25 нче апрель көнне районда Бөтенроссия татар балалар фестивале узды. Мәктәбебездән  "Әтием - горурлыгым" дип исемләнгән кыска метражлы видеофильм 2 нче турга үтеп, уңыш яулады. 5 нче сыйныф укучысы Садриева Зөхрә (җит.Садриева А.Г.) уңышлы чыгыш ясап, Бөтендөнья татар конгрессы тарафыннан әзерләнгән махсус бүләккә ия булды. Котлыйбыз, Зөхрә, Айваз, Ильярны!

7 нче сыйныф укучылары, рус теле һәм әдәбияты укытучысы Батршина Сания Фаритовна белән берлектә, Күлле Киме авылында урнашкан Сибгат Хәким музеенда экскурсиядә булдылар. Бу сәяхәт аларга проект эшчәнлегендә бик файдалы булды, бик күп мәгълүмат тупларга ярдәм итте.

Укучыларыбыз районкүләмендә үткәрелгән "Куркынычсыз тәгәрмәч " бәйгесендә катнашып, уңышлы чыгыш ясадылар. Бүләккә  өр яңа велосипедка ия булдылар. Укучыларның җитәкчеләре Борханова Римма Нурмөхәммәт кызы һәм  физкультура укытучысы Зарипов Булат Абдул улы да укучыларның уңышларына чиксез шат булып, алда да зур үрләр яуласыннар иде дигән фикердә калдылар. Укучыларыбызны чын күңелдән котлыйбыз, алда  зур уңышлар телибез!

2 нче сыйныф укучылары  , Борханов Фәрит Фоат улы белән берлектә, инглиз теле фәненнән ачык дәрес күрсәттеләр. Кечкенә генә булсалар да инглиз телендә ачык сөйләштеләр, сорауларга бик матур итеп җавап бирделәр. Дәрес буе укытучылары аларга елмаю бүләк итте. Бу көндәге  табигатьтәге матурлык кебек, дәрестәдә матурлык хөкем сөрде. Укучылар Бөекбританиядә һава торышының нинди булуын кызыксынып карадылар, үзебездәге һава торышы белән чагыштырдылар. Дәрес ахырында үзләренә билге куйдылар.

 18 апрель көнне районкүләмендә яшүсмер укучылар арасында "Көрәш" ярышы үтте. Мәктәбебез укучылары: Хөснетдинов Илзат 3 урынга, Ахмадуллин Ильяр 3 урынга, Нәҗмиев Азат 3 урынга лаек булдылар. Әфәрин, егетләр! Уңышлар сезгә!

16 нчы апрель көнне 6 нчы сыйныф укучылары,  физкультура укытучысы Зарипов Булат Абдул улы белән берлектә,  ачык дәрес күрсәттеләр. Укучылар бик актив, иң яраткан фәннәре буенча белемнәре дә яхшы икәнлекне күрсәттеләр. Футбол һәм волейбол уйнау  технологиясен өйрәнеп, ныгыту күнегүләре эшләделәр. Дәрес бик җанлы, актив атмосферада үтте.

15 нче апрель көнне  С.Шакирның  тууына 95 ел тулу уңаеннан мәктәбебездә зур чара үтте. Бирегә  аның кызы Зөбәрҗәт ханым, оныгы Нәргиз, Татарстанның Язучылар берлеге җитәкчесе Данил Салихов, язучы -сатирик Камил Каримов, республика Сынлы сәнгать музееның фәнни хезмәткәре Зөфәр Мөхәммәтшин килгән иде. Директорның тәрбия эшләре буенча урынбасары Гөлнара Сөнгатова  җитәкчелегендә укучылар бик матур чара әзерләделәр. Кунаклар бик шат булып, чиксез рәхмәтләрен белдерделәр.

13 нче апрельдә районкүләмендә инглиз теле фәне буенча  уукчылар бәйгегә әзерләнгән  театр - күренешләрен тәкъдим иттеләр. Мәктәбебезнең  сәләтле укучылары "Алиса  в стране чудес" дип исемләнгән театраль күренеш  күрсәтеп, 3 нче урынга лаек булдылар. Җитәкчеләре  инглиз теле укытучысы Гайнетдинова Алия Рөстәм кызы. Укучыларыбызны уңышлары белән котлыйбыз!