Бүген, 16 нчы март көнне, 2 нче сыйныфта “Экологик калейдоскоп” темасына экология дәресе узды. Анжелика Евгеньевна укучыларны табигать белән дус булу, анда үз-үзеңне тоту, кызыл китап, табигатьтә булган проблемалар һ.б. таныштырды. Укучылар интрактив тактада булган биремнәрне эшләделәр, шигырьләр сөйләделәр, укытучы биргән сорауларга җавап бирделәр. Яңа кызыклы мәгълүматлар белән танышу укучыларга бик ошады.
 

Бүген, 15 нче март көнне, 5 нче сыйныфлар арасында Л.Н. Толстой иҗаты һәм аның “Кавказский пленник” әсәренә багышланган викторина узды. Бәйгедә 5 нче сыйныф укучылары катнашты. Алар үзара дүрт командага бүленеп көч сынаштылар. “Кавказский пленник” әсәре буенча сорауларга җавап бирделәр, биремнәр эшләделәр, Л.Н. Толстой әсәрләреннән өзекләр сөйләделәр һәм рәсемнәр ясадылар.
 

Бүген, 15 нче март көнне, “Илебездә, телебездә, күңелләрдә Г. Тукай мәңгелек” дип исемләнгән шигырь укучылар бәйгесенең район этабы узды. Әлеге чарада безнең гимназия укучылары да катнашты. Кызлар Г. Тукайның “Ана догасы” шигыренә инсинировка күрсәттеләр. Бу чыгыш берәүне дә битараф калдырмады.
Район этабында җиңүчеләр шәһәр этабында да катнашачак. Шуңа күрә кызларыбызга һәм аларның җитәкчеләренә уңышлар теләп калабыз! 

Бүген, 14 нче март көнне Республика күләм “Дулкыннар” бәйгесе узды. Быел аны Татарстанның халык артисты Әлфия Авзаловага багышлаганнар иде. Катнашучылар вокал, нәфис сүз, инструменталь ансамбль, рәсем номинацияләрендә көч сынашты.
Укучыбыз Фаекова Д. үзе язган “Ак моң” әсәре белән, ә Ахмадуллин Р. “Йөрәк сере” шигыре белән чыгыш ясады.
Бәйгенең нәтиҗәсе - 16 нчы март көнне Халыклар дуслыгы йортында узачак гала-концертта билгеле булачак. Бәйрәм кичәсендә лауреатлар һәм кунаклар чыгыш ясаячак. Укучыларыбызга киләчәктә уңышлар теләп калабыз!

Бүген, 14 нче март көнне, башлангыч сыйныф укучылары Т. Миңнуллин исемендәге Түбән Кама татар дәүләт драма театры тарафыннан куелган “Карурман аша” спектаклен карап кайттылар. Тамаша Г. Камал исемендәге татар дәүләт академия теартында узды. Спектакль балаларга бик ошады.
Театр – үзе бер дөнья. Аның кагыйдәләре дә бар. Тамашачы кече яшьтән үк үзен җәмәгать урыннарында тотарга, спектакльне карарга һәм анализларга өйрәнергә тиеш. Безнең укучыларыбыз да әлеге кагыйдәләрне үзләштерделәр, спектакльдән тәэсирләнеп кайттылар.
Мондый кызыклы, файдалы чаралар соңгысы булмас дигән теләктә калабыз. 

“Мәрхәмәтле Татарстан” акциясе кысаларында гимназиядә төрле чаралар үтә. 12 нче март көнне Милләтләр бердәмлеге көненә багышланган дуслык дәресе үткәрелде. 1 нче сыйныф укучылары төрле милләтләр, аларның гореф-гадәтләре, милли ризыклары, киемнәре белән таныштылар. Күп милләтле илдә дус булып бергә яшәү, төрле милләт кешеләре арасында яхшы мөнәсәбәтләр булдыру турында әңгәмә оештырылды. Дәрес ахырында укучылар үзләре яраткан милли ризыкны ак кәгазьгә төшереп, аның турында сөйләделәр. Нәни укучыларга кызыклы дәрес бик ошады.
13 нче март көнне “Филипок и все все все” темасына шигырь укучылар бәйгесе үткәрелде. Бәйгедә 5-10 сыйныф укучылары катнашты. Укучылар Л.Н. Толстойның әсәрләрен сөйләделәр. Бәйгенең максаты язучы иҗаты белән якыннан таныштыру иде.
Әлеге акция кысаларында чаралар атна буе дәвам итәчәк. Укучыланы актив катнашырга чакырабыз!

10 нчы март көнне Зур гаилә уеннары проекты кысаларында уздырылучы “Без бергә” күңелле старт уеннарының муниципаль этабы узды. Безнең гимназия данын Мансуровлар гаиләсе яклады. Бәйгенең кагыйдәләре буенча гаиләләр ГТО нормаларын үтәргә, күңелле старт уеннарында катнашырга тиешләр иде.
Бу бәйге чыннан да гайләләрне берләштерә, бер йодырык итеп туплый. Бер-береңә ярдәм итү, уртак көч белән җиңүгә ирешү катнашучыларның төп теләгенә әверелә.
Бәйгедә актив катнашкан өчен, гимназия исеменнән Мансуровлар гаиләсенә зур рәхмәтебезне белдерәбез! Алга таба да уңышлар һәм гаилә бәхете, тигез тормыш телибез!

Бүген, 6 нчы март көне, 1 нче сыйныфларда “Спасибо, книга первая моя!” темасына әлифба һәм азбука бәйрәмнәре узды. Нәни укучылар хәрефләр турында матур шигырьләр сөйләделәр, әлифба һәм азбука турында җырлар җырладылар, татар халык әкиятләрен сәхнәләштерделәр. Бәйрәмне карарга әти-әниләр, әби-бабайлар, укытучылар, мәктәп администрациясе килгән иде. Бик матур, күңелле балалар бәйрәме һәркемнең күңеленә хуш килде.
Кадерле укучылар! Әлеге беренче китап башка китапларга ачкыч булсын, сезне яңа үрләргә алып керсен, белем дөньясы белән таныштырсын дигән теләктә калабыз! Сезгә киләчәктә сәламәтлек, укуыгызда зур уңышлар телибез!

Бүген, 2 нче март көнне, Вахитов районының 131 нче номерлы лицеенда, “Дни науки” исемле IV фәнни-гамәли шәһәр конференциясе үтте. Әлеге чарада гимназиянең 6 нчы сыйныф укучысы Сөләйманова С. катнашып призер титулына лаек булды.
Сөләйманова С.  әлеге җиңү белән тәбрик итәбез! Алга таба да фәнни уңышлар телибез!

Бүген, 1 нче март көнне, гимназия укучылары гомум белем бирү оешмалары арасында үткәрелүче “Озын тәнәфес” исемле бәйгедә катнашып шәһәр турына үттеләр.
Укучылар өчен зур сәхнәгә чыгу яңалык түгел. Алар инде “Пирамида" күңел ачу үзәге һәм К. Тинчурин исемендәге драма һәм комедия театры сәхнәсендә чыныгу алган укучылар.
Төрле милләт  биюләре, лирик җырлар, спектакльдән өзекләр концертның бизәге булдылар.
Әлеге чарага үзеннән өлеш керткән укытучыларга, укучыларга гимназия исеменнән рәхмәт белдерәбез! Шәһәр этабында уңышлар телибез!