Кошлар көне мәктәптә гөрләп узды. Бәйрәмгә әтиләр дә чакырулы иде,  ул-кызларына сыерчык оялары ясауда булышкан бит алар. Иң матур оя ясаучылар ачыкланды бәйрәмдә. Әтиләр Советы рәисе И.Гаянов ярдәме белән һәр балага бүләкләр дә әзерләнгән иде.

Бүген мәктәбебез бер төркем укучылары, Пушкин картасыннан файдаланып, Актаныш гимназиясенә кунак буларак чакырылган психолог, лектор, консультант, гештальт-терапевт Алексей Анатольевич Бабаянц белән очрашуда катнаштылар.

30 март көнне мәктәптә "Мәктәп һәм гаилә: балаларны законтыңлаучан итеп тәрбияләү" темасына ата-аналарның гомуми җыелышы узды. Җыелышта бу уку елында мәктәптә алып барылган тәрбия эшчәнлеге хакында тәрбия эшләре буенча директор урынбасары Г.Хөҗҗәтова чыгыш ясады. Авыр гаиләләр һәм алар белән алып барылган эшчәнлек белән "Татарстан Республикасы Хезмәт, халыкны эш белән тәэмин итү һәм социаль яклау министрлыгының Актаныш муниципаль районындагы халыкка комплекслы социаль хезмәт күрсәтү  "Игелек үзәге" ДУ социаль эш буенча белгече  Р.Гәрәева таныштырды. Укучыларның сәламәтлегенә кагылышлы проблемалар турында җирлекнең Югары Богады фельдшеры Р.Заһитова сөйләде. Әтиләр Советы җитәкчесе И.Гаянов алдагы атнада әти-әниләр белән бергәләп үткәреләчәк Кошлар көне чарасына чакырды. Җыелышка йомгакны мәктәп директоры В.Салихов ясады.

"Киләчәккә адым" фестиваль -бәйге күргәзмәсендә 7 нче сыйныф укучысы Энҗе Хисамова (җит. Л.Фәттахова) үзе теккән хуҗабикәләр сумкасы - шоперлар белән катнашты.

"Илһам" бөтенроссия яшь язучылар бәйгесенең бүген Чаллы шәһәрендә үтүче зона этабында безнең мәктәптән Энҗе Арсланова, Таңсылу Хафизова (җит. Г.Хөҗҗәтова) үз көчләрен сыный. Уңышлар юлдаш булсын!

Минзәлә татар дәүләт драма театры 15 март көнне Актанышта укучылар өчен сугыш турында татар шагыйрьләре әсәрләренә нигезләнеп эшләнгән спектакль күрсәтте. Безнең укучылар да, Пушкин картасын файдаланып, әлеге шигъри әсәрне тамаша кылдылар.

Тәрбия эшләре буенча директор урынбасарлары, педагог-оештыручылар һәм сыйныф җитәкчеләре арасында узган һөнәри бәйгеләргә бүген йомгак ясалды. Җиңүчеләр "Яшьлек " яшьләр үзәгендә хөрмәләнде. Мәктәбебездән Гөлзифа Роберт кызы Нуриева һәм Хөҗҗәтова Гөлназ Илгизәр кызының да шулар арасында булуы - икеләтә куаныч.

Март уртасы димәссең, чын кыш салкыны бу көннәрдә. Хоккей җене кагылган егетләребезгә шул гына кирәк тә! Бүген Байсар мәктәбе шугалагында безнең Богады командасы боз хуҗалары һәм Әлем хоккейчылары белән дусларча очрашты. Бозда ут уйнатты егетләр!

9 март көнне укучылар район мәдәният йортында "Төрки йөзлэр" дип аталган  күргәзмәгә бардылар.  Анда рәссам Ландыш Мәгъдәнурованың картиналар һәм милли татар калфаклары күргәзмәсен сәйран кылдылар. Милли киемнәр киеп, тарихи шәхесләр -  хан һәм ханбикә, сарай вәзирләре белән сурәткә төштеләр. Теләге булганнарны образына туры китереп, бизәндерде һәм прическа да ясадылар. Шундый кызыклы, заманча проектны әзерләүче, тормышка ашыручыларга зур рәхмәт!

Иң матур бәйрәм - дөньяга тормыш бүләк итүче, матурлык таратучы гүзәл затларыбыз көне, хатын-кызлар бәйрәме белән мәктәбебез егетләре укытучыларны иртән линейкада котлады.