Бүген мәктәбебездә, Варислар туган көне уңаеннан, тантаналы сбор үткәрелде.

8 нче сыйныф укучылары тантаналы линейкадан соң, табигатькә  экскурсиягә чыктылар.

Бүген мәктәбебездә Белем бәйрәме гөрләп үтте. Бәйрәмгә барлык укучылар, аларның әти-әниләре, районнан һәм күмәк хуҗалыклардан кунаклар килгән иде. Шулар арасында беренче сыйныфка килгән 9 укучы да бар. Бәйрәмне мәктәп директоры  Фазылов Р.М. ачып җибәрде. Аннары районнан килгән кунаклар Шафикова Г.И.,  авыл җирлеге җитәкчесе Вафина Н.С. чыгыш ясады. Мусин Р.Г. һәм Таштиева Н.Ә.  җәйге чорда күмәк хуҗалыкларга ярдәм иткән балаларга рәхмәт әйтеп, аларны бүләкләп киттеләр.  Укучыларыбыз тарафыннан әзерләнгән концерт карадык. Беренче классларга юлда имин йөрсеннәр өчен яктылык кайтаргычлар  һәм күп төрле бүләкләр бүләк ителде.

18 көн дәвам иткән ял төгәлләнде. Күңелдә матур истәлекләр, онытылмас мизгелләр, хәтирәләр калды. Безнең белән эшләгән абый, апаларыбызга, пешекчеләргә, бушлай бассейн, боз сараена бару мөмкинлеге тудырган район җитәкчеләренә зур рәхмәтебезне белдерәбез!

Бүген - Бөек Ватан сугышы башланган көн. Моннан нәкъ 70 ел элек җәйнең шушы матур көне кайгы-хәсрәт көненә әйләнгән. Әтиләр, абыйлар, япь-яшь егетләр Ватанны сакларга киткәннәр. Без бүген җиребез иминлеге өчен көрәшкән каһаманнарны искә алдык, обелискка чәчәкләр, веноклар куйдык. Чәчәкләр ясарга өйрәткән вожатый Гүзәл Рәшитовнага, безнең белән әңгәмә үткәргән Гөлнара Җәүдәтовнага зур рәхмәт!

Хәрби-патриотик тәрбия бирү атналыгы дәвам итә. Бүген без "Нарат" боз сараенда булдык, аннан соң ОВС укытучысы Нурмиев Мәсгуть Нурисламович безнең өчен кораллар, аларның төзелеше, тарихы турында сөйләде, презентация күрсәтте. Укытучыбызга зур рәхмәт!

Мәктәп яны тәҗрибә бакчасында, чәчәклекләрдә кызу эш гөрли. Соңгы вакытта явып үткән яңгырлар барысына да килешкән, чүпне утап кына өлгер! Ләкин безнең укучыларыбыз эштән курыкмый. Хәзерге вакытта 2, 7, 9 нчы сыйныфлар җәйге практика үтә. Мәктәптә алган күнекмәләр өйгә кайткач та ярап куяр, кыш көне үзебез ашарга яшелчә, җиләк-җимештән мул уңыш алырбыз дип өметләнәбез.

Без бүген мәктәп каршындагы асфальтка рәхәтләнеп рәсем төшердек. Без ясаган күгәрченнәр, кояш, чәчәкләр җиребезгә иминлек, тынычлык теләп торсын! Аннары пионербол ярышы булды.