Мәктәптә террорчылык куркынычына каршы тору буенча класс сәгатьләре, инструктажлар үткәрелде. Укучыларга мультимедиа презентацияләр ярдәмендә куркынычсызлык кагыйдәләре, терракт куркынычы янаган вакытта үз-үзеңне тоту кагыйдәләре аңлатылды. Укучылар үзләрен кызыксындырган сорауларын да бирделәр. Бер нисбәттән куркынычсызлык кагыйдәләре буенча башка төр инструктажлар да искә төшерелде. 

    Бүген Арча муниципаль районына Бөтенроссия мәгариф хезмәткәрләренең профсоюз җитәкчеләре семинары кысаларында Рәсәйнең төрле төбәкләреннән мөхтәрәм кунаклар килде. Аларны Татарстан Республикасының мәгариф хезмәткәрләре профсоюз җитәкчесе Юрий Прохоров озатып йөрде. Кунакларны Арча районы мәгариф бүлеге җитәкчесе Дәүләтбаев Зөлфәт Миннефар улы һәм Арча районы мәгариф хезмәткәрләре профсоюз җитәкчесе Харисов Вакиф Вагыйз улы җитәкчелегендәге төркем каршы алды. Әлеге төркемдә мәктәбебез укытучылары Рәсәй төбәкләреннән килгән кунакларны милли ризыгыбыз чәк-чәк белән сыйлап, милли моңнар ишеттерделәр, районның яшь укытучылар советы әгъзалары үзләренең чыгышлары белән җәлеп иттеләр.

    Арча районы Урта Курса мәктәбе базасында 2002 нче елда туган һәм аннан яшьрәк укучылар арасында татар-башкорт көрәше буенча бәйге үткәрелде. Әлеге ярышны Арча муниципаль районы башлыгы Нуриев Илшат Гаптелфәрт улы, Курса "МТС"ы җитәкчесе Гыйләҗетдинов Рәүф Гимадетдин улы, Арча районы яшьләр эшләре һәм спорт бүлеге җитәкчесе Габделгазизов Ильяс Нурсил улы, Арча районы мәгариф бүлеге җитәкчесе Дәүләтбаев Зөлфәт Миннефар улы ачып җибәрделәр. Безнең мәктәбебездән, 32 килограмм үлчәүдә, 2 нче урынны Шерматов Р. яулады. Без аны чын күңелдән котлыйбыз! Алдагы ярышларда да уңышлар телибез!

    Рәсәйкүләм "Экологик яз-2017" акциясе старт алды. Шул уңайдан безнең мәктәбебездә дә җанлы эш башланды. Кошларга ярдәм итү, өмәләр уздыру кебек эшләр башкарылып тора. Бүгенге тәрбия сәгатьләрен дә "Тыюлыкларны саклау" темасына уздырдык. Әле алда бу акция буенча бик күп эшләр көтә.

    Каникул алды класс сәгатьләрендә "Сәламәт яшәү рәвеше" турында сөйләдек. Балаларга гигиена кагыйдәләре, чыныгу, дөрес туклану хакында презентацияләр аша күп мәгълүмат бирелде. Каникул чорында үзләрен дөрес тоту, куркынычсызлык кагыйдәләренә дә басым ясалды.

    Казан шәһәре Халыклар Дуслыгы йортында Татарстанның халык шагыйре Рәзил Вәлиевнең тууына 70 ел тулуга багышланган "Дулкыннар" Республика бәйгесендә безнең мәктәбебездән 7 нче сыйныф укучысы Р.Бикчәнтәев тә катнашты. Ул вокал-соло номинациясендә Рәзил Вәлиев сүзләре, Фасил Әхмәтов көенә "Ядкарь" җырын башкарды, шигырь бәйгесендә катнашып, Р.Вәлиевнең "Кеше" шигырен сөйләде. Конкурста катнашучы 600 дән артык бала арасында безнең укучыбыз да бик уңышлы чыгыш ясады.

    Бүген мәктәбебездә районнан килгән психологлар белән очрашу булып узды. Алар балаларның күңел хәләтләре, дөньяга карашлары белән кызыксындылар, киңәшләрен бирделәр. Бу очрашу балалар өчен бик файдалы һәм кызыклы булды. Укучылар психологик тренингта, уеннарда бик теләп һәм бик актив катнаштылар.

    Мәктәбебездә 10 нчы март көнне "Без бергә тату гайлә" исемле бәйрәм кичәсе булды. Бу бәйрәмдә әтиләр һәм әниләр тапкырлыкка, зирәклеккә, уңганлыкка, булганлыкка көч сынаштылар, уйнап-көлеп күңел ачтылар, җырлап-биеп ял иттеләр. Ахырдан бәйрәм чәй өстәле артында дәвам итте.

    Шәхеснең үсеше һәм үз-үзен тотышы, начар гадәтләр, аларның организмга зыяны турында мәгълүмат бирү, укучыларда үз сәламәтлекләренә карата аңлы караш формалаштыру, аларны начар гадәтләргә бирешмәскә өйрәтү, көчле рухлы булырга өндәү максатыннан чыгып бүген 7-9 сыйныфлар белән тәрбия сәгате үтте. “Тәмәке белән тартучы да яна” дигән тема астында үткәрелгән бу тәрбия чарасында укучыларга тәмәкенең зарары, тәмәке тарту организмда нинди катлаулы авырулар китереп чыгаруы, тәмәкегә бәйлелек барлыкка килүе турында аңлатылды. Тәмәке турында түбәндәге мәкальләр китерелде: "Тәмәке белән бергә тартучы да яна", "Тәмәке бетмәс, тартучы бетәр", "Тәмәке теләнергә өйрәтер". Укучыларга мәкальләрнең мәгънәсе аңлатылды, сораулар бирелеп аларга җаваплар тыңланды. Тәрбия сәгате бик эчтәлекле презентация белән үрелеп барды. Ахырдан укучылар шундый нәтиҗәгә килде: тәмәке тарту кебек начар гадәткә каршы тору өчен ихтыяр көче тәрбияләргә, ныклы режим белән яшәргә, спорт белән даими шөгыльләнергә, физик эш эшләргә, тәмәке тартучылардан ераграк торырга.