Бүген 5А сыйныф укучылары, сыйныф җитәкчесе Рузилә Илдар кызы Гарипова белән, үзләренең "Ата-аналар - һөнәр илендә" проекты кысаларында, район мәдәният сараенда урнашкан үзәк китапханәгә экскурсиягә барды. Якташыбыз "Агыйдел дулкыннары" әдәби берләшмәсе җитәкчесе Лилия Гыйлем белән очрашуда шагыйрәнең иҗаты белән таныштылар, бергәләп шигырьләрен укыдылар.  Риязның әнисе Резеда ханым Әхмәтовага әлеге очрашуны оештырганы өчен бик зур рәхмәт.

Психология атналыгы кысаларында 1-5 класс укучылары белән дуслык, бердәмлеккә нигезләнгән психологик уен үткәрелде.

Интернатта 7 сыйныфлар тәрбияче Рафикова Резеда Шамил кызы белән, музыка көненә багышлап, хәзерге татар эстрада җырчылары иҗаты буенча викторина оештырдылар. Уенда яшь талантларның иҗатына карата кызыксыну, горурлык хисе, телебезгә, татар мәдәниятенә мәхәббәт хисе тәрбияләү максат итеп куелды.

5Б сыйныфы укучылары технология дәресендә, укытучы апалары Лилия Глүс кызы Вәлиева белән бергәләп, хуш исле үләннәр салу өчен Sache( Саше) капчыгы тегәләр. Укучыларыбыз әлеге капчыкны дәү әниләренә, әниләренә бүләк итәргә җыена. Бизәкләрнең дә бик матурларын, ачык төстәгеләрен сайлаганнар.

Гимназиябездә, тәрбия юнәлешендә, 2022-2023 нче уку елы “Спорт һәм сәламәт яшәү елы” дип игълан ителде. Укытучыларыбыз, һәр кайсы, аерым бер спорт төре белән шөгыльләнә, көндәлек күнекмәләрдә үз сәламәтлеген ныгыта. Моннан тыш, күмәк спорт төрләрендә тренер җитәкчелегендә шөгыльләнү, район спорт ярышларында команда белән катнашу өчен дә эзлекле әзерлек башланды.
Оешмалар, предприятиеләр һәм учреждениеләр арасында волейбол буенча район беренчелегендә дә гимназиябезнең ир-егетләр волейбол командасы катнаша. Кичә – 20 октябрь көнне, “Батыр” спорт комплексында волейболчыларыбыз спорттагы уңышлары белән дан казанган Актанышның 1 нче мәктәп командасы белән уйнады. Гимназиябез укучылары да, укытучылар да, уенчыларның гаиләләре дә – җанатарлар егетләребезгә көч биреп торды.
Спорт – тормышта һәм яраткан хезмәтендә уңышка ирешүдә көчле стимул. Ул максат куярга, даими шөгыльләнеп үзеңне ныгытырга, чыдамлыкка, көрәшкә, көндәшлеккә сәләтле булырга өйрәтә. Гимназиябез укытучыларына да, укучыларга да әлеге сыйфатлар бик кирәк!
Командабыз егетләре, сез –молодцы! Үзегезне тупланган бердәм команда итеп күрсәттегез. Командага үсеш, матур киләчәк, өзлексез күнегүләр, матур җиңүләр телибез! Без сезнең белән!!!

«Сириус» платформасында мәктәп укучыларының бөтенроссия олимпиадасының мәктәп этабы. Математика буенча турда гимназиябезнең 4-11 сыйныф укучылары катнашты.

Китапханә айлыгы кысаларында, гимназиябезнең 5В сыйныфы укучылары белән район үзәк китапханәсенең балалар бүлегенә экскурсия оештырылды. Укучылар яңа китаплар белән таныштылар. Китапханәче апаларыбыз яңа кайткан аппаратуралар ярдәмендә интерактив уеннар уйнаттылар.Экскурсия укучыларыбызга бик ошады. Үзләренә укыр өчен бик күп китаплар алдылар.

Психология атналыгы кысаларында 5А сыйныфында "Коллектив портреты" уены үтте.

Бүген – 19 октябрь көнне, “Сәләт” клублары семинары кысаларында, “Сәләт”-“Ялкын” мәйданчыгында катнашучы укучылар белән квест узды.

"Сәләт"-"Ялкын" мәйданчыгы - 1 б, 2 в класс укучылары.