Кушлавыч авыл клубында "Экстремизм - киләчәксез, киләчәк - экстремизмсыз" дип аталган ток-шоу үткәрелде. Чара башланыр алдыннан "Ә бездә экстремизм, террорчылык күзәтеләме?" дигән сорауга мөрәҗәгать иттек. Ток-шоу барышында укучылар шушы сорауга җавап табарга тырыштылар...
    ..."Бездә экстремизмга урын юк. Без, төрле милләт балалары, бер-беребез белән дус-тату яшибез, гореф-гадәтләребезне хөрмәт итәбез. Дуслык-татулык - иң зур байлык" дигән нәтиҗә ясадылар ток-шоуда катнашучы балалар...

Кушлавыч авыл клубында бөек татар шагыйре Г.Тукайның тормыш юлына һәм иҗатына багышланган "Каргышлы балачак" фильмы күрсәтелде. Фильмның режиссёры Ә.Зарипов.
Тукавларның Кушлавычтагы музей-йорты җитәкчесе Ләйлә Мөхәммәтшина һәм клуб мөдире Фәния Хәнәфиева тамашачылар, бигрәк тә яшь тамашачылар өчен фильмның герое һәм төшерелү тарихы турында сөйләделәр... Фильмның күп өлешләре авылыбызда төшерелгән булуы кайбер тамашачыларга үзләрен күреп яшь чакларын искә төшерергә мәҗбүр итте.

"Ак каен" мәктәп яны лагерыбызда бүген махсус табигать матурлыгына багышланган тема өстенлек алды. Көн барышында укучыларыбыз табигатькә сәяхәт кылып чәчкә-үләннәрдән букет һәм тәкыяләр дә әзерләргә өйрәнделәр :)

Бүген "Ак каен" мәктәп яны лагерыбызда "Диңгезчеләр көне" үтте. Викториналар, җыр-бию осталыгын күрсәтү чыгышлары һәм спорт ярышлары да әлеге тематика белән бәйле иде. Укучылар үзләре өчен яңа ачышлар ясап бик күп өстәмә мәгълүмат та ала алдылар, күңелле итеп ял иттеләр. Бу көнне аларга иң ошаганы рәсем ясау конкурчы, бигрәк тә күз бәйләп диңгез корабы ясау булды...

Мәктәп яны лагерыбыз тулы көченә эшли. Балалар әйдәманнары белән берлектә төрле ярыш-конкурсларда көч сынашалар, үзләренең сәнгатьтә осталыкларын күрсәтәләр. Кыскасы һәркемгә үз үзенчәлеген ачып күрсәтә алу мөмкинлеге бирелгән...

    Мәктәбебездә "Соңгы кыңгырау" бәйрәме бик матур үтте. Һәркем өчен дулкынландыргыч бу чарага кунаклар да күп килде. Күңелле дә, бераз моңсу да әлеге бәйрәм иң якты теләкләр, матур җыр һәм биюләр белән үрелеп барды...

    Быелгы чыгарылыш укучыларыбызга иң изге теләкләребезне юллап калабыз! Имтиханнарыгызда уңышлар, киләчәк тормышыгызда ак бәхетләр юлдаш булсын сезгә!..

    Республикабыз турында бик матур видеоролик әзерләнгән. Татарстан Республикасы – Рәсәй Федерациясендә икътисад ягыннан иң алдынгы регионнардан берсе. Бай тарих һәм мәдәният, ямьле табигать күренешләре, бөек Идел елгасысың матурлыгы һәм ял өчен күп мөмкинликләр республикабызны Бөтендөньядан туристлар өчен кызыктыргыч ясый, диелә роликта. Татарстан башкаласы, Казан рәсми «Рәсәйнең өченче башкаласы» исемен йөртә. Казан алдынгы отелләр, ресторанлар һәм күңел ачу комплекслары, бөтендөнья музыкаль фестивалләр һәм зур спорт ярышлары шәһәре...

    Кыскасы бик яхшы видеоэкскурсия.

 1994 елдан бирле Халыкара гаилә көне билгеләп үтелә. Гаилә – тормышыбызның нигезе, дәүләтнең киләчәге. Гаилә ул-җылы учак. Шушы учак мәңге сүнмәсен, сүрелмәсен. Аның янына һәр гаилә әгъзасы теләп җыелсын. Әти-әни аның тоткасы булса, балалар гаилә көзгесе. Әниләр гаилә иминлеге сагында торсалар, гаиләнең ныклыгы, тормыш хәле, йорт-җирнең төзеклеге, бөтенлеге әтиләр кулында.

      Габдулла Тукайның иҗатында да, бигрәк тә балалар өчен язган шигырьләрендә гаилә, балачак темасы киң чагылыш таба. Еш кына, әйтик “Безнең гаилә” шигырендә, бәхетле гаиләнең идеаль үрнәген тудыру омтылышын күрергә мөмкин. Ә бәлки бу шагыйрьнең үзе мәхрүм ителгән якты балачак турында сагынулары булгандыр.

       Авылыбыздагы Тукаевлар гаиләсенең музей-йортының хатын-кызлар ягы традицион авыл өен гәүдәләндерә. Монда ана дөньясы: бик күп әйберләр уңган һәм тырыш хатын-кыз куллары белән эшләнгән. Бүлмәнең бер почмагында зур мич урнашкан, ул чын мәгънәсендә гаилә учагы җылысын биреп тора. Аның янәшәсендәге витринада шагыйрьнең әнисенең шәхси әйберләре куелган.

      Халыкара гаилә көнендә  без шушы залда “Әбием сандыгы” дигән кичә үткәрдек. Кичәбезгә авылыбызның ак әбиен Вәлиева Мәрхәмбикә апаны чакырдык. Мәрхәмбикә апа мондый кичәләрдә бик актив катнаша, “Бүләк итү” көннәрендә музейга әйберләр тапшыра. Моннан берничә еллар элек режиссерлар Әзһәр Хөсәенов һәм Харис Фәхретдиновлар шушы залда “Тирән тамырлар” фильмы өчен “куркулык койдыру” йоласын төшерделәр. Әби ролен Мәрхәмбикә апа бик теләп башкарды.

       Кичәгә үзешчән сәнгатьтә актив катнашучы укучы кызларыбыз милли киемнәрдән килделәр. Кеше гомере аккан сулар кебек бик тиз узып китә. Аның ничек узуы һәркемнең үзенә бәйле. Мәктәп еллары да мәңгелек түгел. Ныклы гаиләдә әби-бабаларыбыз булганда гына  баларның бәхетле булулары турында клуб мөдире, үзе дә өч бала әбисе Хәнәфиева Фәния сөйләде. Заманында ул чүәкләр чиккән кеше. Кичә барышында Мәрхәмбикә апа кулына тастымалга төрелгән Коръән китабын алды: “Балалар, бу әби-бабаларыбыздан калган изге китап. Әби-бабаларыбыз аны укып, тәсбих тартып, балаларына, оныкларына, якыннарына изге теләкләрен юллаганнар. Бу изге китап чисталыкка, пакълеккә, изге күңелле булырга өйрәткән, буыннан-буынга күчеп килгән”. Аннан соң кызларыбызны үзенең бирнә сандыгындагы чигелгән кул эшләнмәләре белән таныштырды, соңыннан ул аларны музейга бүләк итте.Кул эшләре арасында улы Рәис абыйның бик матур итеп чигелгән тастымалы да бар иде.  Шушы тастымалы белән улын тирбәтеп үстергән бишек янына килеп хатирәләрен яңартты. ( Залдагы кабык бишекне дә Мәрхәмбикә апа бүләк иткән иде). “Әй, сөлге, сөлгекәй, гомер юлдашым минем, әйдә әле сөйләшик, тавыш-тынсыз гына бер серләшик. Шатлыкны да, авырлыкны да бергә кичердек. Матурлык китә икән ул, сөлгеләр булып тарала икән”.

     “Элегрәк күпләп кулъяулыгы чигә идек. Сабантуйга бүләкләр җыйганда да чиккән кулъяулыгы бирә идек. Ул булмаса китмиләр иде, чыгарып биргәнче көтеп торалар иде”,-дип искә алды Мәрхәмбикә апа...

    9 май, Бөек Җиңү көне Арча районында бүтән еллардагыча бик матур үтте. Мәктәбебездән 3 укучы районкүләм "Бөек Җиңүгә 70 бишле"  конкурсы кысаларында Җиңү парадында да катнаштылар. Иң башта укучыларны бүләкләү тантанасы булды, аннан соң барыбыз да бергәләшеп парадта катнаштык.

    Быел да әлеге чара бик зур массачыл төс алды, катнашучылар ниләр генә әзерләмәгән парадка: гади автомобильләрдән әзерләнгән хәрби техника үрнәкләре дисеңме, тарихи машиналар, самолётлар... Кыскасы бик матур узды. Укучыларыбыз да беренчеләрдән булып узгач рәхәтләнеп Җиңү парадын карап ял итә алдылар, мәктәп музейлары әзерләгән күргәзмәләрдә катнаштылар...