Гимназиябезнең  информатика укытучысы Хөсәенов Ленар Наил улы Татарстан Республикасы Мәгариф һәм фән министрлыгының Мактау кәгазе белән бүләкләнде. Ихластан котлыйбыз!

"Мәктәпкә әзерләнергә булыш!" акциясе кысаларында, гимназиябезгә I сыйныфка укырга керүче Диләрә Рәхимовага, II сыйныфка укырга баручы Руслан  Дәүләтовка иганәчелек  ярдәме күрсәткән Шайхразиева Лилия Феликсовнага ихлас рәхмәтебезне белдерәбез.
Укучыларга уку әсбапларын, мәктәп букчасын директорыбыз Венера Хәмәтнәсыйх кызы Хәева тантаналы шартларда тапшырды. Балаларга укуда уңышлар теләде.

Игелек игелеккә ялгансын!

Гимназиябез директоры Венера Хәмәтнәсыйх кызыХәева бүген Яшел Үзәндә Татарстан Президенты Рөстәм Миңнеханов катнашында узучы мәгариф һәм фән хезмәткәрләренең республика август киңәшмәсендә катнашты.

Математика укытучылары Фәрдиева Регина Равил кызы һәм Вәлиева Земфия Гыйльфан кызы бүген, техникум базасында, математика һәм информатика укытучыларының  секцион утырышында катнаштылар. Әлеге чара укытучыларның август конференциясе кысаларында оештырылган иде.

Гимназиябез директоры Венера Хәмәтнәсыйх кызы Хәева җитәкчелегендәге делегация Казанда "Адымнар"  мәктәбендә узучы "Татарстан Республикасында милли мәгарифне үстерү" республикакүләм форумында катнашты.
"Мәктәпләрдә туган телне өйрәнүне саклау максатыннан, Президентыбыз Рөстәм Нургали улы, республика җитәкчелеге, депутатлар корпусы тарафыннан федераль үзәк, Россия Мәгариф министрлыгы белән эшлекле очрашулар узды. Нәтиҗәдә, яңартылган стандартларга уку планнарында дәресләр санын арттыру турында үзгәрешләр кертелде", - дип хәбәр итте форумда ТР Мәгариф һәм фән министры урынбасары Минзәлия Закирова.

Форум барышында Актаныш гимназиясендә туган телне укыту эшчәнлеге югары бәяләнде. Иҗади эшләүче һәм югары нәтиҗәләргә ирешүче татар теле һәм әдәбияты укытучыбыз Чулпан Рәмзил кызы Шәриповага Татарстан Президенты Рөстәм Нургали улының Рәхмәте белдерелде.

16 август көнне район башкарма комитет җитәкчесе Ленар Зарипов, аның җитәкчелегендәге махсус комиссия гимназиябезнең яңа уку елына әзерлеген карады.
Балаларга белем һәм тәрбия бирүдә заманча эш оештыру, яңа алымнар куллану, коллектив эш һәм яңа уку елына әзерлек Ленар Рафак улы тарафыннан югары бәяләнде.

Гимназиябезнең инглиз теле укытучылары методик берләшмәсе август ае җыелышын үткәрде. Биредә узган уку елына нәтиҗәләр ясалды,  яңа  уку елында кулланылачак китаплар, дәреслекләр өйрәнелде,  бурыч-максатлар билгеләнде.

Татарстан Республикасы Иҗтимагый палатасы рәисе Зилә Рәхимҗан кызы Вәлиева, Актанышка эшлекле сәфәре кысаларында, гимназиябез эшчәнлеге белән танышты.

Актаныш район башкарма комитет җитәкчесе вазыйфаларын башкаручы Ленар Рафак улы Зарипов "Бәхетле балачак" агымының ябылу тантанасында катнашып, "Бүләк"аланы коллективына, Арча педагогика көллияте студентларына рәхмәт белдерде. Актаныш һәм Рәсәйнең төрле өлкә-шәһәрләреннән: Оренбург, Пенза, Киров, Нижгар, Коми, Пермь, Рязань, Ульян, Әстерхан, Мәскәү, Башкортстан, Иркутск, Свердловск, Краноярск, Чиләбе, Саратовтан ял итүче балаларга имин юллар, уңышлар теләде. Гимназиябез директоры Венера Хәмәтнәсыйх кызы Хәева ял итүче балаларга мөрәҗәгать итте. Киләсе елга да "Бүләк аланы"нда ял итәргә чакырды. Әлеге балаларга үз өлкәләрендәге мәктәп-гимназияләрдә татар теле һәм әдәбияты укытучы мөгаллимнәрне дә Актанышка - тәҗрибә уртаклашырга чакырды.

5 нче август көнне 9.00 сәгатьтә укучыларны 5 сыйныфка сайлап алу имтиханы була. Мөрәҗәгать итү өчен - 8-939-933-94-95, Римма Гранит кызы Баһаутдинова.