"Ал җилкән" лагерендә ял итүче балалар бүген "Табигый материаллар белән эш" дигән мастер-класста катнаштылар, соңыннан һәр отряд үзе ясаган кул эшеннән "Үзебез тудырган могҗиза" исеме астында күргәзмә оештырды. Физика укытучысы Назмутдинов А.Р. үткәргән "Физикада кунакта" кызыклы тәҗрибәләр дәресе аларга аеруча ошады.

Лагерьдә ял итүчеләр иртәнге аштан соң "Кызыл китап ни сөйли?" дигән тәрбия минутында туган ягыбызда сирәк очрый торган үләннәр белән таныштылар. Аннары  дару үләннәре җыярга бардылар. Көннең икенче яртысында  "Сугыш урлаган балачак" темасы астында тыл ветераннары белән очрашу узды.

Бүген укучыларыбыз иртәнге аштан соң КСК "Сабантуй" га һәм "Нарат" боз сараена экскурсиягә бардылар.

Тәмле итеп иртәнге ашны ашаганнан соң укучылар юл йөрү кагыйдәләренә багышланган "Тылсымлы патшалык"ка сәяхәт иттеләр."Китап сөючеләр" бәйгесендә татар һәм рус әдәбияты дәресләрендә алган белемнәрен искә төшерделәр. "Дуслык"  лагерена йөрүчеләр өчен исә бакчада эшләгәннән соң,  волейбол ярышы үткәрелде.

"Ал җилкән" лагеренда ял итүчеләр иртәнге аштан соң район мәдәният йортына Т. Миңнуллин әсәре буенча куелган "Әйт әле, Күбәләк" спектаклен карарга  бардылар. Спектакльдән соң спорт мәйданында уйнап, ял итеп кайттылар. Хезмәт һәм ял лагерена йөрүчеләр мәктәп яны тәҗрибә участогында эшләгәннән соң "Хезмәт һәм ялның файдасы" темасына фикер алыштылар, стадионда хәрәкәтле уеннар уйнадылар.

Бүген балалар иртәнге аштан соң "Тәмәкенең зыяны" дигән темага тәрбия сәгатенә җыелдылар. Алар төрле сорауларга җавап бирделәр, "Сәламәтлек- зур байлык" дигән плакатлар ясадылар. "Кызыл Китап ни сөйли?" дигән чарадан соң балалар дару үләннәре җыярга киттеләр һәм үги ана яфрагы, ромашка чәчәге, бака яфрагы кебек дару үләннәре җыеп кайттылар.  

Көнебез иртәнге зарядкадан башланды. Иртәнге аштан соң укучылар сәламәтлеккә багышланган реклама, листовкалар иҗат иттеләр. Теннис, шахмат, шашки ярышларыннан соң, Россия көненә багышланган тәрбия минуты узды. Төшке аштан соң балалар саф һавада хәрәкәтле уеннар уйнадылар, футбол ярышы булды.

Бүген бездә кунакта Югары Шытсу авылы китапханәчесе Загидуллина В.М. булды. Ул укучылар белән "Туган ягымның күренекле кешеләре"  һәм "Могҗизалы китап" темаларына чара үткәрде. "Күңелле стартлар"дан соң, "Мин Байлар Сабасыннан" дигән информацион сәгать узды.

Иртәнге аштан соң "Ал җилкән" лагеренда тәрбияләнүчеләр күл буена сәяхәткә киттеләр. 2016 ел - ТР сулыкларны саклау елы уңаеннан, "Су - табигать байлыгы" темасына тәрбия минуты үткәч, балыкчылар ярышы башланды.Күл буенда ял итеп, уеннар уйнап кайтканнан соң, "Онытылмас җырлар" исеме астында пионер җырлары өйрәнделәр. "Дуслык" ял һәм хезмәт лагере укучылары белән "Минем дустым - Компьютер"темасына әңгәмә  һәм пионербол ярышы узды.

Иртәнге аштан соң балалар "Туган ягым -Татарстан" темасына брейн-рингка җыйналдылар. Татарстанның күренекле шәхесләре, табигате, халык авыз иҗаты буенча белемнәре сыналды. Төшке аштан соң "Тынычлык тели җирдә балалар " дип исемләнгән концерт булды,"Кем җитезрәк, кем тизрәк?" дигән спорт уеннары үтте. Мәктәп яны бакчасындагы эштән соң "Дуслык" лагере балалары  тәрбия минутында суицид турында сөйләштеләр.