Башлангыч сыйныфлар ункөнлеге кысаларында ачык дәресләр дәвам итә. Бүген 2А сыйныфында рус теле, ә 3В сыйныфында математика фәне буенча ачык дәресләр үтте. Укучылар дәресләрдә бик актив булдылар. 

“Татар халык җырларын иң оста башкаручы сыйныф” бәйгесенә нәтиҗә ясалды. Бүген бәйгедә 5-8 нче сыйныф укучылары чыгыш ясады. Укучылар катлаулы көйләрне дә, дәртле җырларны да бик матур итеп башкардылар. Җырлаучысы булганда – җыр мәңге яши. Халык җырларын, халыкның милли көйләрен саклап, буыннан-буынга җиткерә алсак иде.

Башлангыч сыйныфларда “Без сәламәт яшәү рәвеше яклы!” дип аталган сыйныф сәгате үтте. Дәрес барышында укучылар сәламәтлеккә уңай тәэсир итүче факторлар белән таныштылар. Сәламәт булу өчен начар гадәтләр белән бәйләнмәскә, спорт белән шөгыльләнергә һәм дөрес тукланырга кирәк икәненә тагын бер кат инандылар.

Бүген 2Б сыйныфында “Татар хатын-кызлары костюмы үзенчәлекләре” дигән темага  ачык дәрес үтте. Дәреснең максаты укучыларны татар халкының милли киемнәре белән таныштыру иде. Дәрес барышында укучылар презентацияләр ярдәмендә милли киемнәр турында кызыклы мәгълүмат алдылар һәм бизәкле читек үрнәге ясадылар. Дәрес мавыктыргыч һәм нәтиҗәле үтте.

Гимназиядә башлангыч сыйныфлар ункөнлеге дәвам итә. Бүген 1А, 4А һәм 4Б сыйныфларында математика фәне буенча ачык дәресләр узды. 1 нче сыйныф укучылары мисал чишү алымнары белән танышса, 4 нче сыйныф укучылары күпурынлы саннарны язу һәм исәпләү алымнарына төшенделәр. Дәресләрдә укучылар бик актив катнаштылар.

Беренчеләрдән булып, ункөнлекне 2В сыйныфы математикадан ачык дәрес белән башлап җибәрде. Укучылар уеннар һәм презентацияләр ярдәмендә исәпләү алымнары белән таныштылар, мисаллар чиштеләр. Дәрес бик кызыклы һәм нәтиҗәле үтте.

Бүген мәктәп радиосының, “Толерантлык көненә” багышланган, чираттагы чыгарылышы үтте. Эфирда укучылар сабырлык, түземлек, шәфкатьлелек, кешелеклелек кебек сыйфатлар турында фикер алыштылар һәм кешеләрне рәнҗетмичә, бер-береңне хөрмәт итеп, дус-тату яшәргә кирәклеге турында сөйләделәр.

“Татар халык җырлары” бәйгесе дәвам итә. Бүген 3-4 нче сыйныф укучылары үзләренең  җырга-моңга осталыкларын жюрига күрсәттеләр. Укучыларның моңлы җырларны да, дәртле көйләрне дә бик оста башкарулары безне бик сөендерә. Җырны башкару осталыгына, музыкаль бизәлешенә карап башлангыч сыйныфлар арасында жюри нәтиҗә чыгарды.

3 нче В сыйныфында Толерантлык көненә багышланган сыйныф сәгате үтте. Дәрес барышында укучылар толерантлык төшенчәсенең мәгънәсенә төшенделәр. Кеше нинди уңай сыйфатларга ия булырга тиеш икәнлеге турында сөйләштеләр, тормыштан алынган төрле хәлләр турында фикер алыштылар һәм дуслык темасына рәсемнәр ясадылар.

Ункөнлек кысаларында гимназиядә кызыклы чаралар уздырыла. Шушы көннәрдә 1-4 нче сыйныф укучылары арасында “Рус теле һәм математика буенча иң яхшы дәфтәр” бәйгесе үтте. Бәйгенең җиңүчеләрен котлыйбыз һәм укуларында уңышлар телибез.