Бүген безнең бакчабызның икенче кечкенәләр Б төркемендә тәрбияче Гараева Лилия Марат кызы "Саф һавада йөрү - сәламәтлек өчен файдалы" темасына төркем эчендә балаларга әңгәмә алып барды. Бик кызыклы мәгълуматлар сөйләнде, күрсәтелде. Әңгәмәдән соң балалар белән саф һавада төрле уеннар уйнадылар, тауда шудылар. Балалар уеннарда бик теләп катнаштылар. Балалар кыш көне урамга чыкканда җылы итеп киенергә һәм сак булырга кирәклеген төшенделәр.

Бүген икенче кечкенәләр В төркеме балалары белән "Сәламәтлекне ничек сакларга?" дигән темага әңгәмә уздырдык. Алар әлеге сорауга кагылышлы бик күп кызыклы җаваплар бирделәр. Әңгәмәдән соң туп белән төрле уеннар уйнадык, төп хәрәкәтләрне үстерү буенча күнегүләр башкарылды. Уеннарның максаты: җитезлек, хәрәкәт активлыкларын үстерү, уен кагыйдәләрен төгәл сакларга күнектерү. 

"Агыйдел" җыр һәм биюансамбле оешуга 50 ел уңаеннен Актаныш районы Башлыгы призына район биючеләр бәйгесендә катнашкан биюче кызларыбыз Гараева Л.М., Халилова А.А., Шарапова Ф.Ф., Мазнавиева М.Р., Сабирова Э.Р., Газизова Э.Д,, Хисматуллина Л.Ф., Аминова Р.Р, Фардиева Р.Х., Гарифянова Р.З.лар катнашып мәдәният сарае сәхнәсендә уңышлы чыгыш ясап диплом белән бүләкләнделәр. Кызларыбызга киләчәктә дә уңышлар теләп калабыз. Афәрин!

Итек, читек, энә, без.

матур итеп тегәбез.

Бүген зурлар төркеме Сөйләм телен үстерү шөгылендә "Милли киемнәр" дигән тема буенча әңгәмә үткәрделәр. Тәрбияче апалары белән бергәләшеп милли киемле курчакларны карадылар. "Бу нинди бизәк?", "Салфетканы бизә", "Бизәкне дәвам ит" дигән дидактик уеннар уйнадылар. Бергәләшеп Ләбиб Леронның "Татар баласы" шигырен өйрәнделәр.

Бүген бакчабызда "Балаларның сөйләмен үстерү буенча эшчәнлекне камилләштерүдә УМК материалларын куллану" дигән темага киңәшмә булып үтте. Көн тәртибендә сөйләм телен үстерү буенча ачык шөгыльләр карап анализланды. Сюжетлы-рольле уеннар буенча төркемншрдә конкурс игълан ителгән иде. Нәтиҗәләр ясалды, урыннар билгеләнде. Киңәшмә барышында Әгъләмова Миләүшә Васил кызы чыгышы тыңланды. Ул чыгышында үзенең эш тәҗрибәсе белән уртаклашты. Педсовет ахырында тәрбиячеләр үзләрен кызыксындырган күп кенә сорауларына җаваплар алдылар. 

Бүген икенче кечкенәләр Б төркеме белән без ап-ак карны күзәттек. Балалар карны тотып та, әвәләп тә карадылар. Тәрбияче апалары белән бергә кардан төрледән-төрле кызыклы кар йомарламнары да ясап карадылар. 

Бүген кышның беренче көне булуга карамастан, һаман көз үзенең хакимлеген югалтмый. Кичәге аяз күк йөзен янә болытлар каплады, янә яңгыр ява... Шуның нәтиҗәсендә аяк асты тоташ бозлавыкка әйләнде. Балаларга һәм өлкән яшьтәгеләргә йөрү шактый гына авырлашты. Шул сәбәпле, куркынычсызлык кагыйдәләрен ныгыту максатыннан, мәктәпкә әзерлек төркеме балалары белән "Сак булыгыз - бозлавык!" темасы астында әңгәмәләр үткәрелде. 

Әни - һәр бала өчен кадерле һәм иң кирәкле кеше. Безнең балалар бакчасында да "Әниләр көне" зурлап билгеләп үтелде. 26 ноябрь көнне уртанчылар  төркеме балалары әниләре өчен бик күңелле бәйрәм  әзерләделәр. Әлеге бәйрәмнән әниләр дә, балалар да канәгать калдылар.

Бүген безнең бакчабызның икенче кечкенәләр Б төркемендә "Әниләр бәйрәме"  күңел ачу чарасы узды. Бәйрәмебезгә әниләр дә чакырулы иде, балалары белән уеннарда бик теләп катнаштылар. Әниләр үзләренең уңганлыкларын, җитезлекләрен сынап карадылар. Балалар ятлаган шигырьләрен, җырларын сөйләделәр, җырладылар, биеделәр. "Алтын куллы әнием" кул эшләре күргәзмәсендә катнашкан барлык әниләргә дә диплом, рәхмәт хатлары тапшырдык. Бәйрәмебез бик күңеллее узды. Балалар әниләренә бүләкләрен тапшырдылар. 

Бүген зурлар төркемендә "Кадерле әниләребез" дип исемләнгән бәйрәм кичәсе булды. Балалар бу бәйрәмгә зур әзерлек белән килделәр. Әниләргә "Чакыру кзгазьлзре" җибәрделәр, бүләкләр әзерләделәр. Кичәне үзләре үк алып баручылар булып башлап җибәрделәр. Бәйрәмгә Шаян клоун да килгәч кичә тагын да шаян төс алды. Әниләр Шаян клоун белән "Бишек җырлары" җырладылар, бергәләшеп "футбол"  уйнадылар, ә балалар чәчәкләр җыйдылар. Кичәдән әниләр белән балалар "паравозга" утырып төркемгә кайтып киттеләр. Бәйрәмнең икенче өлеше чәй табыны янына дәвам итте.