Бүген мәктәп укучылары Бөек Җиңүнең 79 еллыгына багышлап җирлектә оештырылган митингта катнаштылар.

Җиңү көне
Батыр солдат булып таш һәйкәлләр
Баскан бүген мәйдан түренә.
Җиңү көне килеп җиткән саен,
Күпме күз яшьләре түгелә.
Җиңү көне җиңел килмәде ул,
Ятып калды илнең уллары.
Алар хөрмәтенә байракларны
Күтәрәбез бүген югары.
Йөзләр, меңнәр, миллионнар булып,
Утка кергән Ватан солдаты.
Исемнәре җырга әйләнгән бит
Җиңү алып кайткан солдатның.
Ветераннар сафын барлый яшьләр,
Алмаш килә илне яратып.
Җиңү көнен каршы алабыз без,
Җиңү маршын горур яңгыратып
                         Гөлнур АЙЗАТ

9 класс укучылары белән Г.К. Муллагалиева  "Мәңгелек хәтер" темасына класс сәгате үткәрде.

Бүген Актанышта яшь юл хәрәкәте инспекторларының «Куркынычсыз тәгәрмәч» конкурсы узды. Конкурста мәктәпнең «Бөркет» командасы җиңүче булды һәм кубок, велосипед белән бүләкләнде. Афәрин! Котлыйбыз! Команда Алабугада 21-24 май көннәрендә узачак республика конкурсында районыбыз данын яклаячак. Балаларга уңышлар теләп калабыз!

5 май көнне Баулы шәһәрендә Бөек Җиңунең 79 еллыгына багышланган республикакүләм көрәш ярышы узды. Көрәшче егетләребез әлеге турнирда призлы урыннар яулауга ирештеләр:

Рузибоев Умар - 2 урын;
Хөснетдинов Рөстәм - 2 урын;
Хаҗипов Зиннур - 3 урын.
Тренерлары - Садри Әнис Мөхәммәтнур улы.  Афәрин! Котлыйбыз! 

 Бөек Җиңүнең 79 еллыгы уңаеннан китапханәдә "Батырлар даны мәңгелек" китап күргәзмәсе укучыларга тәкъдим ителә. Рәхим итегез!

Татарстан Республикасы мәгариф һәм фән министрлыгы тарафыннан оештырылган Тукай мирасын өйрәнүгә багышланган "Без - Тукайлы халык" XIII Республикакүләм Габдулла Тукай укуларының "Якташыбыз - милләт горурлыгы" секциясендә актив катнашкан Пучы урта гомуми белем бирү мәктәбенең 10 нчы класс укучылары: Имамова Энҗе һәм Гилмуллина Әдилә Дипломга лаек булдылар. Җитәкчеләре Муллагалиева Гөлназ Кашаф кызы. 

26 апрель көнне 8 а, 8 б, 9, 10 классларда татар теле һәм әдәбияты укытучысы Гөлназ Муллагалиева җитәкчелегендә Тукай туган көн уңаеннан шагыйрьнең тормыш юлы һәм иҗаты буенча әдәби викториналар үткәрелде. Фотода - җиңүче укучылар. Афәрин! 

Кичә, ягъни 26 апрель көнне, Пучы урта гомуми белем бирү мәктәбенең 8-11 класс укучылары  "Җиңү диктанты" акциясенә кушылдылар.. 

25 нче апрель көнне туган тел укытучысы Гөлназ Муллагалиева һәм укучысы Ләйлә Нуриева Актаныш радиосында турыдан-туры эфирга чакырылып, 1 сәгать дәвамында аралашып кайттылар.
Әлеге тапшыру кабат радио дулкыннарында 29.04 көнне 19.00 сәгатьтә яңгыраячак. Тыңларга онытмагыз!