Бүген мәктәбебез укытучылары Җәләлиев И.И., Гыйбадуллин И.З. ГТО нормалары тапшырырга киттеләр. Аларга уңышлар телибез.

Район буенча "Ел вожатые"конкурсы игълан ителде. Безнең мәктәпнең укучылар активы 9 нчы класс укучысы Хәсәнова Зөлфияне тәкъдим итте. Зөлфия шушы көннәрдә партфолио төзү өстендә эшли. Катнашучының визит карточкасын 5, 6 нчы класс укучылары хәзерләячәк. 

Бүген 5-7 нче класс укучылары белән спортзалда "Күңелле стартлар" ярышы  оештырылды. Ярышта һәр класстан 3 егет  һәм 1 кыз катнашты. Ярыш 8 уеннан  торды. Әлеге чараны бәяләүгә югары класс укучылары җәлеп ителде. Спорт ярышын педагог-оештыручы Муллагалиева Г.Н.,  физик тәрбия укытучысы Җәләлиев И.И. алып барды.

Гаилә ул- иң олы таянычыбыз, иң ышанычлы сыеныр урыныбыз.”Әти - әни аның тоткасы булса , балалар – гаиләнең көзгесе . Әгәр тотка купмасын , көзге ватылмасын дисәң, бер- берегезне саклап , рәнҗетми , хөрмәт белән яшәргә кирәк”,-дигән фикер бик күптәннән яши.

5 нче март көнне  5-7 нче класс укучыларының кызлары арасында "Кызларның уңганнары, булганнары" исемле конкурс узды. Исеменнән күренгәнчә,  бу конкурста кызлар үз осталыкларын күрсәтеп бирергә тиеш иделәр. Конкурста Сабирова Азалия, Арсаева Зөһрә, Сөнгатева Диләрә, Барыева Эльвина, Зиннәтуллина Динә, Арсаева Чулпан көч сынашты. Чараны педагог-оештыручы Муллагалиева Г.Н. алып барды. Конкурс 8 этапта үтте:шигърият дөньясында,уңган хуҗабикәләр, кайсы халык ничек киенә,хатын-кызларны котлыйбыз(сәнгатьле сөйләм), җырны дәвам итәбез,ребуслар чишәбез,мәкаль әйтеш,чәчләрнең дә үз матурлыгы. Ярыш булгач, җиңүче дә, җиңелүчеләр дә бар. Хөкемдарлар-Гаффарова Д.В., Йосыпова Р.К.-бик гадел булдылар. Зур көрәштән соң 6 нчы класс укучысы Зиннәтуллина Динә , 20 очко җыеп "иң булган һәм иң уңган кыз" исеменә лаек булды. Катнашучыларның барысына да кечкенә генә бүләкләр тапшырылды. 

Бүген башлангыч класс укучылары һәм аларның әниләре, әбиләре катнашында зур бәйрәм алды чарасы үтте. Укучылар, якыннарын котлап, шигырьләр сөйләделәр, җырлар башкардылар. Әниләр, әбиләр дә төрле кызыклы уеннарда катнашып, күңелләрен күтәреп алдылар. Үз балаларының кулларыннан ясалган бүләкләрне алу зур шатлык булды.Бәйрәмне оештырган башлангыч методик оешмасына рәхмәтебезне җиткерәбез

Тиздән 8 нче март - хатын-кызлар бәйрәме. Балалар әбиләрне, әниләрне, апа-сеңелләрне котларга ашыгалар. Башлангыч сыйныф укучылары елдагыча, үзенчәлекле итеп, кулдан матур  әйберләр ясыйлар.  Йөзләрдә - елмаю, ә күңелдә - канәгатьлек хисе. Ничек шулай булмасын?.. Иң якын кешеләреңне шатландыру-үзе зур бәхет!

Бүген мәктәптә түгәрәкләр көне. Укучылар "Туризм", "Кул эшләре", "Пневматик мылтыктан ату" тәгәрәкләренә йөриләр. Югары класс укучылары имтиханнарга хәзерләнү буенча фән укытучыларыннан  консультацияләр алалар.  Ә өлгеррәк укучылар Сәнгать мәктәбе филиалы түрәкләрендә шөгыльләнергә дә вакыт табалар 

"Патриотик тәрбия" бирү айлыгына йомгак ясар вакыт та җитте. Бүген 8-11 нче класс укучылары катнашында биатлон ярышы оештырылды.  Ярыш буенча чыгарылган нәтиҗәләр киләсе укучылар линейкасында игълан ителәчәк.