КОТЛЫЙБЫЗ!
"Балалар хәрәкәтенең иң яхшы 100 идеясе проекты"нда катнашучылар арасында тавыш бирү нәтиҗәләре билгеле!
Иң күп тавыш җыеп,
"Яшьләрне финанс белеме һәм бизнес алып баруга өйрәтү үзәген ачу" проекты белән, гимназиябезнең 7В сыйныф укучысы
Сәлахова Валерия җиңү яулады.
Афәрин, Валерия!

Атналык дүшәмбе линейкасы бүген – 25 ноябрь көнне, 5-11 сыйныфларның, “Адымнар” комплексында узды. Дәүләт флагларын күтәрү һәм гимннар җырланганнан соң, гимназиябезнең үзидарәсе президенты Инсаф Нигъматдинов линейканы гимназиянең сөрәне белән дәвам итте.
Гимназиябезнең укыту эшләре буенча директор урынбасары Рәйхан Филүс кызы Галимҗанова узган атнадагы эшчәнлеккә йомгак ясап, атна дәвамында булачак чаралар белән таныштырды.
Методик һәм инновацион эшчәнлек буенча директор урынбасары Юлия Валентин кызы Әмирҗанова фән олимпиадаларының район этабында рус әдәбияты, дөнья сәнгать мәдәнияте (мхк), тарих, физика фәннәреннән җиңү яулаган укучыларыбызга линейкада дипломнар тапшырылды.
Узган атнада 8А сыйныфы кизү торды. Атна дәвамында эчке тәртипне саклады алар,үз-үзләрен тотышлары белән дә үрнәк күрсәттеләр. Бу атнада гимназиябездә 7В сыйныф укучылары дежур тора.

Бүген - 20 ноябрь көнне гимназиябез Сарман районыннан кунаклар кабул итте.
Сарман районының башкарма комитет җитәкчесенең социаль мәсьәләләр буенча урынбасары Cәхипова Индира Рәис кызы, район мәгариф бүлеге җитәкчесе Исмәгыйлова Гөлназ Тәлгать кызы, аның урынбасарлары, мәктәп директорлары гимназия эшчәнлеге белән танышып, укыту һәм тәрбия өлкәсендәге казанышларны, үрнәк алымнарны өйрәнде.

Гимназиябезнең 9 сыйныф укучылары бүген – 20 ноябрь көнне рус теле буенча йомгаклау әңгәмәсе биреп карады. Ул төп дәүләт имтиханына керү мөмкинлеге булып тора. Сынау алып карау 9.00 сәгатьтә башланып китте. Укучыларыбызга тел ачкычлары, зирәк зиһен, уңышлар телибез.
Имтихан 15 минут дәвам итә һәм 4 этапны үз эченә ала: текстны уку һәм сөйләп чыгу, монолог, диалог.

Татарстанның халык артисты, композитор, көрәшче Вил Усманов гимназиябез укучылары белән очрашып, лидерлык дәресе уздырды.
Гимназиябез белән танышып, укучылар белән аралашып үзе дә мәктәп елларына кайткандай булды ул. “Адымнар” комплексында белем алучы балаларга, тудырылган мөмкинлекләргә соклануын яшермәде.

3А сыйныф укучылары, класс җитәкчесе Ания Хасип кызы җитәкчелегендә, районыбызның полиция бүлегендә экскурсиядә булдылар.
Полиция бүлегендәге музейда Вахитов Васил Актаныш милициясенең оешу тарихы, Актаныш милициясе тарихында якты эз калдырган шәхесләр турында сөйләде. Кызыклы экспонатлар, төрле елларда киелгән формалар, милиционер коралларына күзәтү ясады.
Музейдан соң, утырышлар залында, өлкән полиция лейтенанты Алия Хазиева, юл хәрәкәте куркынычсызлыгы учреждениесе җитәкчесе Ләйсән Мухаметова белән очраштылар укучылар.

Казан федераль университетында "Цифрлы дидактика: инсайтлардан алып реаль технологияләргә кадәр" Халыкара фәнни-гамәли конференциясе узды бүген.
Директорның цифрлаштыру буенча урынбасары Ленар Наил улы Хөсәенов, методик-инновацион эшчәнлек буенча урынбасар Юлия Валентиновна Әмирҗанова, тәрбия эшләре буенча директор урынбасары Ленар Зөфәк улы Шәвәлиев әлеге конференциядә булып,
цифрлы мәгариф чишелешләре өлкәсендә педагогик тәҗрибә алмашты.
Конференцияне оештыручылар - Татарстан Республикасы Мәгариф һәм фән министрлыгы, Үзәкнең партнерлары ярдәмендә Казан федераль университетының Филология һәм мәдәниятара коммуникацияләр институтының EduTech цифрлы мәгариф технологияләре үзәге.

Гимназиябез укытучылары һәм укучылары «Татарча диктант – 2024» Бөтендөнья акциясендә катнаштылар бүген. Акциянең төп максаты – татар теленә һәм мәдәниятенә игътибарны җәлеп итү, татар телен яратучыларны берләштерүгә юнәлтелгән.
Диктант өчен язучы Ш.Камалның «Матур туганда» повестеннән өзек сайланды.

Диктантның текстын ТР атказанган мәдәният хезмәткәре Нур Хөсәенов, гимназиябезнең татар теле укытучылары Чулпан Шәрипова, Айгөл Әхмәтгалиева укыды.

Бүгенге көндә "Татарча диктант" – Татарстан Республикасында, Россиядә һәм чит илләрдә яшәүче татарларны берләштерүгә ярдәм итүче акцияләрнең берсе.

Гимназиябездә, көзге каникуллардан соң, грипп, коронавирус инфекциясе таралу очракларын кисәтү, булдырмас өчен барлык кисәтү һәм саклану чаралары да күрелә. Иртәнге фильтр – температураны үлчәү ышанычлы саклану булып тора. Һәр иртәне гимназиябезнең “Адымнар” комплексында да, башлангыч корпуста да укучыларның тән температурасы шәфкать туташлары тарафыннан үлчәнә.
Фотоларда – шәфкать туташы Раушания Илгизәр кызы Насыриева иртәнге фильтр вакытында.

8 ноябрь көнне гимназиябез Мөслим районыннан кунаклар кабул итте.
Мөслим районының башкарма комитет җитәкчесенең социаль мәсьәләләр буенча урынбасары Бадретдинова Марина Ранас кызы, район мәгариф бүлеге җитәкчесе Хәбибуллина Лилия Ягди кызы, аның урынбасарлары гимназия эшчәнлеге белән танышып, укыту һәм тәрбия өлкәсендәге казанышларны, үрнәк алымнарны өйрәнде.