Бүген зурлар һәм мәктәпкә әзерлек төркеме балалары экскурсиядә булдылар. Тугн ягыбыз табигате турында белемнәрен камилләштереп, төрле спорт уеннары уйнап күңелле ял иттеләр. 

Балалар бакчасы мәктәп белән һәрдаим тыгыз элемтәдә эшли. Әле бүген дә бакчабызның мәктәпкә әзерлек төркеме балалары 1нче санлы Актаныш урта мәктәбендә кунакта булдылар. Бик тиздән үзләренә белем бирәчәк укытучылар белән таныштылар, үзләре үк укыячак сыйныф бүлмәләрен карадылар. Балалар мәктәпне яратып, укырга бару теләге белән әйләнеп кайттылар.

Матурлыкны барыбыз да яратабыз. Һәркем үзенең әйләнә-тирәсен, яшәгән, эшләгән мохитен матурлау өчен тырыша. Бакчабыз тәрбиячеләре дә мондый эштән читтә калмыйлар. Атна дәвамында хезмәткәрләр бакча территориясен яшелләндерү, чәчәк утырту эшләре белән мәш килделәр.

9 Май - 4 ел буена сугыш газаплары кичергән илебезгә тынычлык алып килгән беренче көн! Һәр ел саен без бу көнне шатланып һәм моңаеп, зур дулкынлану белән көтәбез. Быел бакчабыз тәрбиячеләре һәм балалар да "Үлемсез полк" акциясенә теләп әзерләнделәр. Алар үзләренең сугышта катнашкан туганнарының, бабаларының фотоларын тотып барып, аларны кабат хөрмәт белән искә алдылар.

1 Май - һәммәбез көтеп алган, иң яраткан бәйрәмнәребезнең берсе. Халык теленә "карга боткасы" дип кергән "Яз һәм хезмәт" бәйрәмен күптәннән бәйрәм итәләр. Без дә барлык коллегаларны, балаларны, әти-әниләрне бу күркәм бәйрәм белән чын күңелдән котлыйбыз.

Беренче май килде җиргә,

Якты нурга күмелеп.

Төрле-төскә керде җиһан,

Матурлыкка күмелеп.

Җырлап килде яз бәйрәме,

Яңа хисләр уятып.

Дулкынланып типте йөрәк,

Өмет белән куанып.

Бүген Актанышыбызда район үзәге үзешчән сәнгать коллективларының йомгаклау концерты булып узды. Безнең "Умырзая" балалар бакчасы беренчелекне бирмәде.

Бүген татар әдәбияты, дөресрәге киң җәмәгатьчелек бөек шагыйребез Габдула Тукайның туган көнен - 130 еллыгын билгеләп үтә. Әлеге бәйрәм уңаеннан бакчабызда ай дәвамында төрле чаралар, конкурс-викториналар үтә торды. Ә бүген барысына йомгак ясап "Тукай безнең күңелләрдә..." кичәсе үтте. Балаларыбыз тагын бер кат Габдулла Тукайның шигырь-әкиятләрен искә төшерделәр, аның әсәрләре буенча язылган мультфильмнар карадылар.

20 - 22нче апрель көннәрендә "Ел тәрбиячесе - 2016" республика конкурсының йомгаклау туры булып үтте. Казан педагогика көллиятендә конкурсның зона этапларында җиңү яулаган 40 тәрбияче көч сынашты. Алар үзләренең һөнәри осталыкларын, авторлык технологияләрен һәм иҗади эш алымнарын кулланып "Мастер-класс" тәкъдим иттеләр. Жюри тарафыннан иң күп бәя алган 15 тәрбияче финалга үтеп, "Түгәрәк өстәл" артында әңгәгмә корып беренчелек өчен көрәште. Бакчабыз тәрбиячесе Лилия Фәрит кызы Хисматуллиина лауреатлар исемлегендә. Аны бу җиңүе белән чын күңелдән котлыйбыз!!! Киләчәктә дә зур уңышлар, һөнәри үрләр телибез.

19 апрель көнне мәктәпкә әзерлек төркемендә "Ачык ишекләр көне" үткәрелде. Бу чарага әти-әниләр һәм башлангыч класс укытучылары чакырылды. Тәрбиячеләр М.Р.Мәзнәвиева һәм Р.Ф.Хакимова математика, грамотага өйрәтү буенча шөгыльләр күрсәттеләр. Г.Тукайның тууына 130 ел тулу уңаеннан шагыйрьнең әкиятләре, шигырьләре искә төшерелде. Килгән кунаклар, ата-аналар балаларның белем дәрәҗәсен югары бәяләделәр.

19 апрель көнне җир шарының күп илләрендә бик матур бәйрәм - Умырзая чәчәге көне үтә. Бәйрәм үзенең ерак тарихы белән Англиягә барып тоташа. Анда әлеге чәчәкләрне "Өмет чәчәкләре" дип тә атыйлар. Бу бер дә юкка түгел. Кышкы зәмһәрир салкыннардан соң беренче булып күзләрен ачкан умырзаялар кешеләр күңелендә матурлык, яшәүгә өмет уяталар. Татарстанның Кызыл китабына кертелгән әлеге гүзәл чәчәкләрне без дә сакларга тиешбез. Аларны өзмик, матурлыгына читтән генә сокланыйк.