3 нче сентябрь көнне табигать фәннәре укытучысы Гаффарова Дамирә Вәкилевна "Яшел Россия" акциясе буенча класс сәгате үздырды. Укучылар туган як, аның табигате буенча күзаллауларын рәсемнәрдә сурәтләделәр. Бу атнада экологик өмә оештырырга планлаштырабыз.

1 нче сентябрь көнне “Без талантлылар” исеме астында класс сәгатьләре узды. 10 нчы класс җитәкчесе Мәннанова Л.Р.-ның класс сәгатендә, безнең мәктәпне тәмамлап, Казан федераль университетының журналистика факультетында белем алган  бүгенге көндә “Безнең гәҗит” газетасында, “Сөембикә” журналында  махсус хәбәрче булып эшләүче Мостафина Фәнзилә Рамилевна катнашты. Ул укучыларны журналист булу серләренә төшендерде, эштә килеп чыгарга мөмкин кыенлыклар белән таныштырды.

1 нче сентябрь. Бу айга аяк басу белән шатлыклы да бераз мәшәкатьле дә көннәр башлана. Бүген мәктәпләрдә һәр бала көтеп алган , кызыклы вакыйгаларга бай булган , яңа уку елы башланды. Бүгенге бәйрәм белән котларга безнең мәктәпкә  кунаклар да күп килде. Район Cоветы депутаты, шәхси эшмәкәр Төхбәтуллин Динар Илдарович, җирле үзидарә рәисе Сираҗетдинов Фәргать Гарәфетдинович, шәхси эшмәкәр Сабиров Айдар Фәритович укучыларга матур теләкләрен җиткерделәр, бүләкләр тапшырдылар. Мәктәп директоры Ибраһимов Алмаз Ринатович  бу уку елында мәктәп алдында торган бурычларны атады. Үз чыгышында килгән яшь белгечләр белән таныштырды, ветеран укытучыларның хезмәтен бәяләп, бүләкләр тапшырды. Күңелләрдә сөенеч, йөзләрдә шатлыклы елмаю балкый. Яңа уку елы һәркемгә шатлык, бары тик 4 һәм 5 билгеләре генә алып килсен. 

   29 нчы август көнне районыбыз мәктәпләре укучылар ярминкәсендә катнашты.  Бу чарада безнең мәктәп коллективы да активлык күрсәтте. Җәй буена укучылар һәм укытучылар, хезмәткәрләр көче белән үстерелгән җиләк-җимеш, яшелчә сатуга куелды.Һава торышы бераз комачаулап торса да, сату уңышлы булды. Район халкы алып килгән продукциядән канәгать калды.

    Республикабызда  традициягә әйләнгән “Беренче класс укучысына мәктәпкә хәзерләнергә ярдәм ит” акциясе бу елны да киң колач белән үтте. Бу акциядә безнең мәктәптән 7 укучы катнашу хокукы алды. 12 нче август көнне мәктәптә матур чара узды. Бу уку елына киләсе беренче класс укучыларына изге теләкләр җиткерелде. Башлангыч класста белем алучылар үзләренең сәнгатькә битараф булмауларын җыр , биюләр музыкаль  инструментта оста итеп уйный белүләре белән расладылар. Беренче класска килүче укучылар һәм аларның ата-аналарын котларга, бүләкләр тапшырырга район мәрхәмәтлелек үзәге җитәкчесе Аглиев Илдус Котдус улы да килгән иде. Ул укучыларга белемгә омтылыш, ата-аналарга сабырлык теләде. Балалар алган бүләкләреннән канәгать калдылар, ата-аналар район администрациясенә, мәктәп җитәкчелегенә  шушындый чараларны үткәргән өчен рәхмәт җиткерделәр.

Мәктәп еллары һәр кешенең тормышында иң истәлекле, иң кадерле, иң бәхетле еллар. Чыгарылыш сыйныф укучыларының мәктәп белән хушлашу, киләчәккә, олы дөньяга беренче адым ясаган көннәре булып истә калыр бүгенге көн. Дәүләт имтиханнарын уңышлы гына тапшырдылар, үзләре теләгән уку йортларына керү насыйп булсын аларга.

Имтиханнар инде артта калды,

Җыелыштык соңгы бәйрәмгә.

Һәркем тоя үзен әзер итеп

Таулар, диңгезләрне кичәргә.

Еллар узгач, сагындырыр инде

Балачакның соңгы бәйрәме.

Еларгамы, көләргәме бүген-

Күңелләрнең иләс бер мәле.

Укучыларның "Кояшкай" лагеренда ял итүләренең соңгы көннәре якынлаша. Бүген бездә Сабантуй. Ай дәвамында  тупланган көчеңне , бар булган сәләтеңне күрсәтү көне дә бүген. Ә алда балаларны матур табигать, җиләкле аланнар, җимеш тулы алма бакчалары көтә. Сәламәтлек, тыныч көннәр телибез без барлык хезмәттәшләр, ата-аналар һәм балаларыбызга.

Районыбыз истәлекле урыннарга бик бай. Уку чорында без аларның барысында да булырга тырышабыз. Лагерь начальнигы Хәйретдинова В.Р. балаларны Тукай Кырлай музеена алып барды. Балалар тагын бер тапкыр Г.Тукайның биографиясенә бәйле төп моментларны искә төшерделәр. Үзләре белгән шигырь, әкиятләрне сөйләргә дә мөмкинлек табылды. Вожатыйлар Сабирова Р.Р., Йосыпова Р.К. экскурсиядән балаларның канәгать калуын җиткерде.