Бүген мәктәбебез шау - гөр килеп торды. Һәр укучы өчен шатлыклы булган көн - әниләр бәйрәмен билгеләп үттек. Укучылар котлау өчен әниләрне мәктәпкә чакырдылар. Алар өчен зур концерт әзерләделәр. Балалары әниләрне котлап шигырь сөйләгәндә, җырлаганда, биегәндә һәр әнинең күзләрендә шатлык яшьләре чагылды. Алар куанып та, горурланып та укучыларның  бүләкләрен кабул иттеләр. Бәйрәм ахырынды укучылар әниләренә рәхмәт әйттеләр һәм чәй, коймак белән сыйладылар. Бәйрәм бик матур үтте.

29 нчы ноябрь көнне Олы Әтнә урта мәктәбенең актлар залында  "Искиткеч вожатый" бәйгесенең  район туры узды. Бәйгедә һәр мәктәптән вожатыйлар көч сынашты. Эссе язу, үзең белән таныштыру, тест эшләү, педагогик ситуация чишү, уен уйнату - бәйгенең  төп шартлары иде. Бәйгедә иң - иңнәр көч сынашты.Мәктәбебезнең 8 нче сыйныф укучысы Хөснетдинова Ландыш, 11 нче сыйныф укучылары белән беррәттән көч сынашты һәм 3 урынга лаек булды.  Ландыш котлыйбыз сине. Син - искиткеч вожатый!

2018 нче елның 28 нче ноябренда мәктәбебездә Ашыт заказнигы хезмәткәрләре белән очрашу булып үзды.  Рәшит абый Сабиров буш кул белән килмәде, укучыларыбызны котлап, аларга бүләкләр тапшырды.  4 нче сыйныф  укучылары  Хафизов Ислам, Сафина Динә, Калимуллина Гөлия  " Марш парков"  плакатлар бәйгесендә  катнашып, республикакүләмендә призлы урыннар яуладылар. Аларны котлыйбыз, киләчәктә уңышлар  телибез.

6 нчы класслар сыйныф  җитәкчеләре белән берлектә ачык тәрбия сәгате күрсәттеләр. Тәрбия сәгате: "Хөрмәт төбе - хезмәт" дип аталды. Укучылар бу  чарада уңышка ирешү серләрен эзләделәр. Тырышып, үзең эзләп тапкан бәхет кенә кешегә куаныч бирә дип нәтиҗә ясадылар. Үзләре язып килгән эсселәрендә кем булырга дигән хыяллары чагылыш тапкан иде. Укучылар бик активлар, үзләренең фикерләрен җиткереп, халык әйтемнәренә таянып, уңышны бары үз тырышлыгың гына китерә дигән фикердә калдылар. 

ФГОС таләпләренә туры китереп, 8 нче сыйныфта инглиз теле укытучысы Гайнетдинова Алия Рөстәм кызы  инглиз теленнән ачык дәрес күрсәтте. Һөнәр һәм эш  темасы астында укучылар киләчәктә нинди һөнәр үзләштерергә теләүләрен әйттеләр. Аны үзләштерү өчен нинди фәннәрне камил белергә кирәклеген ачыкладылар. Диалог төзеделәр. Группаларда, төркемнәрдә, парларда эшләделәр.

1 нче сыйныфлар кечкенә булуга карамастан, 26 нчы ноябрь  көнне  сыйныф җитәкчеләре Ганиева Люция Фәесхан кызы  җитәкчелегендә "Дуслыкта -көч!" дигән темага ачык тәрбия сәгате үткәрделәр. Алар ребуслар да чиште, уен да уйнады, мәкальләрне дә дәвам иттеләр, апалары укыган хикәя буенча сорауларга да бик матур итеп җавап бирделәр. Тәрбия сәгате укучыларга дуслыкның нинди көчкә ия икәнлеген белү мөмкинлеге бирде. Алар дәрес ахырында  гел дус һәм бердәм булырга сүз бирделәр.

19 нчы ноябрь  көнне  2 нче сыйныф укучылары   укытучы Сафина Резеда Рашат кызы  белән берлектә рус теле фәненнән ачык дәрес күрсәттеләр. Алар дәрестә бер тамырдан булган сүзләр турында өйрәнделәр. Дәрестә укучылар төркемнәрдә, индивидуаль дә  эшләделәр. Проект эшчәнлеге алып бардылар. Аларга төрле алымнар кулланып  экологик тәрбия, әхлак тәрбиясе бирелде. Укучылар бердәм һәм бик актив булдылар. 

2018 нче елның 12 нче ноябреннан 16 нчы ноябрена кадәр мәктәбебездә ата - аналар җыелышлары узды. Җыелышта күтәрелгән төп темалар: икенче чирек нәтиҗәләре, укучы балаларда җаваплылык тәрбияләүдә ата-ананың эшчәнлеге, укучыларның буш вакытын үткәрүдә өстәмә белем бирү һәм дәрестән тыш эшчәнлекнең роле  турында һәм төрлеләрдән  торды. Ата -аналарга  һәр фән укытучысы белән очрашып сөйләшү мөмкинлеге тудырылды, җыелышлар һәр сыйныфта аерым үтте. 

2018 нче елның 15 нче ноябренда 8,10 нчы сыйныф укучыларыбыз Казанда оештырылган "Яшь талантлар" фестиваль -  күргәзмәсендә булып кайттылар. Алар бу күргәзмәдә үзләрен кызыксындырган бик күп сорауларга җаваплар  таптылар. Үзләре дә талантларын күрсәтү мөмкинлеге бар икәнен белделәр. Бик оригиналь эшләр белән танышып, үзләре дә эшләп карадылар. Практикада кулланып карау аларда бик зур кызыксыну уятты. Һөнәр сайлауга да зур этәргеч бирде.