Балалар  китапханәсе хезмәткәрләре Сарман гимназиясе белән тыгыз бәйләнештә эшләп килә. Шушы көннәрдә алар 1 нче сыйныф укучылары белән берлектә “Укучының мәдәни көндәлеге” бәйрәмен үткәрдәләр. Театральләшкән тамаша булып оештырылган әлеге бәйрәм укучылар күңелендә бары тик якты хатирәләр генә калдырыр.

Сарман гимназиясе укучылары ел әйләнәсендә өлкәннәр белән эшне дөрес оештыра. Ялгыз әби-бабайларга, ярдәмгә мохтаҗ булганнарга кулларыннан килгәнчә булышу өчен алар әледән-әле шефлыкка алганнарның хәлләрен белешәләр, бакча һәм өй эшләрендә булышалар. Әлеге фотосурәттә - гимназиянең 10 нчы А сыйныфы укучылары. Алар сыйныф җитәкчеләре Салихова Алсу Нисбәт кызы белән берлектә һәрвакыт изге эшкә әзер.

18 нче сентябрь көнне мәгариф хезмәткәрләре арасында бадминтон буенча ярыш оештырылды. Бу ярышта Сарман гимназиясе командасы да читтә калмады, уңышлы гына чыгыш ясап, призлы урынга лаек булды. Аеруча гимназиянең татар теле һәм әдәбияты укытучысы Арсланова Гөлия Мөхәммәтлатыйп кызының 2 нче призлы урынга лаек булуын билгеләп үтәбез. Алга таба да гимназия командасы яхшы хәбәрләр белән генә куандырып торыр дигән өметтә калабыз.

Сарман гимназиясендә төрле оешма-предприятиеләрдән килгән кунаклар, алар белән очрашулар, кызыклы әңгәмәләр гел булып тора. Кичә, ягъни 18 нче сентябрь көнне, районыбызның эш һәм мәшгульлек оешмасы белгечләре укучылар алдынды чыгыш ясадылар. Алар бүгенге көндәге иң кирәкле һөнәрләрне санадылар, дөрес итеп профессия сайларга үзләренең киңәшләрен бирделәр.

«Профсоюз атнасы” кысаларында Сарман гимназиясенең һәр сыйныфында профсоюз оешмасының эшчәнлеге, аның һәмияте турында әңгәмәләр үткәрелде. Укучы кече яшьтән үк киләчәк тормышка әзер булып үсәргә тиеш. Шул максат белән оештырылган әлеге чара балаларда профсоюз оешмасына уңай мөнәсәбәт тудыруда хәлиткеч роль уйный. Укучылар мәктәп яшеннән үк  нинди мөмкинлекләрдән файдаланырга була икәнлекне белеп үсәргә тиеш.

Узган уку елыннан башлап Сарман гимназиясе түләүле хезмәт күрсәтү өчен лецензиягә ия булды. Шул уңай белән мәктәп укучылары өчен түгәрәкләр оештырылып, белемнәрен тирәнәйтү өчен мөмкинлекләр ачылды. Әлеге хезмәттән кергән акчаның бер өлеше укытучыга хезмәт хакы буларак түләнсә, икенче өлешенә мәктәп өчен кирәк булган кайбер әйберләрне булдыруга мөмкинлек ачылды. Мәсәлән, география кабинеты өчен 12 кечкенә һәм 1 зур глобуслар алынды, башлангыч звенода бер сыйныфка ленолиум җәелде. Әлегә бу саннар бик кечкенә кебек тоелса да, тамчыдан күл җыелганын исәпкә алганда, алга таба гимназиябез базасын тулыландыру буенча эшләр тагы да алып барылыр дигән өметтә калабыз.

Узган атнада Сарман гимназиясендә ата-аналар җыелышлары булып үтте. Анда гимназиябез директоры Шамилова Ләйсән Хәниф кызы гимназиябез яңалыклары белән һәм гомуми тәртип белән таныштырды, укыту эшләре буенча директор урынбасары Гарипова М.И. узган уку елына нәтиҗә ясады һәм имтихан сайлауда киңәшләрен бирде, психолог Галялиева В.Н. имтиханнарга әзерләнүдә әти-әниләрнең роленә тукталып китте, Алиуллин Ф.Ф. җинәятьчелекне булдырмау өстендә эшне күрсәтте. Җыелыш бик эшлекле төстә узды. Ата-аналар үзләрен кызыксындырган сорауларга җавап алдылар, тәкъдимнәрен җиткерделәр. Кулга-кул тотынышып эшләүнең нәтиҗәсе уңай. Укучыларны белемле һәм тәрбияле итеп күрергә теләү барлык ата-аналарның һәм укытучыларның да теләге. Шуңа күрә бу эштә бар кешегә дә сабырлык һәм тырышлык теләп калабыз.  

Укучылар өчен “Сарман гимназиясе”ндә төрле чаралар, очрашулар еш булып тора. Кичә, ягъни 14 нче сентябрь көнне, башлангыч сыйныф укучылары өчен мәдәният йортында күңелле тамаша күрсәтелде. Минзәлә дәүләт театры артистлары алар өчен “Как стать богарытем» (рус телендә) дигән спектакль  белән чыгыш ясадылар. Тамаша ахырына укучылар белемнең кирәклеге, тәртипле һәм тәрбияле булуның никадәр әһәмиятле сыйфатлар икәненә тагы бер тапкыр инандылар.