Хуш сөекле бакчам, сабый чакларым!
Бакчаларны бик яратсак та,
Җитте шул хушлашыр чак.
Без мәктәпләргә китәбез.
Сау бул инде, балачак!
Озатып калырлар,
Тәрбияче апалар.
Әйтерләр алар безгә.
Сау булыгыз, балалар! 

Бүген безнең бакчада зур бәйрәм – бакча белән хушлашу! Әлеге бәйрәм бик күңелле булса да, шул ук вакытта дулкынландыргыч та. Без бакчабыздагы иң акыллы, иң тәртипле кызларны, малайларны мәктәпкә белем алырга озатабыз. Кадерле балалар, без сезгә иң изге теләкләрне телибез. Мәктәпне дә бакчаны яраткан кебек яратыгыз, тырышып укыгыз. Сау-сәләмәт, озын гомерле, белемле, акыллы балалар булып үсегез. Ак юллар сезгә, балалар!

Икенче кечкенәләр төркеме балалары бүген тәүлек вакытлары белән төсләр аша таныштылар. Әлеге эшчәнлек балаларның актив сүзлек запасын киңәйтергә: иртә, кич, төн, көн сүзләрен кулланырга, вакыт аралыкларын аерырга, нәрсә эшләүләре турында сөйләргә, үзара ярдәмләшү, үз-үзеңне тоту культурасын үстерүгә ярдәм итә.

Бакчабызның уртанчылар төркемендә тәрбияләнүче Садикова Лилия республикакүләм "Читаем Тукая" иҗади бәйгесендә катнашып I дәрәҗә дипломант исеменә лаек булды. Лилияне чын күңелдән котлыйбыз. Тәрбиячесе - Р.В. Хаматшинага алдагы эшендә дә уңышлар телибез!

Бүген хакимиятнең актлар залында оештырылган Мөслим муниципаль районы гадәттән тыш хәлләрне кисәтү һәм янгын куркынычсызлыгын тәэмин итү комиссиясенең утырышында катнаштык.

Бүген икенче кечкенәләр төркемендә икеләтә туган көн бәйрәме. Туган көннәрен билгеләп үтүче балаларга иң изге теләкләребезне юллап, җырлап, биеп күңел ачтык.

Бакчабызның икенче кечкенәләр төркемендә балалар кисеп ябыштыру шөгылендә "Тузганак чәчәге" темасына аппликация ясадылар. Эшчәнлек барышында балалар өлешләрдән бербөтенне булдырырга, җилемне пумала белән дөрес итеп сыларга, киселгән өлешләрне дөрес итеп ябыштырырга, пөхтәлекне булдырырга өйрәнделәр.

Беренче кечкенәләр төркемендә рәсем эшчәнлеге узды. Шөгыль барышында балаларның сүзлек запасын баету максатыннан җиләк-җимешләр турында әңгәмә үткәрдек. Соңыннан алмалар ярдәмендә кечкенәләр әлеге җимешне рәсемгә төшерделәр.

Бакчабызның "Кояшкай" бию ансамбле "Бию" бәйрәмендә "Нетихий час" исемле бию белән уңышлы чыгыш ясап кино карарга сертификат белән бүләкләнде.

Бүген бакчабызда Нижнекамск  шәһәреннән килгән делегацияне кунак иттек. Алар Мөслим районына Р.Х. Муллинның туган җире белән танышу максатыннан килгәннәр. Шул уңайдан бакчабыз белән дә танышып чыктылар. Әлеге делегацияне Р.Т. Демидов җитәкләде. Килгән кунаклар бакчабыздан бик канәгать булып киттеләр.