Сезне ихлас күңелдән 50 яшьлек юбилеегыз белән котлыйбыз. Сезгә аяз күк йөзе, корычтай нык сәламәтлек, кояштай озын гомер, чиксез шатлыклар телибез. Сабыр холыклы, мәрхәмәтле, ярдәмчел, кешелекле сез . Киләчәктә дә киң күңелле, ачык йөзле, олы йөрәкле булып калыгыз. Ходай насыйп итеп сезгә алдагы көннәрегездә дә сәламәтлек белән гомер итәргә, балаларыгызның шатлыкларына сөенеп яшәргә язсын иде.

Тормыш юлыгыз һәрчак балкып торсын,

Ягымлы, шат булсын күңелегез.

Озын гомер, бәхет-шатлык белән,

Бер кайгысыз үтсен гомерегез!

Зур бәхетләр юлдаш булсын сезгә,

Көннәрегезне шатлык бизәсен.

Сәламәтлек — ярты бәхет, диләр,

Шунсы бигрәк читләп үтмәсен!

Лесхоз урта мәктәбендә мәгариф хезмәткәрләренең өстәл уеннары буенча зона ярышлары булып узды. Арча гимназиясе, 4 нче балалар бакчасы Урта Пшалым мәктәбе, Арчаның 7 номерлы мәктәбе, Лесхоз мәктәбе һәм Түбән Мәтәскә мәктәбе укытучылары шашка, шахмат буенча көч сынаштылар. Безнең мәктәп командасы зур уңышлар белән кайтты: өч беренче (Дәүләтбаев З.М.- шашка, Фазылҗанова Н.М. – шахмат, Фазылҗанов Г.Г. – шахмат), бер икенче урын (Закирова Л.А. – шашка). Район ярышларында укытучыларыбызга уңышлар телибез!

29 нчы декабрь көнне мәктәбебездә гомуми ата-аналар җыелышы булып узды. Җыелышта математика укытучысы Әскәрова Р.А. “Бала чакта алынган тәрбияне соңыннан дөнья халкы үзгәртә алмас”, дигән темага чыгыш ясады. Уку-укыту эшләре буенча директор урынбасары Гибадуллина З.Ш. 2 нче чирек нәтиҗәләре, белем сыйфаты, өлгереш, олимпиада нәтиҗәләре һәм укучыларның уңышлары белән таныштырды. Мәктәп директоры Дәүләтбаев З.М. “Госуслуга” ның тормышта уңайлы яклары турында җентекләп аңлатты. Алга таба чирек йомгаклары буенча сөйләшү классларда дәвам итте.