Хәрби-патриотик айлык дәвам итә. Бүген, 26 нчы февраль көнне,  мәктәптә "Аҗаган" уены үткәрелде.  Уенга "Зәңгәрләр" һәм "Яшелләр" командалары ныклы әзерлек  белән килгәннәр. Байрак эзләү барышында командалар арасында "сугышчан" ярышлар (миналар эзләү, ату, яралыларны ташу,  һ.б.) оештырылды. Күп төрле сынауларны үтеп, "Яшелләр" командасы байракны эзләп таптылар. Димәк, "Аҗаган" уенының җиңүчесе дә - алар! Котлыйбыз, булдырдыгыз! Уенда һәр ике команданың да оешкан төстә катнашулары бик сокландырды.Гомумән, айлык бик нәтиҗәле  үтә.

Хәрби-патриотик айлык  кысаларында   мәктәптә спорт ярышлары дәвам итә. 25 нче февраль көнне "Зәңгәрләр" белән "Яшелләр" командаларының кызлары арасында бадминтон ярышы үткәрелде."Зәңгәрләр" командасыннан  Нотфуллина Рәзинә (8 кл.) - 1нче урын, Дәүләтҗанова Айсинә (8 кл.)-2 нче урын, Нуриева Ләйсәния (7 кл.)- 3 нче урын, "Яшелләр" командасыннан Галимҗанова Энҗе (6 кл) - 4 нче урынга лаек булдылар. Шулай итеп, "Зәңгәрләр" командасы җиңү яулады. Һәр ике командага алга таба уңышлар телибез.

Бүген, 24 нче февраль көнне, хәрби-патриотик айлык кысаларында мәктәптә 2-11 нче сыйныфлар арасында маршировка үткәрелде. Барлык сыйныфлар да ныклы әзерлек белән килгәннәр. ТИН фәне укытучысы А.Г.Биктимиров,  нәтиҗә ясап, укучыларга, сыйныф җитәкчеләренә рәхмәт белдерде. Мәктәп директоры И.Г.Дәүлиев,   өлкән сыйныф укучыларына мөрәҗәгать итеп: "Сез инде бүгеннән солдат хезмәтенә әзер икәнлегезне күрсәттегез, булдырдыгыз!"- дип үз бәясен бирде. Гомумән, мәктәптә хәрби-патриотик айлык югары дәрәҗәдә үтә, алда әле "Аҗаган" уены көтә.

Бүген мәктәптә,  "Ватанны саклаучылар көне" уңаеннан, тематик очрашу-кичә үткәрелде. Очрашуга  Әфган һәм Чечня җирендә хезмәт иткән Гарифуллин Илдус, Юмагулов Ильяс, Ибатуллин Әнвәр, Хафизов Наис, Таһиров Минзакирлар чакырылды. 5 нче сыйныф укучылары (сыйныф җитәкчеләре Айдар Ханифуллович) кунаклар хөрмәтенә, мәктәбебезнең ир-егет укытучылары һәм укучыларын бәйрәм белән котлап, концерт номерлары белән чыгыш ясадылар. "Зәңгәрләр" белән "Яшелләр" командалары арасында "Ягез әле, егетләр" бәйгесе булды. Кунаклар,  балалар алдында чыгыш ясап, укучыларга  тырышып укырга, тыныч тормышның кадерен белергә кирәклеген әйттеләр. Очрашу-кичә матур үтте. Бәйрәмне оештырган  һәм нәтиҗәле үткәргән өчен, 5 нче сыйныф укучыларына, җитәкчеләре, тарих укытучысы А.Х.Хаҗиевка  дирекция исеменнән зур рәхмәт белдерелә.

Тимершык урта мәктәбендә кышкы олимпиада уеннары буенча тематик сөйләшүләр, фикер уртаклашулар даими булып тора. Уеннарның барышын күзәтәбез, борчылабыз, сөенәбез. Бүген 3-4 нче сыйныфлар өчен тарих укытучысы А.Х.Хаҗиев "Олимпия уенары тарихы" дип исемләнгән тәрбияви чара үткәрде. Чара файдалы һәм нәтиҗәле үтте.

Хәрби-патриотик айлык кысаларында бүген "Зәңгәрләр" белән "Яшелләр" командалары арасында хоккей ярышы оештырылды. Укучылар ныклы әзерлек алып бардылар. Уен бик матур һәм үзенчәлекле булды. Ярыш ярыш инде. Кемдер җиңелә, кемдер җиңә.  "Зәңгәрләр"командасы җиңү яулады. Афәрин дибез. Һәр ике командага да зур уңышлар телибез.

Хәрби-патриотик айлык кысаларында "Зәңгәрләр"  белән "Яшелләр" командалары  арасында  спорт төрләре буенча ярышлар үткәрелә. Бүген  кызлар арасында баскетбол ярышы оештырылды. Уен искиткеч булды. Кызлар бик тырыштылар. Ярышта "Зәңгәрләр" командасы җиңде. Ике командага да зур рәхмәт, алга таба да зур уңышлар телибез!

Мәктәптә хәрби-патриотик айлык  кысаларында бүген кызлар арасында   волейбол ярышлары үткәрелде. "Яшелләр" командасы "Зәңгәрләр" командасын җиңде. Һәр ике командага да алдагы ярышларда уңышлар телибез!

Бүген мәктәп китапханәсенә, Муса Җәлилнең туган көне уңаеннан, нәни кунаклар килде. "Кояшкай" ясле-бакча балалары өчен татар теле һәм әдәбияты укытучысы М.Ф.Миннеханова "Шигърияттә кунакта!" дип исемләнгән чара үткәрде. Нәниләргә 1 нче сыйныф укучылары ятлаган шигырьләрен  сөйләп күрсәттеләр; шагыйрьнең тормыш юлын,иҗатын чагылдырган видеофильм карадылар. Чара файдалы һәм нәтиҗәле  үтте, ясле-бакча балаларына бик ошады.

Мәктәбебездә тәрбияви чаралар даими үтеп тора. Февраль ае -   хәрби-патриотик айлык. Шушы айның 15 нче февралендә  герой-шагыйрь Муса Җәлилнең туган көне билгеләп үтелә. Исән булса, аңа 108 яшь булыр иде. 7-8 нче сыйныфларда "Каһарман шагыйрь Муса Җәлил"  дип исемләнгән  сыйныфтан тыш чара үткәрелде. 7 нче сыйныф укучысы Фатыйхова Нәзилә шагыйрьнең тормыш юлын, иҗатын чагылдырган презентация әзерләгән иде, аның чыгышы тыңланды. "Муса Җәлил эзләре буйлап..." дип исемләнгән  видеофильм карадылар. Тәрбия чарасын 7 нче сыйныфның җитәкчесе, татар теле һәм әдәбияты укытучысы Миңсылу Фәнәвиевна шагыйрьнең "Җырларым" шигыре белән тәмамлады. Мондый чараларның укучыларны ил гражданнары итеп тәрбияләүдә әһәмияте бик зур.