Тел атналыгы кысаларында бүген командалар өч телдә кызыклы табышмаклар чиштеләр. Табышмаклар җиңелдән бирелмәде, әмма укучылар тырыша торгач 33 табышмакка җавап таптылар. Һәр команда дөрес җаваплары өчен җыйган фишкаларны үзләре ясаган "банкларга" салып куйдылар. Ярыш дәвам итә.
Ә сез "Бүрегенә чыпчык кунганда каравылчы нишли?", "Что может путешествовать по свету, оставаясь на одном месте, в одном и том же углу?" яки "What has two heads, four eyes, six legs and a tail?" кебек сорауларга җавап таба аласызмы?

    Апрель җитүгә күңелләребез Тукай рухы белән тагы да җанланып китә. Бөек Тукаебызны апрель ае биргән, апрель ае алган... Шагыйрь иҗатын укучылар да, өлкәннәр дә бик хөрмәт итә. Шигырьләрен яттан сөйли. Бүген Кушлавычтагы Тукаевлар музей йортында сынчы, балта остасы Хәкимҗанов Мәхмүт Гаделҗан улының күргәзмәсе булып үтте. Мәхмүт абый тумышы белән Кушлавыч кешесе. Бүгенге көндә Әтнә районы Түбән Шашы авылында гомер итә. Ул бүгенге очрашуда укучыларыбызга балачак хәтирәләре белән уртаклашты. Үзенең агач эшенә хирыслыгын бала вакыттан килүен сөйләде...

    Мәктәбебездә бу атна татар, рус, инглиз теле атналыгы диеп игълан ителде. Укучылар бүген атналыкның программасы, үткәрү тәртибе белән таныштылар, өчәр командага бүленделәр. Һәрбер көн төрледән-төрле биремнәргә, ребусларга, кроссвордларга, төрле чараларга бай булачак. Җыелган очколарын алар "фунт стерлинг берәмлегендә", үзләре ясаган банкларгатуплап барачак.
     Бүгенге көн тәртибе буенча, укучылар ребус чишүдән башладылар. Аларга зурдан-зур уңышлар, җиңүләр теләп калабыз!

    Арча районы Яңа Кырлай урта мәктәбе базасында Габдулла Тукайның иҗади мирасын өйрәнүгә багышланган VI Республикакүләм Габдулла Тукай укуларының финал туры үтте. Әлеге бәйге-конференция укытучылар һәм укучылар өчен төрле юнәлешләрдә барды. Укучылар Габдулла Тукай-тәрҗемәче; Бакый Урманче һәм Габдулла Тукай иҗаты; Г.Тукайны төрле елларда өйрәнүләр тарихыннан; Якташ әдибем табигатьне саклау турында яза; "Табигать-тиңсез хәзинә” (Укучылар тарафыннан иҗат ителгән хикәяләр) темалары буенча чыгыш ясадылар. Катнашучылар Республиканың күпчелек районнарыннан җыелган иде. Укытучылар өч юнәлештә эш алып барды. Алар: Мәктәптә, инновацион технологияләр кулланып, Габдулла Тукай иҗатын өйрәнү; Мәгърифәтчеләребез һәм аларның эшчәнлегендә педагогик карашларның чагылышы; Укыту-тәрбия процессында туган як тарихын өйрәнү; Фәнни-гамәли конференциягә КФУ дан укытучы-профессорлар, язучылар берлегеннән күренекле шәхесләр һәм район вәкилләре килгән иде. Җиңүчеләрне дипломнар һәм истәлекле бүләкләр белән тәбрикләделәр.
     Безнең мәктәптән татар теле һәм әдәбияты укытучыбыз Әюпова Рания Фирдүсовна да әлеге бәйге-конференциядә "Мәктәптә, инновацион технологияләр кулланып, Габдулла Тукай иҗатын өйрәнү" юнәлешендә эшен уңышлы яклап призлы III дәрәҗә дипломга лаек булды. Чын күңелдән котлыйбыз!

    Бүген Бөтендөнья рок-н-рол көне. Рок-н-рол АКШта 20 нче гасырның 40 нчы-50 нче елларында барлыкка килә һәм бик тиз популярлашып китә. Шушы уңайдан мәктәптә флеш-моб үткәрдек. Озын тәнәфестә барлык укучылар да рок-н-рол биеде. Берәү дә читтә калмады: һәркем сәләтенчә үзен күрсәтте.

    12 апрель – “Космонавтика көне”. Бу көнне кешелек өчен дөрестән дә әкият чынбарлыкка әйләнә.  1961 елның әлеге көнендә “Восток“ космик кораблендә дөньяның беренче космонавты Юрий Гагарин галәмгә оча. Ракета “Байконур” космодромының беренче старт комплексыннан күтәрелеп китә. “Восток   8К72К” ракета йөрткече җиртирәли орбитага “Восток” космик кораблен чыгара. Әлеге космик корабль белән Советлар Союзының беренче космонавты Юрий Гагарин идарә итә.     “Восток” космоска түбәндәге параметрлар белән күтәрелә:  авышлык – 64,95 градус, җир тирәли әйләнү вакыты – 89,34 минут, җир өслегеннән минималь ераклык 181 км. ә максималь ераклык 327 км. Беренче очыш 1 сәгать 48 минут дәвам итә. Космонавтның җиргә төшү аппараты Саратов өлкәсенә төшә. Җиргә берничә км. калып барганда Гагарин аннан...

    "12 апрель – космонавтика көне" уңаеннан бүген без дә мәктәбебездә укучылар белән төрле чаралар оештырдык. Укучылар сыйныф сәгатьләрендә Юрий Гагарин тормышы турында кызыклы презентацияләр карап белемнәрен арттырдылар һәм көн дәвамында “108 минут” дигән кинофильмнан күреп ул чактагы вакыйгалар барышының шаһите дә булдылар.

    Бүген сыйныф сәгатьләре экология темасына багышланды. "Табигатьне һәркем сакларга тиеш! Моны һәркем белә, ләкин бөтен кеше дә үтәми." дигән башисем астында укучылар белән җанлы әңгәмә оештырылды. Экологияне пычрату сәбәпләре ачыкланды. Укучылар авылдагы чишмәләр, елга-күлләр турында сөйләделәр. Үзләренең көченнән килгәнчә ярдәм итүләре турында фикер алыштылар. Алга яңа планнар да куелды.

    Мәктәбебездә "СМС-балалар" хәрәкәте укучылары чираттагы акцияне уздырдылар. Ул наркотикларга каршы "Будь готов! Скажи нет!" дип атала иде. Укучыларга листовкалар тараттылар, плакатлар ясадылар. Соңыннан тирән мәгънәле видеофильм карап белемнәрен тагын да тирәнәйттеләр.

    Кечкенә сыйныф укучыларын тагын бер кабат язгы куркынычсызлык кагыйдәләре белән таныштырдык. Класс сәгатьләрендә язгы ташу чорында елга буйларында, урамнарда үзеңне ничек тотарга кирәк икәнлеге җентекләп аңлатылды. Яз көне тирә-юньне җыештырганнан соң, җыелган чүп-чарны юк итү максатыннан, учаклар якмаска кирәклеге кисәтелде. Укучылар белән "Яз - матур да, куркыныч та" дип аталган презентация карадык.