Бүген беренче чирекнең соңгы уку көне.Тәрбия эшләре буенча директор урынбасары Әхмәтшина Р.И. гомуми линейкада укучыларны көзге каникул планы һәм куркынычсызлык кагыйдәләре белән таныштырды,беренче чиректә эшләнгән эшләргә йомгак ясады,укучыларга күңелле яллар теләде. 

Бүген мәктәп күләмендә "Бөтерчек белән Мәтәлчек Сөмбеләдә кунакта" дип аталган зур кичә-тамаша булып узды. Кичә өчен мәктәп балалар Думасына кергән сыйныфлар көзге муллыктан күргәзмә-өстәл әзерләделәр, барлык фантазияләрен җигеп көзге яфраклардан букет эшләделәр. Тамаша барышында Бөтерчек, Мәтәлчек һәм Әтәч көзге байлыкка таң калып, Сөмбеләдә кунакта булдылар. Кичәнең икенче өлеше чәй эчүләр һәм биюләр белән дәвам итте.

Бүген Сабада Балалар иҗат үзәгендә Татарстанның Габдулла Тукай исемендәге Дәүләт бүләге иясе,шагыйрь Илфак Мирза улы Ибраһимов белән очрашу булды. Очрашуга татар теле һәм әдәбияты, тарих укытучылары, авыл һәм мәктәп китапханәчеләре, укучылар чакырылган иде. Шагыйрь үзенең фәлсәфи шигырьләре белән таныштырды, сорауларга җавап бирде. Шулай ук 2012 елда дөнья күргән “Чын мирас” журналын тәкъдим итү дә булды. Баш мөхәррир урынбасары Рамил Ханнанов, тарих бүлеге мөхәррире Ленар Гобәйдуллин журналның эчтәлеге турында сөйләделәр, аның укытучылар, укучылар өчен бик кирәкле булуын расладылар. Очрашу бик кызыклы, файдалы узды.

Безнең мәктәптә укучылар Думасы күп төрле чараларны оештырып йөриләр."Китапка икенче тормыш бүләк ит акциясендә" планлаштырылган чараларны үткәрүдә актив катнаштылар. Бу атнада алар мәктәп күләмендә үтәчәк "Сөмбелә" бәйрәменә әзерлек алып баралар.

Район һәм Республика күләмендә көзге ярминкәләр гөрли башлады. Бу шимбәдә район узәгендә үткән ярминкәдә безнең мәктәп тә катнашты. Мәктәп бакчасында үскән уңыш, укучыларның кул эшләре сатылды. Саба халкы рәхмәтле булып калды.

Кичә, 23 октябрь көнне,  "Бәхетле балачак" бию коллективына йөрүче иң  актив укучылар районыбызның мәдәният йортында "Агыйдел" ансамбле чыгышын карадылар. Укучыларга концерт бик ошады, алар  канәгать калды. Концертны оештыручыларга бик зур рәхмәт!

Конституциянең 20 еллыгы уңаеннан Татарстан, Россия символикаларын ясауга конкурс булып узды. Иң яхшы эшләр районга җибәрелде.

"Китапка икенче тормыш бүләк ит!" акциясе дәвам итә. Бүген Солтанова  Рәфисә Фуатовна җитәкчелегендә 1 -8 сыйныфлар  арасында "Китап -  белем чишмәсе" дип исемләнгән рәсемнәр конкурсы булып узды.Җиңүчеләр дип:7 нче сыйныф укучысы Харисова Э.,  6 нчы сыйныф укучысы Габдрахманова С. һәм Назмиев Р. лар табылды.

Бүген мәктәбебездә Корбан ашы булып  узды. Әлеге Корбан ашына авылыбыз абыстае Әминә апа чакырылды. Әминә абыстай үзенең вәгазендә балаларны шәфкатьле, миһербанлы булырга өндәде. Корбан ашы үзенең әхлакый тәрбия бирү ягыннан отышлы булды. Корбан ашлары мөбәрәк булсын!