Декабрь ае мәктәп укучылары  өчен  кызу “ урак өсте”нә әйләнде. Алар 13, 14,  16, 18 нчы декабрь көннәрендә математика, рус теле, физика, татар теле, тарих һ.б.  фәннәрдән мониторинг – тикшерү уздылар.  Һәр укучы эшен компьютерда башкарды.

11 нче декабрь көнне Шәрләрәмә мәктәбенең “Дуслык” оешмасында  “Ышанычлы дус” темасына варисларның җыены үткәрелде.  Укытучы Л.Н.Толстойның “Ике дус” мәсәлен укып чыккач, берничә укучы аның эчтәлеген сөйләде һәм укучылар  текстта сүзнең  дуслык турында барганын ачыкладылар. Җыен барышында укучылар кешеләр арасындагы мөнәсәбәтләрдә дуслыкның иң мөһим сыйфатларның берсе булуына ышандылар. Дуслык кешене батыр , яхшы күңелле итә, ярдәмчел итеп үстерә дигән нәтиҗә ясадылар.

9 нчы декабрь көнне Ватан геройлары көне кысаларында   9 нчы класс укучысы Мухамедзянов Рөстәм укучылар каршында чыгыш ясады. Ул 6 нчы декабрь көнне районның югары класс укучылары өчен оештырылган очрашуда катнашты. Рөстәм очрашудан алган тәэсирләре белән уртаклашты.

9 нчы декабрь көнне Коррупция көне кысаларында рус теле укытучысы Халиуллина Г.И.  “Коррупция һәм аның белән көрәш” темасына дәрес үткәрде. Дәресне Н.В.Гогольнең “Ревизор” әсәреннән өзек белән башлады. Укучылар дәрес барышында коррупциянең тарихы, аның дәүләткә һәм кешеләргә зыяны белән таныштылар.

7 декабрь көнне Шәрләрәмә мәктәбендә СПИД ка каршы көрәш көне кысаларында укучылар белән сәламәтлек дәресе үткәрелде. Дәресне  “Сәламәтлек” түгәрәге җитәкчесе башлангыч класслар  укытучысы Муратова Р.С.  оештырды.  Укытучы дәрестә классбилдинг, таймд  раунд робин структураларын оста файдаланды. 

3 нче декабрь - халыкара Инвалидлар көне уңаеннан инвалидлар декадасы уздыру традициягә әйләнде. Шәрләрәмә мәктәбендә декаданы оештыру буенча план төзелде. 5 нче декабрь көнне  3,4 нче класслр җитәкчесе Моратова Р.С. һәм тәрбия эшләре буенча директор урынбасары Гыйльфанова Р.Ф. “Яшәү- үзе батырлык” темасына әңгәмә үткәрделәр. Укучылар гомер буе урында ятып иҗат иткән язучы Фәнис Яруллинның тормыш юлы белән таныштылар.  Инвалид булып калуның сәбәпләрен ачыкладылар. Янәшәбездәге ярдәмгә мохтаҗларга һәрвакыт игътибарлы  булырга кирәклеккә тагын бер кат төшенделәр.

1 ноябрь көнне Шәрләрәмә төп гомуми белем бирү мәктәбендә Халык бердәмлеге көне кысаларында тарих укытучысы Халиуллина Гөлнур Илсур кызы Россия тарихы битләре буенча дәрес үткәрде. Балалар төркемнәргә бүленеп бүленеп викторина сорауларына җавап эзләделәр.

1 нче ноябрь көнне Шәрләрәмә  мәктәбендә 1 нче класс балаларын укучылар сафына кабул итү бәйрәме булды. Гатиятуллина Ләйлә белән Гарипова Ләйсән, күп сынаулар аша үтеп, укучы булырга лаек икәнлекләрен исбатладылар. 

23 нче октябрь көнне Шәрләрәмә төп гомуми белем бирү мәктәбендә “Һәр уңышның нигезендә тынгысыз хезмәт һәм изгелек ята” темасына ата-аналар җыелышы узды. Җыелышта укучылар да катнашты. Мәктәп директоры Вәлиев Рамил Әзһәр улы катнашучыларны мәктәп тормышы белән таныштырганнан соң , ата-аналар өч төркемдә эшләде. Алар А.П. Чехов, А.С.Макаренко һәм Гиппократның тәрбия өлкәсенә кагылышлы канатлы сүзләренә аңлатма бирергә тиеш иделәр. Һәр төркемдә фикерләшү бик җанлы барды. Гыйләҗева Таһира, Гатиятуллина Гөлназ, Халиуллина Гөлнурлар  эчтәлекле чыгыш ясадылар.  Гатиятуллина Гүзәл Һәм Гыйләҗева Гөлнара да үз фикерләрен аерым әйттеләр.

Җыелышта ветеран-укытучы, Шәрләрәмә авылы ветераннар советы рәисе ШәйгардановаРоза Хәким кызы  да катнашты. Ул уңышка ирешүнең нигезендә тырышлык, тәртип, хезмәт сөючәнлек ятканын дәлилләп сөйләде.

Барлык кеше аның тынгысыз, бар эшкә дә өлгер булуына хәйран калды. Роза апа кайларда гына булмаган, кемнәр белән генә очрашмаган, кемнәр генә турында язмаган, нинди генә конкурсларда катнашмаган, исең китәрлек. Йокысыз төннәр заяга китмәгән, тырыш хезмәт аңа зур җиңү яуларга мөмкинлек бирде: ул республикада “Ел хатын-кызы” исемен алу дәрәҗәсенә иреште. Роза апа укучыларга  тырышып укырга, тәртипле булырга киңәш итте.