Бүген, 11 нче октябрь көнне, Казан шәһәрендә мәгариф оешмаларының республикакүләм ярминкәсе  үткәрелде. Мәктәп коллективы ярминкәдә актив катнашты. Шәһәр халкына авылда җитештерелгән   продуктлар алып барылды. Шулай ук  "Ялкын" бию коллективы  (җитәкчесе Фазылҗанов  Ильназ Рәисович)  рус халык биюе белән уңышлы чыгыш ясады.

Бүген  Тимершык урта мәктәбендә КЭС-БАСКЕТ ярышының зона этабы үткәрелде. Шыңар, Мичән, Симет, Тимершык мәктәпләренең   кызлар һәм егетләр  командалары ярышты. Мәктәбебезнең  кызлар командасы 1 нче, егетләр командасы 2 нче урын яулады.  Укучыларыбызга, җитәкчеләре Шакиров Шамил Хәсәновичка   афәрин дибез һәм  район этабы ярышларында  зур уңышлар телибез! 

9 нчы октябрь көнне 5-7 нче сыйныфларда "Уңыш бәйрәме" үткәрелде. Һәр сыйныф бәйрәмгә күргәзмә әзерләде. Бәйрәмнең  төп өлеше ярыш формасында үтте.  Һәр команда исемен яклады, 5 турда чыгыш ясады. Барысы да  бәйрәмгә ныклы әзерлек белән килде. Күргәзмәләр  буенча нәтиҗәләр түбәндәгечә:

1 нче урын- 6 нчы сыйныф

2 нче урын - 5 нче сыйныф

3 нче урын - 7 нче А һәм Б сыйныфлары

Чыгышлар буенча нәтиҗәләр түбәндәгечә:

1 нче урын - 6 нчы сыйныф

2 нче урын -7 нче А сыйныфы

3 нче урын - 7 нче Б сыйныфы

Бәйрәмне нәтиҗәле итеп үткәргән өчен оештыручы-педагог Л.З.Гафуровага, сыйныф җитәкчеләре Якупова Л.Р., Хаҗиев А.Х., Фәйзетдинова З.Б., Хаҗиева Ә.Г.ларга, әти-әниләргә дирекция исеменнән зур рәхмәт белдерелә.

Мәктәптә "Алтын көз" бәйрәмнәре үтә. Бүген 8-11 нче сыйныфлар өчен "Көзге утырма" дип исемләнгән бәйрәм  оештырылды. Һәр сыйныф,  көзге темага багышлап,  газета чыгарды, тематик чыгыш әзерләделәр. "Көзге урман" (8  нче сыйныф), "Көзге төн" (9 нчы сыйныф), "Көзге яңгыр" (10 нчы сыйныф), "Көзге көн" (11 нче сыйныф) командалары 4 турда көч сынаштылар.  Һәр командага  эчтәлекле чыгышлары өчен  афәрин диясе килә. Булдырдыгыз, укучылар!

Мәктәптә "Алтын көз" бәйрәмнәре үткәрелә. Бүген  1-4 нче сыйныфлар өчен "Сөмбелә" бәйрәме  булды. Укучылар көзге байлыктан  күргәзмәләр әзерләгәннәр. Нәтиҗәләр түбәндәгечә:

1 нче урын - 1 нче сыйныф - "Яшелчәләр патшалыгы"

2 нче урын - 4 нче сыйныф - "Без - әкият илендә"

3 нче урын - 3 нче сыйныф - "Көзге урманда", 2 нче сыйныф - "Әкияти дөнья".

Бәйрәмдә "Сөмбеләләр" бәйгесе үткәрелде.  7 укучы катнашты, алар 5 турда көч сынаштылар. Сөмбеләләр  сәнгатьле итеп шигырь сөйләделәр, яфрак таныдылар,   чәчәк букетлары ясадылар, яшелчә исемнәрен әйттеләр, матур итеп бию күрсәттеләр. Һәр укучы бик тырышты. Конкурс булгач, җиңүчеләрен дә билгеләргә туры килде. Нәтиҗә түбәндәгечә:

1 нче урын - Фатыйхова Миләүшә - 4 нче сыйныф

2 нче урын - Гәрәева Рәзилә  - 4 нче сыйныф

3 нче урын - Гарипова Азалия - 3 нче сыйныф

Бәйрәмне нәтиҗәле итеп оештырган өчен оештыручы-педагог Ләйсән Зөфәровнага, күргәзмәләр әзерләргә ярдәм иткән өчен сыйныф җитәкчеләренә, әти-әниләргә дирекция исеменнән зур рәхмәт белдерелә.

Укучыларыбыз иҗади бәйгеләрдә бик актив катнаша. 26 нчы сентябрь көнне Казан шәһәренең Г.Тукай музеенда "Тылсымлы куллар" журналы  оештырган "Илһам чишмәсе" бәйгесенең  бүләкләү тантанасы булды. Бәйгенең максаты - сәләтле, иҗади,  максатчан укучыларны  ачыклау. Тантаналы  котлау   чарасында безнең мәктәптән 3 нче сыйныф укучысы Давлитов Баязит  катнашты. "Илһам чишмәсе" бәйгесендә Баязит 3 нче урынга лаек булды. Аңа алга таба да зур уңышлар телибез.

Тимурчылар өлкәннәребезне бер дә онытмыйлар. Өлкәннәр көне уңаеннан, аларга котлау открыткалары тапшырдылар, йорт эшләренә ярдәм иттеләр. Өлкәннәребез  балаларга, әти-әниләренә зур рәхмәтләрен җиткерделәр. Беркайчан да, беркемгә дә, бернәрсәгә дә битараф булмыйк!!!

Күтәрик  егылган  гөлләрне,

Матурлык  калмасын басылып.

 Холкыбыз  бик сабыр булса да

Яхшылык эшләргә ашыгыйк.

Октябрь аенда бик күркәм бәйрәм - Өлкәннәр көне үткәрелә. Бәйрәм көнендә мәктәптә эшләгән, бүгенгесе  көндә лаеклы ялда булган өлкән буын вәкилләрен чакырып кунак итәбез. Бәйрәмнең беренче өлешендә алар хөрмәтенә 7 нче А (сыйныф җитәкчеләре Фәйзетдинова З.Б.) һәм 7 нче Б сыйныфлары (сыйныф җитәкчесе Хаҗиева Ә.Г.) бик матур әдәби-музыкаль монтаж  куйдылар. Бәйрәмнең икенче өлеше  мәктәп ашханәсендә чәй табыны янында дәвам итте. Истәлекләр, эшләү дәверендә булып узган вакыйгалар турында  сөйләнде, өлкәннәребез  яшьләребезгә  киңәшләрен бирделәр , профсоюз оешмасына, мәктәп администрациясенә олы рәхмәтләрен җиткерделәр.

5 нче октябрь - Укытучыларның һөнәри бәйрәме! Бүген мәктәпнең укучылар Думасы иртән укытучыларны котлау открыткалары һәм чәчәк бәйләмнәре белән каршы алды. Мәктәбебезнең чыгарылыш укучылары үзләренең иң изге теләкләрен җиткерделәр.

Укытучым, минем, сүнмәс назым, 

Якты язым - балачакларым!

Мин гомергә, әнкәм белән бергә, 

Күңелелемдә Сезне саклармын.

Сезгә булган матур теләкләр

Шытып чыкты йөрәк түрендә.

Сәламәтлек, озын гомер, бәхет

Без телибез алгы көнегездә.

Бәйрәм белән, хөрмәтле укытучылар!!!