22-27 нче август көннәрендә Казанда, “Ворлдскиллс” стандартлары нигезендә, һөнәри осталык буенча дөнья чемпионаты уза. Анда 63 илдән килгән катнашучылар 56 компетенция буенча көч сынашачаклар.
Ә бүген катнашучылар шәһәребезнең төрле мәктәпләрендә кунак булдылар. Безнең гимназиягә Белоруссия данын яклаучы катнашучылар килделәр.
Аларга бик бай программа тәкъдим ителде. Кунаклар укучылар башкаруында флеш-моб карадылар, Татарстан, Казан белән таныштылар. Татар халкының милли ризыгы - чәк-чәк пешерергә өйрәнделәр. “Ел укытучысы – 2018” конкурсы җиңүчесе, физика укытучысы Радик Рифович белән физика законнарына төшенделәр. Робототехника түгәрәгенә йөрүчеләрнең эшләнмәләре, уңышлары белән таныштылар. Гимназия музеенда Яңа Татар бистәсе, гимназия тарихы, һөнәрчеләр турында кызыклы мәгълүматлар тыңладылар. Ә кунаклар, үз чиратларында, Белоруссия турында кызыкы фактлар, үзләре сайлаган һөнәрләр турында сөйләделәр, җырладылар. Истәлек өчен гимназия укытучыларының яраткан рецептларын туплаган җыентыклар бүләк ителде.