Бердәмлек, горурлык һәм яңа юллар башы.
Менә килеп җитте ул көтелгән мизгел — тугызынчы сыйныфны тәмамлау. Бу уку елында безнең чыгарылыш кичәбез аеруча истәлекле булды: аттестатлар тапшыру тантанасы тарихи Болгар шәһәрендә узды.
Иртә белән укучылар һәм укытучылар борынгы җиргә юл тотты. Болгарның гүзәл табигате, изге урыннар һәм архитектура һәйкәлләре кочагында үткән экскурсиядән соң, балаларның кәефе тагын да күтәренке иде. Алар якын дуслары белән истәлекле урыннарда фотога төшеп, бу матур мизгелләрне мәңгеләштерделәр.
Төп вакыйга — аттестатлар тапшыру тантанасы бик җылы һәм тантаналы шартларда узды. Чарада катнашкан кадерле кунакларыбыз — мәктәп директоры, сыйныф җитәкчеләре һәм әти-әниләр — егетләребезгә һәм кызларыбызга иң изге теләкләрен җиткерделәр.
Болгар дәүләт тарихи-археологик тыюлыгының өлкән фәнни хезмәткәре, тарих фәннәре кандидаты- Җәмил Габдерәхим улы Мөхәммәтшин укучыларга истәлекле бүләкләр тапшырды.
Хөрмәтле тугызынчылар! Сез олы тормышка беренче җитди документыгызны — төп гомуми белем турында аттестат алдыгыз. Алда сезне төрле юллар көтә: кемдер укуын 10-11 сыйныфларда дәвам итәр, ә кемдер һөнәри белем бирү юлын сайлар. Нинди генә юл сайласагыз да, сез — безнең горурлыгыбыз!
Мәктәп коллективы исеменнән барыгызга да рәхмәтебезне белдерәбез. Алга таба да уңышлар, зур үрләр, ныклы сәламәтлек һәм бәхетле киләчәк телибез! Ак юллар сезгә, кадерле укучыларыбыз!

Мәктәп яны лагерендә саубуллашу көне!

Бүген безнең мәктәп яны лагерында чып-чын милли бәйрәм узды! Көн тулысынча халкыбызның гореф-гадәтләренә һәм уеннарына багышланды.
Иң элек без барыбыз да бергәләп иң тәмле эшкә — өчпочмаклар пешерергә тотындык. Һәр бала үзенең камырын җәеп, эчлеген салып, үз куллары белән милли ризык әзерләде. Ә инде тәмле исләр чыгарып мичтә пешкән арада, без дә тик тормадык.
Өчпочмакалар пешкән арада без милли уеннарда көч сынаштык:
* Капчык киеп йөгерүдә җитезлекне күрсәттек.
* Бүрәнә өстендә капчык белән сугышуда иң кыюлар ачыкланды.
*Колгага менеп укучылар үзләренең булганлыкларын күрсәттеләр.

Көн бик күңелле һәм милли рухта узды. Балалар рәхәтләнеп уйнадылар, аралаштылар һәм, әлбәттә, үзләре пешергән тәмле ризыклар белән сыйландылар.

Мәктәп яны лагереның соңгы көннәре бик тиздән тәмамланачак. Балалар инде тулысынча җәйге иреккә чыгарга әзерләнә, шуңа күрә безнең өчен аларның иминлеге — иң мөһиме. Лагерьның бу соңгы сменасында без янгын куркынычсызлыгына багышланган махсус көн үткәрергә булдык.
Бу теманың никадәр актуаль икәнен аңлап, балалар белән мавыктыргыч һәм файдалы чаралар оештырдык:
* Рәсем ясау. Барлык отрядлар да «Ут – дус та, дошман да» темасына рәсемнәр ясады. Кечкенәләр уттан саклану кагыйдәләрен үз фантазияләре аша сурәтләргә тырышса, зурраклары янгын сүндерүчеләрнең батырлыгын кәгазьгә төшерделәр.
* Кагыйдәләрне искә төшерү. Без «Нишләргә?» һәм «Нишләргә ярамый?» уенын уйнадык. Балалар бертавыштан: «Өйдә шырпы белән уйнарга ярамый», «Электр приборларын караучысыз калдырмаска кирәк», «Төнлә зарядкада телефон калдырырга ярамый» дип кабатладылар. Шулай ук янгын чыккан очракта нишләргә кирәклеген дә искә төшердек.
Ә иң кызыгы шунда иде: безнең пешекче апалар, барлык янгын куркынычсызлыгы таләпләрен катгый үтәп, учак ягып, зур казанда тәмле плау пешерделәр. Учакта пешкән плау искиткеч тәмле булды
Бүгенге көн барыбыз өчен дә файдалы узды. Балалар белемнәрен ныгытты, ә без аларның иминлеген кайгыртып, дөрес юнәлеш бирә алуыбызга сөендек. Алда — озын җәй, ә бүген алган сабаклар аларга һәрвакыт ярдәм итсен иде.

Бүген безнең мәктәп яны лагеренда 22 июнь — Хәтер һәм кайгы көне уңаеннан бик дулкынландыргыч чаралар узды. Без бу датаны балаларга тарих турында сөйләү генә түгел, ә аларның күңелендә тирән эз калдырырлык итеп үткәрергә тырыштык.
Көн рәсем ясаудан башланды. Балалар тынычлык һәм батырлык темасына үзләренең иҗади эшләрен тәкъдим итте. Ләкин иң мөһим вакыйгалар мәктәптән читтә булды.
Башта без Бөек Ватан сугышында һәлак булган якташларыбыз истәлегенә куелган һәйкәлгә венок салдык. Бу тынлык минутларында һәркем үз уйларына бирелде. Кайбер укучылар мемориаль тактадан үз бабаларының исемнәрен эзләде.
Аннан соң без "сугыш чоры балалары" янына юл тоттык. Аларның сөйләгәннәре беркемне дә битараф калдырмады. Алар безгә ачлы-туклы балачакларын, ничек итеп олылар белән бертигез авыр хезмәттә эшләүләрен сөйләделәр.
Бу тормышчан хатирәләр ярдәмендә безнең балалар үзләренең никадәр бәхетле икәнлекләрен, бүгенге тыныч һәм рәхәт балачакларының кадерен тагын да ныграк аңладылар.
Мондый очрашулар хәтерне сакларга һәм буыннар арасындагы бәйләнешне өзмәскә ярдәм итә.

Шимбә көнне без, "Дуслык" лагерына йөрүче балалар белән, Казанга мавыктыргыч экскурсиягә юл тоттык. Бер көн эчендә фән дөньясына чумдык, цирк тамашасыннан ләззәт алдык һәм экзотик хайваннар белән таныштык.
Беренче тукталышыбыз — Фән һәм техника йорты иде. Биредә безнең өчен мавыктыргыч экскурсия үткәрделәр. Экскурсовод көндәлек тормышыбызны яктырткан гаҗәеп күренешләр турында сөйләде: гравитация көченең серләрен ачты, галәм һәм электр энергиясе турында бик күп яңа мәгълүмат белдек. Музейдан без тулы белем багажы белән чыктык.
Аннан соң «Казан» циркына юл тоттык. Анда барган «Акварель» программасы искиткеч иде. Гимнастларның искиткеч трюкларын карап, тын алырга да куркып утырдык, биюләрен сокланып күзәттек һәм клоуннарның шаян чыгышларыннан рәхәтләнеп көлдек.
Сәяхәтебезнең ахыргы ноктасы — Казан зооботаника бакчасы булды. Биредә без үз күзләребез белән арыслан, гепард, зур филләр, әкрен кыймылдаучы ташбакалар һәм көчле горилла кебек гаҗәеп җан ияләрен күрә алдык.
Бу көн безгә онытылмаслык хис-кичерешләр бүләк итте.

Бүген безнең мәктәп яны лагеренда көн тулысынча юл хәрәкәте иминлегенә багышланды! Куркынычсызлык кагыйдәләрен белү — тормыш өчен иң кирәклесе, ә без аны мавыктыргыч итеп өйрәнергә булдык.
Көн иҗаттан башланды. Балалар үз фантазияләрен эшкә җигеп, юл хәрәкәте кагыйдәләренә багышланган искиткеч рәсемнәр ясадылар.
Аннан соң без барыбыз да юл билгеләре белгечләренә әйләндек. Таныш билгеләрне кабатладык, ә иң кызыгы — рәсем буенча нинди билге икәнен табу уены иде. Бу зирәклек һәм игътибарлылыкка менә дигән күнегү булды!
Интеллектуаль ярышлардан соң, әлбәттә, бераз хәрәкәтләнеп алырга кирәк иде. Көн ахырында барыбыз да саф һавага чыгып, төрле хәрәкәтчән уеннар уйнадык. Һәм тагын бер тапкыр иң мөһим кагыйдәне искә төшердек: хәрәкәт — ул тормыш, тик имин булганда гына!

Лагерьга йөрүче балалар белән Хуҗалар тавында булып кайттык. Һәркем күңеленә хуш килгән шөгыльне тапты: кемдер балыклар ашатты, кемдер ял итү урнында уйнады, чишмә суы белән коенучылар да булды, тауга да менеп төштек. Бик чыдамнар берничә тапкыр да менделәр. Бергәләп гамбургер ясап ашадык.
Бик күңелле ял итеп кайттык.

Үз тарихыбызны, бай мәдәниятебезне һәм зур илебезнең бердәмлеген бәяләүнең мөһимлеген искә төшерә торган бәйрәм. Бу безнең Ватаныбыз өчен горурлык көне!
“Дуслык” лагерендагы балалар Ватанга мәхәббәтләрен белдерү өчен «Россия тәрәзәләре» дип аталган Бөтенроссия акциясенә кушылды!
Балалар мәктәп тәрәзәләрен чын арт-объектка әйләндерделәр. Иҗат аша алар үз илләрен никадәр нык яратуларын күрсәттеләр, чын мәхәббәт кечкенәдән башлана бит.
Төсле акбурлар белән асфальтта, карандаш , буяуллар белән альбом битләрендә матур-матур рәсемнәр ясадылар.
Бергәләп флешмоб та биеп алдык. Әйе, башта өйрәнүе авыррак булды, ләкин соңыннан туктыйсы да килмәде. Бергә бию – ул дуслыкның иң яхшы юлы.

Авылыбыз буйлап агучы Чирмешән елгасының икенче ярында башка авыл, хәттә башка район һәм башка милләт кешеләре урнашканлыгын барыбыз да белә. Ике авылны, ике милләт халкын сыгылмалы басма тоташтырып тора. Без ел саен лагерь белән шушы басмага экскурсиягә йөрибез, ә бу елны басманың икенче ягына чыгып, күрше авыл белән дә танышып кайтырга булдык. Авылны бик җентекләп өйрәндек, кибеттән тәмле туңдырма алып ашадык .
Ә көннең иң мөһим вакыйгасы- күрше авылдагы мәктәп алды лагеры балалары белән очрашу һәм танышу булды. Алар безгә бик теләп үзләренең милли уеннарын уйнап күрсәттеләр. "Ал тирәк, гөл тирәк" уенын бергәләп уйнадык , беренче безнеңчә -татарча итеп, аннары чувашча. Әлеге уенны алар да уйный икән.
Көнебез бик күңелле һәм файдалы узды.Көн дәвамында без башка милләт кешеләре белән якыннан таныштык, яңа дуслар таптык, кызыклы мәгълүмат тупладык.