Бүген бакчабызда Бөек Җиңүнең 70 еллыгына карата "Бөек Җиңү бәйрәме белән!" дигән музыкаль-әдәби кичә үткәрелде. 9 Май - тарихыбызның данлы бер датасы, Бөек, Ватаныбыз өчен иң кадерле, олы бәйрәм. Балалар белән изге яуда һәлак булганнарны искә алдык, матур шигырьләр, җырлар яңгырады. Буыннар алмашынса да, гаять авыр сынаулар китергән сугыш чоры хәтеребездән мәңге җуелмас. Беркем дә, бернәрсә дә онытылмый. Зур җиңүләр яулап, илебез азатлыгын һәм бәйсезлеген саклап калган хөрмәтле ветераннарыбызга олы рәхмәтләребезне җиткерәбез! Күкләребез аяз, имин булсын!

Безнең илебез ел саен Җиңү көнен олылап бәйрәм итә. Бу бәйрәм 1945 елда нинди шатлыклы булса, хәзер дә - 70 ел вакыт узгач та, халык  Җиңүнең нинди зур  югалтулар белән яулануын онытмый. Ватаныбыз азатлыгы, безнең бүгенге тыныч көнебез өчен яу кырында ятып калганнарны онытырга беркемнең дә хакы юк!  Бу атнада  бакчабызда  эшчәнлек Бөек Җиңү көненә карата алып барыла. Балалар белән  әңгәмәләр үткәрелә, рәсемнәр, картиналар, презентацияләр карау оештырыла, балалар алган белемнәрен, күргәннәрен рәсемнәрдә чагылдыралар.                                                                                                  

Яшибез гел шулай кояшлы

Һәм тыныч көннәргә сөенеп.

Һәркемнең күңелендә бер теләк:

Иминлек! Иминлек! Иминлек!

Бүген зурлар төркемендә  балалар "Салют" темасына рәсем ясадылар. 

Хөрмәтле хезмәттәшләребез!!! Май аенда туган көннәре булган  Загидуллина Халисә Хамматовна, Зайнуллина Рәзилә Валентиновна, Ибатуллина Илзирә Сулеймановна. Сезне туган көннәрегез белән котлыйбыз. Сезгә уңышлар, шатлыклар, бәхетләр, нык сәламәтлекләр телибез.

Котлап сезне туган көнегез белән,

Якты кояш сипсен җылысын.

Сезнең өчен алып килсен һәр көн

Бәхетләрнең иң-иң олысын.

Якты өмет, олы шатлыклар

Һәрчак сезгә юлдаш булсыннар.

Уңышлардан килгән куанычлар, 

Күңел күген бизәп торсыннар.

Безнең бакча балалары Бөек Җиңүнең 70 еллыгына карата открыткалар конкурсында катнаштылар. Конкурста актив катнашканы өчен балалар бакчасына район мәгариф идарәсе тарафыннан почёт грамотасы тапшырылды.  Конкурста катнашкан һәр балага һәм аларның әти-әниләренә зур рәхмәтебезне белдерәбез!  Балаларыбызга алга таба да иҗади уңышлар теләп калабыз.

Бүген уртанчылар төркемендә тәрбияче ярдәмчесе булып эшләүче Сания Исламетдин кызы Габделманованың  55 яшьлек олы юбилее. Сания Исламетдиновнаның уңганлыгы-булганлыгы, сабырлыгы, шәфкать тулы йөрәге һәркемне сокландыра. Һәр балага, аларның әти-әниләренә, хезмәттәшләренә ачык йөзле, киң куңелле ул. Хөрмәтле Сания Исламетдиновна! Сезгә гаилә тигезлегендә, тормыш иптәшегез белән пар канатлы булып, саулык-сәламәтлек белән бәрәкәтле мул тормышта гомер итәргә язсын! 

Куанычлар гына алып килсен

55 яшь - олы бәйрәмең.

Сиңа бүген бүләк итәбез без

Барлык яхшылыклар бәйләмен!

Бакчабызда атналык теманы йомгаклап "Татар халкының бөек шагыйре - Габдулла Тукай" дип исемләнгән әдәби кичә һәм Г.Тукай шигырьләре буенча уен-викторина үткәрелде. Максаты: Г.Тукай иҗаты буенча алган белемнәрен камилләштерү; шагыйрьгә, шагыйрьнең иҗатына карата мәхәббәт, ихтирам хисләре тәрбияләү; Г.Тукай әкиятләре, шигырьләре аша балаларда матур әдәбият белән кызыксыну, аларны укырга теләк тәрбияләү, тырышлык, игътибарлылык, сабырлык кебек сыйфатлар тәрбияләү. Балалар презентация аша Г.Тукай, аның әкиятләре, шигырьләре турында слайдлар караганнан соң, уен-викторина оештырылды. Балалар рәсемнәр арасыннан таныш булган шигырьләргә туры килә торганнарын сайладылар, шигырьләрдән өзекләрне тыңлап, кайсы шигырьдән икәнлеген әйттеләр һ.б. Кичә "Туган тел" җыры белән тәмамланды. Соңыннан  балалар җыелышып фотога төштеләр.

Икенче кечкенәләр төркеме әти-әниләре  төркем җыелышында  балалар белән оештырылган ачык шөгыль күзәттеләр.

Максат: балаларның күзәтүчәнлекләрен, иҗади мөмкинлекләрен, танып - белү активлыкларын, коммуникатив күнекмәләрен үстерү; балаларны Г. Тукай әсәрләре белән таныштыруны дәвам итү;                                                                                                                                                                                                                          шигырь, җыр-бию, әкиятләр аша туган телебезнең байлыгын, матурлыгын күрсәтү, аңа сак караш тәрбияләү һәм соклану хисләре уяту, гореф-гадәтләребезгә, милләтебезгә хөрмәт белән карарга һәм ихтирамлы булырга өйрәтү; татар балалар әдәбияты буенча әти-әниләрнең күзаллауларын киңәйтү һәм әдәби әсәрне гаилә белән укырга кирәклегенә өндәү.

Сөекле Тукаебызны беркайчан да истән чыгармыйбыз. Аны яратабыз, зурлыйбыз. Шигырьләрен, әкиятләрен укып яшәргә өйрәнәбез. Бакчабызда бу атна Г.Тукайга багышлана. Балалар аның тормышы, иҗаты белән танышалар. Шигырьләренә, әкиятләренә нигезләнеп балаларда Г.Тукай шәһесенә, әдәби мирасына мәхәббәт тәрбияләнә.

Туган телнең бөеклеген белдек,

Шигырьләре аша Тукайның.

Ул үзе дә бөек, кабатланмас,

Андый берәү җирдә юк тагын!

Космонавтика көне - 12 апрельдә - кешенең беренче тапкыр галәмгә очуына карата билгеләп үтелә торган истәлекле дата. 1961 елның 12 апрелендә совет космонавты Ю.А.Гагарин "Восток" космик кораблендә "Байконур" космодромыннан старт ала һәм дөньяда беренче тапкыр Җир планетасы тирәли орбиталь очыш ясый...                                                                                                                                                                                      Бу атнада балалар белән эшчәнлек "Галәм киңлекләре" темасы буенча алып барылды. Максат: балаларда беренче очучы Ю.Гагарин белән танышу аша илебезгә карата горурлык хисләре тәрбияләү; галәм турындагы белемнәрен системалаштыру; Кояш системасы, планеталар турында элементар белешмә бирү, алар турында күбрәк беләсе килү теләге уяту; Космонавтика көне турында белемнәрен формалаштыру; тирә-юньне, табигатьне аңларга һәм сакларга сәләтле актив, иҗади шәһес тәрбияләү. Атнаның йомгаклау чарасы булып мәктәпкә әзерлек төркеме балаларының "Сәлам, Галәм!" дип исемләнгән рәсемнәр күргәзмәсе оештырылды.