Лагерь  эшләвен дәвам итә. Бүген лагерьның 8 нче көне! Иртән балаларны музыка сәламли, иртәнге зарядка, линейкадан соң, витаминга бай иртәнге аш ашыйлар. Аннары табышмаклар илендә сәяхәт кылдылар, туган як темасына проект эше якладылар. Төшке аштан соң,  экологик сукмак буйлап  Тимершык авылы буенча   сәяхәттә булдылар. Авыл урамнарына, челтери чишмәләренә сокланып кайттылар.  Бик   канәгать калып,  күңелле мизгелләрне күңелгә сеңдереп, балалар өйләренә таралыштылар.

Хезмәт һәм ял лагерына йөрүче балалар да бик анәгать булдылар. Алар янына кунакка   "Балкыш"  социаль ярдәм күрсәтү оешмасыннан бер төркем хезмәткәрләр килде. "Наркотикларсыз тормыш" республикакүләм акциясе кысаларында    "Спорт- сәламәтлек ул!"  дип исемләнгән менә дигән эстафета үткәреп киттеләр.  Психолог- Нуруллина Миляуша Ринатовна, соц. педагог Зиннатуллина А.Р., социаль хезмәткәр  Хисамиева Г.Ф., бүлек мөдире Багманова Э.Ф.лар балаларга  сәламәтлекнең кадерен белергә кирәклеген төшендерделәр.

Июнь аеның ямьле, кояшлы көне. Лагерьның 7 нче көненә дип шат йөзле балалар җыелды. Саф һавада гимнастика, иртәнге линейкалар үтте.  Мәктәпнең китапханә залында Бөек Җиңүнең 70 еллыгы уңаеннан видеофильм карадык. Ул безгә тынычлыкның кадерен аңларга ярдәм итә. Табышмаклар иленә сәяхәт һәркемнең күңеленә хуш килде. Көннең иң күңелле мизгеле бию конкурсына әзерлек булгандыр.  Витаминга бай көндезге аштан соң, бию конкурсы үткәрелде. Хореограф һәм әйдаманнар балаларга менә дигән биюләр өйрәткәннәр! Һәр отряд та җиңүче булды һәм лагерь грамотасы белән бүләкләнделәр. "Шатлык" лагерының  мавыктыргыч мизгелләре әле балалар күңелендә озак сакланыр!!!

Хезмәт һәм ял лагерена йөрүче балалар да бик канәгать. Мәктәп бакчасында яшелчәләр гөрләп үсеп киттеләр, чәчәкләр кояшка үрелеп үсә башладылар. Балалар   Кызыл-Мишә авылында урнашкан фермага экскурсиягә бардылар,  автоматлаштырылган ферма хуҗалыгын зур кызыксыну белән карадылар. Җитәкчеләре Лилия апалары Римгилевна балалар өчен күңелле мизгелләрне даими үткәреп кенә тора. Афәрин, балалар!

Авылларда халкыбызның милли бәйрәме - Сабантуйлар гөрләп үтеп тә китте.  Ике көн ялдан соң, балалар лагерьны бик яратып килделәр. Лагерь тормышын сагынганнар. Иртәнге зарядка, линейкадан соң, балалар рәсем конкурсында актив катнаштылар. Хореограф Илназ абыйлары Фазылҗанов  бию өйрәтте, иртәгә  буласы  бию конкурсына әзерләнделәр. Витаминга бай көндезге аштан соң, балалар  мәктәп стадионында  Альберт абыйлары Гыйльмуллович җитәкчелегендә футбол уйнадылар. Көн  менә шулай тиз генә күңелле, мавыктыргыч булып үтеп тә китте. Лагерьның һәр көне балалар күңелендә  бер мизгел булып сакланыр әле. 

Хезмәт һәм ял лагере шулай ук бик матур гына башланып китте.  Сабантуй җирен җыештырып кайттылар, Шакиров Шамил абыйлары белән баскетбол уйнадылар. Көннең нәтиҗәле үтүенә һәркем соклануын белдерде.

Лагерьның 5 нче көне. Җиләс,саф һава, рәхәт... Балалар бик   шатланышып килделәр, иртәнге зарядкадан соң, балалар походка чыктылар. Тимершык авылының матур табигате, изге сулы чишмәләренә сокландык. Көндезге аштан соң, Шакиров Шамил абыйлары белән рәхәтләнеп футбол уйнадылар, спорт мәйданчыкларында шөгыльләнделәр. көн матур, истәлекле мизгелләргә бик бай булды. Бу көн дә әле балалар күңелендә озак сакланыр!

Хезмәт һәм ял лагеры да нәтиҗәле үтте, отрядта "Наркотикларсыз тормыш"  темасына түгәрәк өстәл артында сөйләшү үткәрелде. лагерь начальнигы лилия Римгилевна, көнгә нәтиҗә ясап, бүгенге көнегез дә куанычлы үтте дип белдерде.

Мәктәп яны лагерьларының 4 нче көне дә бик матур, нәтиҗәле үтте.  Иртәнге зарядка, линейка үткәрелде. Витаминга бай иртәнге аштан соң, "Шатлык"  лагеры балалары Миңгәр авылына Ш.Биктимиров исемендәге музейга экскурсиягә бардылар. Көннең икенче яртысында "Куркынычсыз каникуллар" акциясе кысаларында    Челтәр компаниясе ачык акционерлык җәмгыятенең Алабуга электр челтәренең Саба филиалы хезмәткәрләре белән очрашу үткәрелде.  Безгә оешманың әйдәп баручы инженеры Флорид Хаҗиев, мастер Марат Вәлеев, контролер Рәмилә Вилданова, инженер Миләүшә Якуповалар килде һәм электр челтәре турында аңлаттылар, куркынычсызлык кагыйдәләрен төшендерделәр. Балалар белән конкурслар үткәрделәр, бик күп бүләкләр өләштеләр. Очрашу файдалы булды. 

"Пчелки" ял һәм хезмәт лагерына йөрүче балаларның көне дә матур үтте. Мәктәп бакчасында эшләделәр, өстәл уеннарын уйнадылар, көннең икенче яртысында Шамил Хәсәнович белән эстафета үткәрделәр. Әйе, лагерьларда ял да итәбез, сәламәтлекләр дә ныгытыла.

Мәктәп яны лагерьларының   өченче  көне!  Барлыгы 65 бала ял  итә, сәламәтлекләрен ныгыта. Көн гадәттәгечә башланды, иртәнге линейка, музыка  белән иртәнге зарядкалар булды. Витаминга бай  иртәнге аштан соң,  "Шахмат" түгәрәге үткәрелде. Гөлнара апалары Хәбибрахманова   балаларны шахмат уйнау серләренә төшендерде, яхшы уенчылар өчен кечкенә генә ярыш та булды. 12 нче июнь - Россия көне! Шул уңайдан  рәсемнәр конкурсы үткәрелде. Һәр отряд экибаналар ясадылар, бер-берсенә тәкъдим  иттеләр. 

Хезмәт һәм ял лагерена йөрүче балалар да  мәктәп бакчасында эшләделәр, Россия көне уңаеннан, плакатлар иҗат иттеләр. Лагерь начальнигы Лилия Римгилевна балаларның ялын дөрес оештыруда кызыклы конкурслар уйлап таба. Гомумән, лагерьның  һәр көне   балалар  күңеленә  язылып бара.

02.06.2015

Тимершык урта мәктәбе балаларның шат авазларыннан яңгырап тора. "Шатлык" ял һәм сәламәтләндерү лагеры үзенең эш көнен иртәнге зарядкадан башлады. Линейкада көн дәвамында эшлисе эшләр планлаштырылды. Бүген балалар лагерьның ачылышына дип "Самими балачак" концертын әзерләделәр. Витаминга бай иртәнге һәм көндезге аш ашадылар. Футболны да бик яратып уйнадылар. Менә лагерьны ачар  минутлар җитте. Флагны иң актив балалар - Фавиз белән Рәзилә күтәрделәр.  Матур җырлар җырлап, биюләр биеп, үзләре иҗат иткән шигырьләр сөйләп, рәхәтләнеп ял иттеләр. Лагерь флагы балаларга хәерле яллар теләп җелферди.

Ял һәм хезмәт лагеры да матур гына башланып китте. Балалар мәктәп биләмәсендәге төрле эшләрне башкаралар, бүген отряд  газетасын чыгардылар, җырлар өйрәнделәр.

Бүген, Тимершык урта мәктәбендә, "Шатлык" ял һәм сәламәтләндерү лагеры эшли башлады. Лагерьда 50  бала,  ял итеп, сәламәтлекләрен ныгытачаклар. Лагерьның беренче көне  Балаларны яклау көненә туры килде. Балалар 4 отрядка берләштеләр, бүген җырлар өйрәнделәр, лагерьның ачылу тантанасына әзерләнделәр. Балаларга бик ошады.

Тимершык урта мәктәбендә "Пчелки" дип исемләнгән хезмәт һәм ял лагеры эшли башлады. балалар мәктәп биләмәсендә  булган эшләрне башкардылар, отряд газетасы чыгардылар. Өстәл уеныннан шахмат уйнау серләренә төшенделәр. балаларга лагерь бик ошады.

Бүген  Тимершык урта мәктәбендә ата-аналар җыелышы үткәрелде. Көн тәртибендә:

1.2014-2015 нче уку елы нәтиҗәләре.Уку елы дәвамында үткәрелгән  муниципаль контроль эшләргә анализ ясалды. 

2.Яңа уку елыннан яңа мәктәп формасын булдыру.

3. Җәйге ялларны файдалы итеп үткәрү. Ышаныч телефоны буенча мәгълүмат.

4.Төрлеләр.

Ата-аналар җыелышын мәктәп директоры И.Г.Дәүлиев алып барды.

Беренче көн тәртибе буенча укыту эшләре буенча директор урынбасары Г.Җ.Фазылова чыгыш ясады. Ул 2014-2015 нче уку елына һәм  уку елы дәвамында үткәрелгән муниципаль контроль эшләргә җентекле анализ ясады, анализ слайдларда яктыртылды. Икенче көн тәртибе буенча сүз мәктәп формасы турында барды, слайдларда чагылдырып, Илгизәр Габделахатович  яңа уку елыннан яңа форма турында аңлатты.  Өченче көн тәртибе буенча тәрбия эшләре буенча директор урынбасары Х.С.Нәҗипова сөйләде. Ул җәйге яллар турында әйтеп узды. Шулай ук ышаныч телефоны турында сөйләде, чыгыш презентация белән үрелеп алып  барылды. Җыелыш сыйныфларда дәвам итте. Җәйге чорда  балалар өчен җаваплылык ата-аналар өстенә  йөкләнүе ассызыкланды. Җыелышта  Тимершык авылы җирлеге башлыгы Н.С.Вафина һәм район мәгариф бүлеге идарәсе психологы  А.И.Гыймадиева катнашты. Җыелыш нәтиҗәле үтте.