25 нче ноябрь көнне үткәрелгән "Мөһим сөйләшүләр" дәресләр циклында укучылар белән "Әйләнә- тирәдәгеләргә карата игътибарлы, кайгыртучан мөнәсәбәт" дигән темага сөйләшү алып барылды. Төп максатлар:
- әйләнә- тирәдәгеләргә карата ихтирамлы мөнәсәбәт формалаштыру;
- дөрес аралашу күнекмәләре булдыру.
Дәрес барышында укучылар тирән эчтәлекле видеоөзекләр карадылар, фикерләре белән уртаклаштылар.

Гимназиянең 4Б сыйныфы укучылары сыйныф җитәкчеләре Рәйхан Рәшитовна белән берлектә Татарстан Эчке эшләр министрлыгы музеенда булып кайттылар. Әлеге эчтәлекле экскурсия укучыларга бик ошады!

21 нче ноябрьдән Казан шәһәрендә "Дәвам" проекты старт алды. Әлеге проект татар мәктәпләрендә милли белем бирүне оештыру тәҗрибәсе белән уртаклашуга юнәлтелгән.
 "Дәвам" проекты кысаларында беренче очрашу гимназиябездә үткәрелде. Гимназия директоры Гөлшат Әбүзәровна килгән кунакларга экскурсия оештырды, уку- укыту һәм тәрбия процесслары, ирешкән нәтиҗәләр белән таныштырды.
Без үз чиратыбызда, ярдәм күрсәткән өчен укытучылар коллективына һәм укучыларыбызга рәхмәт белдерәбез!

Ноябрьнең соңгы якшәмбесендә һәрберебезнең йөрәгендә иң кадерле кешегә – әнигә карата наз хисләре уята торган бәйрәм, Әниләр көне билгеләп үтелә. Гимназия укучылары укытучылары белән берлектә Әниләр көненә багышланган чараларда һәм мастер- классларда катнаштылар, открыткалар ясадылар, хатлар яздылар, котлау видеороликлары төшерделәр.

Видеога сылтама: https://vk.com/club216931602?z=video-216931602_456239342%2Fbb059d5c4ce7007a61%2Fpl_wall_-216931602

Гимназия күләмендә 3 - 9 нчы сыйныф кызлары арасында мини - футбол үткәрелде. Уен бик кызу барды. Һәр команда үзләренең иң җитез һәм көчле булуларын исбатларга тырыштылар. Аларга плакатлар тоткан җанатарлар көч биреп торды! Ярышны оештырган өчен физик тәрбия укытучысы Рәнис Раисовичка рәхмәтебезне белдерәбез!

18 - 22 нче ноябрь көннәрендә гимназиядә психология атналыгы уздырылды. Әлеге атналыкның максатлары:
- укучыларда аралашу күнекмәләрен арттыру;
- сыйныфтагы татулыкны ныгыту;
- яхшы кәеф тудыру.
Педагог- психолог Лилия Сәлимҗановна укучылар белән төрле чаралар үткәрде: "Куклотерапия" техникасы, "Шалкан" әкиятен сәхнәләштерү, "Минем яраткан уенчыгым" арт- терапия, тренинглар "Хыялдагы интервью", "Стресс ситуацияләрендә ярдәм итү алымнары".

Гимназиянең 7Б, 8В һәм 9Б сыйныфы укучылары сыйныф җитәкчеләре белән "Волейбол үзәге" спорт комплексында җанатарлар буларак катнашып кайттылар.

22 нче ноябрь - сүзлекләр һәм энциклопедияләр көне. Әлеге көн уңаеннан, укучылар белән мәгълүмати чарада үткәрелде. Балалар беренче белешмәләрнең кайчан барлыкка килгәнен белделәр, рус телендә язылган сүзлекләрнең авторы Владимир Иванович Дальның тормыш юлы белән таныштылар. Чара ахырында укучылар сүзлекләр турында видеоөзекләр карадылар һәм "Сүзне аңлат" уенын уйнадылар.

Гимназиянең 10 нчы сыйныф укучылары сыйныф җитәкчеләре Эльмира Вагизовна белән берлектә "Белем. Карьера" дип исемләнгән күргәзмәдә булып кайттылар.  Күргәзмә укучыларга һөнәри юнәлеш бирү максатыннан оештырылды. Төрле уку йортларыннан килгән вәкилләр үзләре белән таныштырдылар, уку шартлары, һөнәрләр турында сөйләделәр.

21 нче ноябрь көнне үткәрелгән “Россия - минем горизонтларым” сыйныфтан тыш эшчәнлек курсы кысаларында укучылар белән “Уңайлы Россия: транспорт” темасына сөйләшү уздырылды. Дәреснең максатлары:
- укучыларны транспорт өлкәсе белән бәйле булган һөнәрләрнең төрлелеге белән таныштыру;
- һөнәр сайлау процессына әзерләү.