Бакчабыз тәрбиячеләре Шарапова Ф.Ф., Мазнавиева М.Р., Харисова Л.М., Исламова З.З 6нчы санлы балалар бакчасында "Мәктәпкәчә яшьтәге балаларның сөйләм күнекмәләрен үстерүгә заманча якын килү" темасы астында үткән тәрбиячеләрнең район методик берләшмәсе утырышында катнашып, тәҗрибә уртаклашып кайттылар.

Җир шарында "Кызыл Калфак" әкиятен белмәгән кеше юктыр ул. Ә менә шушы көннәрдә әкият кызының туган көне икәнен күпләр белмидер әле. Ә безнең бакча балалары беләләр. Алар Кызыл Калфакны котлап оештырылган интернет-конкурста катнаштылар. Шарипов Раяз (тәрбиячесе Саетова Н.Н.), Сабирова Айзирәк (Исламова З.З.), Набиев Исламның (Газизова Э.Д.) рәсемнәрен, Гимазов Илнурның (Харисова Л.М,) әнисе белән берлектә эшләгән Кызыл Калфак курчагын жюри уңышлы дип табып сертификат белән бүләкләде. Бакчабыз балаларын зур уңышлары белән, ә инде Кызыл Калфакны туган көне белән чын күңелдән котлыйбыз!

Бүген бакчабыз коллективында зур бәйрәм - тәрбияче Миләүшә Васил кызы икенче кабат әни булып, тормыш иптәше Ленар белән тагын бер малай алып кайттылар. Әгъләмовлар гаиләсен зур шатлыклары белән чын күңелдән бакча коллективы да тәбрик итә, сабыйның сәламәт,акыллы, иманлы булып, әти-әнисенең пар канаты астында үсүен теләп кала.

Сабыегыз тормыш яме булып,

Ай үсәсен үссен көнендә.

Нәселегезнең гореф-гадәтләрен

Саклап барсын алгы көннәргә.

Ай нурлары булса кичтән,

Таң нурыдай булсын иртәсе.

Сездә булган барлык яхшылыкны,

Буыннарга аның илтәсе.

Бүген хөрмәтле хезмәттәшебез Нәсимә Гарифзяновнаның гомер бәйрәме. Аны чын күңелдән 55 яшь тулган көне белән котлыйбыз! Аңа нык сәламәтлек, күңел тынычлыгы, кайгы-хәсрәтсез көннәр, якыннарының, туганнарының күңел җылысын тоеп, бәхетле озын гомер кичерүен теләп калабыз!!

55 яшь - әле матур гомер,

Борчылма син килгән картлыкка.

Исәнлекне күбрәк бирсен Ходай,

Алгы гомер үтсен шатлыкта!!! 

Бакчабызда язның беренче бәйрәме 8 Март-Халыкара Хатын-кызлар көне уңаеннан бәйрәм иртәләре башланып китте. Балалар үзләренең матур шигырьләре, җырлары, биюләре белән әниләрен, әбиләрен, дәү әниләрен, апаларын, сеңелләрен котлыйлар. Без дә аларның котлауларына чын күңелдән кушылабыз - ныклы сәламәтлек, бәхет, һәр башлаган эшегездә зур уңышлар теләп калабыз.

Умырзая сафлык бүләк итсен!

Яз кояшы сипсен җылылык!

Март җилләре өмет бүләк итсен

Күңелегезне назлап торырлык!

БӘЙРӘМ БЕЛӘН!!!

Ниһаять, күп кенә сайлап алу турлары үтеп, "Йолдызлык - 2016" эстрада сәнгате фестиваленең район этабы тәмамланды. Район мәдәният йорты сәхнәсе кечкенә йолдызчыклардан балкып торды. Ә бакчабыз йолдызчыклары үзләренең югары әзерлекләре, сәхнәдә үзләрен иркен тотулары, чын артистлар кебек оста чыгыш ясаулары белән аерылып тордылар. Аларның тырышлыгын жюри да югары бәяләде. Нәни йолдызчыкларыбызны чын күңелдән әлеге зур уңышлары белән тәбрик итәбез! 

Бүген бөтендөнья песиләр көне. Песи - балаларның иң яраткан йорт хайваннарының берсе. Шуңа күрә бу кызыклы датаны без читләп үтә алмадык. Кечкенәләр төркеме балалары белән мәчеләр турында кызыклы шигырьләр укып, "Песи һәм тычканнар", "Ялкау мәче" кебек хәрәкәтле уеннар уйнадык. Ә зурлар һәм мәктәпкә әзерлек төркеме балалары белән песиләр тормышыннан күп кенә кызыклы мәгълуматлар турында сөйләшеп әңгәмәләр оештырдык.

Үзенең кар-бураннары, салкын көннәре белән ап-ак карлы кыш айлары үтеп тә китте. Кышның соңгы көнендә бу ел фасылы турында белгәннәрен гомумиләштерү максатыннан балалар белән тематик әңгәмәләр үткәрелде. Кыш ае, кышкы уеннар турында яттан өйрәнгән шигырьләр янә бер тапкыр хәтердә яңартылды.

Меңнәр авылы балалар бакчасы коллективы бүген район балалар бакчалары мөдирләрен "ФДББС шартларында УМК материаллары кулланып мәктәпкәчә яшьтәге балаларны грамотага өйрәтү"темасы астында узган киңәшмәгә җыйды. Мөдирләр һәм өлкән тәрбиячеләр балаларга тәрбия  һәм белем бирүдә алда торган проблемаларны уртага салып сөйләшеп фикер алыштылар.

Бүген 4нче балалар бакчасы базасында рус теле тәрбиячеләренең район методик берләшмәсенең чираттагы утырышы булып узды. "Рус халык мәдәнияты белән таныштыруда халык авыз иҗаты" темасы астында тәрбиячеләр эшчәнлекләр карап фикер алыштылар. Бакчабызның рус теле тәрбиячесе Сабирова Эльвира Рафис кызы да әлеге чарада катнашып үзенә бай мәгълумат туплап кайтты.