Язның иң беренче күркәм бәйрәме - халыкара хатын-кызлар көне. Шул уңайдан 4 нче сыйныф укучылары әниләре, әбиләре, дәү әниләре өчен чын бәйрәм кичәсе уздырдылар.

Татарстан Республикасы президенты Минниханов Рөстәм Нургалиевич указы нигезендә 2017 ел экология елы итеп билгеләнде. Шул уңайдан 2 март көнне барлык мәктәпләрдә экологик дәресләр узды. Әлеге дәрестә мәктәбебездә 1-11 нче сыйныф укучылары катнашты. Башлангыч сыйныф укучылары экологик викторина уены оештырганнар иде. Шулай ук мәктәбебездә рәсем күргәзмәсе оештырдык. Ә 9-11 нче сыйныф укучылары Әтнә районының табигый ресурсларын саклау буенча дискуссия үткәрделәр. 

Татарстан Язучылар берлеге белән Татнетны үстерү фондының уртак проекты булган "Әдәби җәүһәрләр" россиякүләм татар әдәбиятын сөючеләр бәйгесе ныгыганнан ныгый бара. 28 февраль көнне, Ибраһим Газига багышлап үткәрелгән онлайн викторинада инде йөздән артык татар әдәбиятын сөюче катнашты. Ләкин җиңүче булып бары өч кенә укучы танылды. Шулар арасында 10 нчы сыйныф укучысы Садриева Энҗе беренче урынга ия булды. Энҗегә финалда уңышлар теләп калабыз!

3 нче сыйныф укучылары әйләнә-тирә фәненнән ФББДИ стандартлары буенча ачык дәрес күрсәттеләр. Дәрес урманнар һәм андагы тереклекләрне өйрәнүгә багышланган иде. 

9 нчы сыйныф укучылары өчен профориентацион очрашу узды. Анда Г. Тукай исемендәге Әтнә авыл хуҗалыгы техникумы укытучысы Шакирова Надия Газимовна чыгыш ясады. Ул укучыларны техникумда укыту-тәрбия методикасы, уку бүлекләре һәм студентлар өчен перспективалар белән таныштырды. 

Яз җитүгә карамастан, укучыларыбыз кышкы спорт төрләреннән аерыла алмыйлар. Физкультура укытучысы Зарипов Булат Абдуллович һәрдаим төрле спорт уеннары үткәреп тора. Шуларның берсе 2-11 нче сыйныф укучылары арасында шорт-трек буенча ярыш. Әлеге ярыш мәктәбебезнең традицион спорт уенына әйләнеп килә. 

Чираттагы директор яны киңәшмәсе Дусым филиалындагы укыту-тәрбия эшенә, мәктәптәге патриотик тәрбиягә һәм балигъ булмаган балалар арасындагы травматизмга багышланган иде. 

Февраль ае оборона-масса айлыгы буларак билгеләнеп үтә. Әлеге айлык кысаларында мәктәбебездә төрле чаралар, патриотик кичәләр уза. Шушы агымда 8 нче сыйныф укучылары сыйныф җитәкчеләре Сөнгатова Гөлнара Зөлкәрь кызы белән ачык тәрбия сәгате күрсәттеләр. 

Оборона - масса айлыгы кысаларында ТИН укытучысы Зарипов Булат Абдуллович укучылар белән төрле хәрби-патриотик чаралар үткәрә. 8 - 11 нче сыйныф укучылары арасында мылтыктан ату буенча ярыш оештырылды. Егетләр арасында 10 нчы сыйныф укучысы Хабибуллин Айназ - беренче, 11 нче сыйныф укучысы Борһанов Айваз икенче, 8 нче сыйныф укучысы Батыршин Рәзил өченче урынны яуладылар. Әлеге ярыштан кызларыбыз да читтә калмадылар. 10 нчы сыйныф укучылары Садриева Энҗе - беренче, Галиәхмәтова Дилә - икенче һәм өченче урынны 8 нче сыйныф укучысы Василова Лилия алды. 

Мәктәбебез базасында урнаштырылган хоккей мәйданчыгында төрледән төрле спорт ярышлары уза. Чираттагысы 5 команда арасында Әфганистанда хәрби хезмәт үтәгәндә һәлак булган Күшәр авылы егете Зөлфәт Хәйруллин призына хоккей ярышы. Нәтиҗәдә, Күәм командасы - беренче, Бәрәскә - ике һәм Күшәрләр өченче урынны яуладылар.