Бүген Ватанны саклаучылар көне уңаеннан, 2-4 нче сыйныф егетләре арасында "Күңелле стартлар" үтте. Укучылар  төрле спорт ярышларында көч сынаштылар.

Бүген укучыларыбыз "Солдатка хат" Бөтенроссия акциясенә кушылдылар. Алар хатларына Ватанны саклаусы егетләребезгә рәхмәтләрен җиткерделәр. Алар белән горурлануларын яздылар.

Бүген 9 нчы сыйныф укучысы Хөсәенов Ислам Ш.Мәрҗәни исемендәге фәнни-гамәли конференциясендә катнашып, 2 нче урын алды. Җитәкчесе: Хөсәенова Р.Р. Котлыйбыз!

Бүген мәктәбебездә сафта җырлап атлау бәйгесе узды. 2-7 нче сыйныфлар катнашты. Жюри тарафыннан укучыларның атлап барулары, рапорт бирүләре һәм җырлаулары бәяләнде.

Бүген 5-9 нчы сыйныф укучылары өчен мәктәбебез укытучылары Хөсәенова Р.Р. һәм Әхмәтҗанова З.Р.  туган тел көне уңаеннан "Җыр булырлык сүзләр биргән, туган телем, рәхмәт сиңа!" дип исемләнгән кичә үткәрделәр. Укучылар бик кызыксынып катнаштылар. Тел турында башлангыч сыйныф укучыларының шигырьләре тыңланылды, җырлар җырланды.

Бүген Батршин Н.Ш укучылар белән  шәхси куркынычсызлык чаралары, шикле предметларны тапканда үз-үзеңне тоту кагыйдәләре, гадәттән тыш хәл шартларында үз-үзеңне тоту кагыйдәләре турында әңгәмә үткәрде

Бүген мәктәбебезнең 5-9 нчы сыйныф егетләре арасында "Ягез әле, егетләр!" бәйгесе булып узды. Егетләр ике командага бүленеп, төрле спорт төрләрендә көч сынаштылар. Калашников автоматын сүтеп җыйдылар. Бәйрәм бик күңелле узды, дуслык җиңде.

Бүген 8-9 нчы сыйныф укучылары Ислейтар урман хуҗалыгыннан килгән Халиуллин Алмаз Накип улы белән очраштылар. Ул урманнарны янгыннан саклау , урман хуҗалыгы сферасына укырга керү турында сөйләде.

Укучыларыбыз Казан дәүләт аграр университеты агрохимия кафедрасы доценты Михайлова Марина Юрьевна оештырган агрокласс укуларында катнаштылар. Алар анда яшелчәләрнең нитрат күләмен тикшерделәр.

Бүген "Кеше тәрбияләү" республикакүләм бәйгесенең муниципаль этабы булып узды. Киңәшчеләр арасында Закирова К.Г. 3 нче урын алды. Котлыйбыз!