Әкият - мәктәпкәчә яшьтәге балалар өчен әхлак тәрбиясе бирүче төп чара. Балаларга "дуслык", "яхшылык", "дөреслек" төшенчәләрен беренчеләрдән булып аңлата, гомумтәрбиялелек сыйфатларын күтәрә һәм заман таләпләренә җавап бирүче шәхес тәрбияләргә булыша.

Бүген безнең балалар бакчасында "Икетеллелек атнасы" кысаларында "Әкияти викторина" булып узды. Викторинада мәктәпкә әзерлек төркеменең "Тапкырлар" командасы белән зурлар төркеменең "Көчлеләр" командалары ярышты.  Эльвира Рафисовна һәм Рәмзилә Фидәрисовна әзерлгән русча-татарча әкияти сорауларны балалар бик теләп "чиштеләр". Бары тик 1 бал артык җыеп "Тапкырлар" командасы 1 урын яулады. Ә зурлар төркеме балалары мәктәпкә барганчы әле бер ел эчендә тагын да тырышыбрак әзерләнергә сүз биреп викторинадан таралыштылар.

Февраль аеның 1 атнасы бакчабызда Икетеллелек атнасы буларак билгеләп үтелә. Бүген атналыкның беренче чарасы буларак  "Шигырь бәйрәме" үткәрелде. Зурлар төркеме балалары "Әнием" дип сөйләсәләр, аларга җавап итеп мәктәпкә әзерлек төркеме балалары "Мама моя" шигыре белән җавап кайтардылар. Рус теле тәрбиячесе Сабирова Эльвира Рафис кызы үткәргән әлеге чара балаларның рус теленә булган кызыксынуларын тагын да үстерде.

 Сезгә куйган концертларның

Бу бит түгел тәүгесе.

Бүген гади концерт түгел - 

Бу "Йолдызлык" бәйгесе!

Бүген бакчабызда "Йолдызлык - 2016" конкурсының сайлап алу туры үтте. Мәртәбәле жюри алдында бакчабыз балалары үзләрен бик иркен тотып, уңышлы гына чыгыш ясадылар. Бәйгенең алда үтәчәк этапларында да аларга уңышлар теләп калабыз!!!

Бүген 1нче санлы "Умырзая" балалар бакчасында "Традицион булмаган алымнар белән мәктәпкәчә яшьтәге балаларның иҗади сәнгать күнекмәләрен үстерү" темасы астында район тәрбиячеләренең методик берләшмә утырышы булып узды. Семинар кысаларында 2нче кечкенәләр төркемендә тәрбияче Гараева Алия Илгиз кызы рәсем эшчәнлеге, уртанчылар төркемендә Хисматуллина Лилия Фәрит кызы әвәләү эшчәнлеге, мәктәпкә әзерлек төркемендә Мазнавиева Миләүшә Роберт кызы рәсем эшчәнлеге күрсәттеләр. Яңа ысулларны бакчабыз балалары гына түгел, килгән тәрбиячеләр дә кызыксынып, өйрәнеп утырдылар. Салахова Эльвира Бәһрәм кызы үз тәҗрибәсенә таянып, бик эчтәлекле чыгыш ясады. Семинар дәвамында өйрәнгән алымнарны эштә куллану йөзеннән Сабирова Эльвира Рафис кызы мастер-класс тәкъдим итте. Килгән район тәрбиячеләре бүгенге утырыштан үзләренә бик бай мәгълумат туплап, яңа эш дәрте белән таралыштылар.

Беренче кечкенәләр төркемендә бүген бик күңелле булды.Кыш көнендә туган нәниләребезнең туган көннәрен билгеләп үттеләр. Аларны бергәләшеп туган көннәре белән котладылар, яратып уйный торган "Аккалач уенын " уйнадылар. Матур җырлар җырлап, биеп күңел ачтылар. Көн дәвамында балаларның шат авазы тынып тормады.

Бер-берегезне табып кавышкансыз, 
Икегез дә нинди сөйкемле! 
Күзгә-күз карашып елмаясыз, 
Бер гөл чәчәкләре шикелле! 

Бер-берегезгә ныклы терәк, 
Иптәш, сердәш булыгыз, 
Давыл-яңгырга бирешми 
Гел янәшә торыгыз! 
Котлы булсын туегыз!

Хөрмәтле хезмәттәшебез бүгенге истәлекле көн, яңа тормышка аяк баскан көнегез белән чын күңелдән тәбрик итәбез!Сезгә озын, тигез гомер, нык сәламәтлек, бәхетле тормыш, саф мәхәббәт телибез. Әти-әниләрегезне тигез күреп, дус-туганнарны сөендереп яшәгез. Никахыгыз ныклы, гаилә учагыгыз якты, пар балдакларыгыз гомерлек булсын.

Тышта әле бик салкын

Карлар ява буранлап.

Суган утырттык әле

Апа белән бергәләп.

Ышанмыйсыз, беләбез

Аптырыйсыз, күрәбез.

Яшел кыяклар үскәч

Сезгә хәбәр итәрбез.

диләр бакчабызның зурлар төркеме. Алар тәрбияче апалары Фәрсия Фәһим кызы белән бергәләп суган, сарымсак һәм укроп чәчеп яшел шытымнар чыкканын кызыксынып күзәтәләр.

Кыш көне урамда кошларга бик суык. Ләкин кошларга суык бик куркыныч түгел әле. Алар өчен иң кыены – кыш көне азык табу. Без уртанчылар төркеме балалары кошларга җимлекләр элеп, аларны көнбагыш, икмәк валчыклары белән сыйлыйбыз. Җимлеккә килгән кошларны күзәтүе бик күңелле. Чыпчыклар, песнәкләр рәхмәт әйтеп чыркылдашып җим чүплиләр.

Җимлек ясап бирде

Абыем Сәлим.

Шуңа хәзер кошлар өчен,

Җимнәр сибәм мин.

Бире килә күк күгәрчен,

Песнәк һәм чыпчык.

Җыелалар бер-бер артлы

Пырхылдап очып.

Мәзнәвиева Миләүшә Роберт кызы:

Без мәктәпкә әзерлек төркеме балалары шөгыльләрдән тыш вакытыбызны бик кызыклы һәм мавыктыргыч итеп үткәрергә тырышабыз. Бу көннәрдә бигрәктә кызыксынып рәсем серләренә төшенәбез. Бу очракта традицион булмаган ысул белән рәсем ясау бигрәк тә отышлы. 

Шарапова Фәрсия Фәһим кызы:

Йомшак карны алабыз,

Аннан шарлар ясыйбыз.

Кар атышып уйныйбыз,

Бик күңелле яшибез.

Бүген бакчабызда зурлар һәм мәктәпкә әзерлек төркемнәре "Күңелле стартлар" уздырдылар. Балалар чаңгыда да, чанада да төрле алымнарны кулланып ярыштылар. Түгәрәккә кар йомарламнары аттылар, кәшәкә белән туп тәгәрәтүдә көч сынаштылар.