Нәниләребезне тирә-юнь белән таныштырып, кызыксынучанлыкларын арттыру, ана теленә мәхәббәт тәрбияләү эшен дәвам итеп, бүген иң кечкенәләр төркеме балалары бердәм эшчәнлектә курчак театры "Шалкан" әкиятен карадылар. Тәрбиячеләре Шагиева Ләйлә Раилевна.

Бакчабыз ачылганнан бирле, биредә балалар белән логопед - Эльвира Раисовна эшли. Бу эшчәнлек өчен махсус бүлмә һәм шартлар, җиһазлар булдырылган. Эльвира Раисовна 4-6 яшьлек балалар белән шөгыльләнә,  әти-әниләр белән дә даими консультацияләр үткәрә. Баланы дөрес итеп сөйләшергә, авазларны кимчелексез әйтергә өйрәтү, аның сүз байлыгын үстерү, сөйләмдә булган җитешсезлекләрне вакытында төзәтү – ата-ананың да, мөгаллимнәрнең дә мөһим бурычы. Чөнки сөйләм теленең дөрес формалашмавы бала өчен күп кыенлыклар тудыра. Телдәге кимчелек баланың акыл үсешен тоткарлый, сабый үз фикерен ачык һәм аңлаешлы итеп башкаларга җиткерә алмый. Мәктәп яшендә исә кыенлыклар арта гына: уку-язу күнекмәләре авырлык белән үзләштерелә, дуслары арасында үзен ким итеп тоя башлый һ.б. Әлеге кимчелекләр үзеннән-үзе юкка чыкмый, аларны киметү яки бетерү өчен махсус белгечләрнең – укытучы-логопедларның ярдәме кирәк.Тәҗрибәләр күрсәткәнчә, әгәр әти-әниләр вакытында сизеп алып, баланы белгеч янына алып килсәләр һәм максатчан эшләсәләр, кимчелекләрнең күпчелеген бетереп һәм төзәтеп була. Билгеле, бу эш вакыт һәм түземлек сорый. Логопедның турыдан-туры максаты – сөйләм телендә булган кимчелекләрне төзәтү, барлык авазларның да дөрес әйтелешенә ирешү, сүз байлыгын арттыру, грамматик категорияләрне дөрес кулланып, бәйләнешле сөйләм үстерү, укудагы һәм язудагы кимчелекләрне булдырмау яки коррекцияләү. Ләкин бер генә логопед та үз эшендә болар белән генә чикләнә алмый: ул комплекслы эш алып бара. Тел, сөйләм формалаштыру белән беррәттән, баланың хәтер күнекмәләрен, игътибарын, фикерләү һәм иҗади сәләтен, моторикасын үстерү өстендә даими эшли. Моннан тыш, логопед төзәтүгә авыр бирелә торган тотлыгу һәм дизартрия кебек диагнозлы балаларга артикуляция органнарына махсус массаж да ясый.

"Бездә кышлаучы кошлар" темасы астында үтүче  атна дәвамында балалар бик тырышып кышлаучы кошлар турында төрлечә өйрәнәләр.  Әвәләүдә, рәсемдә, һәм башка бердәм эшчәнлекләрдә, режим вакытларында кошларга карата шигырләр өйрәнәләр, проектор ярдәмендә  һәм саф һавага чыккач кошларны күзәтәләр, бер-берсеннән аермалы якларын табарга тырышалар.

Песнәк (Д. Гарифуллин)

Песнәк шакый тәрәзәдән,

Әйтер сүзе бар сыман.

Тышка чыксам, минем белән

Бергәләп уйнар сыман.  

4 нче ноябрь көнне тәрбиячеләр  "ФДБС ның өлкәләрен интегралләштерү һәм аны тормышка ашыру" темасы астында үтүче педагогик киңәшмәгә җыелды. Федераль таләпләр буенча, балалар бакчасында тәрбиячеләр, иң беренче, баланы ШӘХЕС итеп тәрбияләргә, аның индивидуаль үзенчәлекләрен искә алырга, кызыксынучанлык, хисси, иҗади фикерләү дәрәҗәсен үстерергә, акыл хезмәте өчен кирәкле шартлар, мохит тудырырга, аңа күнекмәләр бирергә, эшкә өйрәтергә тиеш. Аннан соң гына балаларга белем бирү өстендә эшләргә дигән аңлатмалар тора. Шушы таләпләрне тормышка ашыру өчен бала иң элек үз фикерен булдырырга һәм аны курыкмыйча дөрес, аңлаешлы сөйләм белән әйтеп бирә белергә тиеш. Балаларны кечкенәдән үк үз туган телендә сөйләшергә, аралашырга өйрәтү-бүгенге көннең иң мөһим бурычы. Шуларны истә тотып, киңәшмәдә өлкән тәрбияче һәм тәрбиячеләр Низамиева Рәзилә Вазиховна, Шигиева Ләйлә Раилевна, Гиззатуллина Айсинә Айратовна ФДБС таләпләре һәм аны тормышка ашыру турында чыгышлар ясадылар. Соңыннан, бакча мөдире Флюзия Рафаиловна педагоглар алдында куелган бурычларны тагын бер кат ассызыклап үтте. Киңәшмәдә шулай ук, тәрбиячеләр яңа ел каршылауга юнәлдерелгән эшләр, чаралар турында фикер алыштылар.

30 ноябрь - 4 декабрь көннәрендә, еллык планга нигезләнеп, зурлар төркемендә тематик күзәтү оештырылды. Атна дәвамында төркемдә бердәм эшчәнлекләр, режим вакытлары күзәтелде. 

Балалар бик теләп урамга, саф һавага чыгалар. Кар әвәлиләр, төрле хәрәкәтле уеннар уйнап  чыныгалар. Максат: кышкы табигать турында күзаллауларын киңәйтү, сөйләмдә сыйфатларны дөрес кулланып тулы җөмлә белән җавап бирү, әвәләү ысулы ярдәмендә ярдәмчел булу. 

“Кыш килде”

Урманнарга, бакчаларга,

Урман, кырлар өстенә

Ак мамыктай күбәләк кар

Төшә дә, төшә генә.

Урамга чыктык шаулашып,

Йортлардан чана тартып;

Уйныйбыз учта йомарлап,

Юеш кар тубы атып.

Галимҗан Латыйп 

Фотода беренче кечкенәләр төркеме саф һавада. Тәрбиячеләре Хуснуллина Миләүшә Адгамовна

Бүген, уртанчылар-зурлар төркеме тәрбиячесе Айгөл Гыйлфановна балалар белән,  кар бөртекләре турында күзаллауларын формалаштыру, табигать матурлыгына соклана белү хисләре тәрбияләү, балаларның конструкцияләү буенча эшчәнлекләрен үстерү, иң гади билгеләр-символлар кулланып, кар бөртегенең үзлекләрен әйтергә өйрәтү максатыннан,  төп белем бирү өлкәсе -танып белүдә күләмле генә иҗади эш башкардылар. Балалар карточкалар (символлар), кар яву күренеше сурәтләнгән иллюстрация карап,  кар шыгырдавын аудио язмада тыңлап; кар бөртеге, канатлары, ак, зәңгәр, йомшак, салкын, эри, шыгырдый   кебек сүзлек  өстендә эш алып барганнан соң кар бөртеген ясадылар. Рәсемдә күренгәнчә, балаларның иҗаты бик матур һәм күләмле чыкты. Әфәрин сезгә балалар!

Кыш җитте, бар дөньяны ап-ак итеп карлар яуды, кармы кар без өлкәннәр шулай дип кенә карыйбыз, ә менә яңа гына аякка басып дөньяга чыккан сабыйлар алай дип кенә карый белмиләр. Алар өчен бу ак дөнья яңа бер ачыш һәм яңалык булып тоела. Балаларны өйрәтү өлкәсендә яңа төр методлар кулланып эшләү мәктәпкәчә яшьтәге баланың дөнья белән кызыксынуын , хисләнүчән сизгерлеген арттыра,бигрәк тә бу төр эшчәнлек балаларның шәхесен ,иҗади мөмкинлекләрен һәм танып-белүен үстерүгә юнәлтелгән.

Бүген, безнең зуралар төркеме балалары  "кар бабайлар парады" оештырдылар.Тәрбиячеләре Низамиева Рәзилә Вазиховна.