыларга теләкләрен җиткерделәр, укыткан укытучыларына зур рәхмәтләрен җиткерделәр. Данис Габдрахманов, Фидан Хафизов, Гөлнар Илдаровна, Дамир Мөхәммәтҗановлар бертавыштан: "Тимершык мәктәбендә укуыбыз белән  чиксез горурланабыз, олы тормышта үз урыныбызны яулавыбыз белән без укытучыларыбызга рәхмәтле!"-дип  белдерделәр. Төрле уку йортларында укучылар студент тормышы, сессияләр турында тәфсилләп сөйләделәр, чыгарылыш сыйныф укучыларын укыган уку йортларына  чакырдылар. Очрашу-кичәнең икенче өлешендә "Акыл-тезген, белем-ат" дип исемләнгән интеллектуаль уен үткәрелде, анда студентлар белән укучылар командалары көч сынашты. Кичә ахырында дискотека булды.

Очрашу-кичәнең күңелле мизгелләре укучыларыбыз, кунакларыбыз, студентларыбыз күңелендә эзсез калмас!

Бүген, 27 нче февраль көнне, Балалар иҗат үзәгендә  район укучылар думасының бәйрәме булды. Мәктәп укучылар  думасының активистлары катнашында  үткәрелгән бал-маскарадта бездән дә 5 укучы катнашты. Гаттарова Илзидә, Галимов Альберт, Фазылова Таңсылу, Загидуллин Искәндәр, Закарова Эльмиралар бәйрәмне бик ошатып кайттылар. Ә Эльмира белән Искәндәр бал биюен бик матур, оста  биеделәр. Бәйрәмдә дума активистларын котладылар.