Мәктәбебезнең "Алтын куллар" түгәрәгенә йөрүче 3б сыйныф укучылары Вахитова Алия, Закарова Нәргизә, Шәйхетдинова Азалия (түгәрәк җитәкчесе Закарова Г.Р.) "Без бергә" республика конкурсының муниципаль этабында коллектив эш белән катнашып, үз төркемнәрендә 1нче урын яуладылар. Без аларны чын күңелдән котлыйбыз, алга таба да зур уңышлар телибез. 

Татар халкында шундый мәкаль бар: язгы бозга ястык калынлыгы булса да, ышанма. Шунлыктан, укучылар белән бозлыкларда үз-үзеңне тоту кагыйдәләре һәм боз астына китүчене коткару буенча сыйныфларда татар һәм рус телләрендә видеороликлар карау оештырылды.  

Бүген мәктәбебездә "Тату сыйныф серләре" дип аталучы республикакүләм бәйгенең мәктәп туры үтте. 5-9нчы  сыйныфларның әти-әниләр комитеты дүрт турда көч сынашты. Жюри нәтиҗә ясаганнан соң, иң күп балл җыеп, Тимершыкта узачак зона этабында 5нче сыйныфның әти-әниләр комитеты катнашачагы билгеле булды. Бәйге үтте, ә күңелдә якты хатирәләр сакланып калды. Без чын күңелебездән шушы бәйгедә катнашкан әти-әниләргә, аларны әзерләгән сыйныф җитәкчеләренә, бәйге барышында концерт номерлары белән чыгыш ясаган укучыларыбызга, гомумән, кемнең шушы бәйгене үткәрүгә көче, ярдәме кергән- һәммәсенә олы рәхмәтебезне җиткерәбез. 

Мәктәптә хәрби-патриотик тәрбия бирү айлыгы кысаларында "Аҗаган" уены үткәрелде. Ике команда укучылары маршрутлар буенча йөреп, флаг эзләделәр. Яшерелгән флагны "Кызыллар" командасы укучылары тапты.

Һәр сыйныфтан иң күп "5"ле алучы укучылар барланып, атналык йомгаклау линейкасында тәбрикләнделәр.

Бүген мәктәбебездә стройда җыр белән атлап йөрү бәйгесе үткәрелде. Бәйгедә ике команда укучылары да актив катнашты. Бәйге барышында һәр сыйныфның стройда атлап йөрешенә, киемнәренә һәм командаларны төгәл үтәүләренә игътибар ителде. 

Мәктәбебездә укучы кызлар бүген барлык ир-ат укытучыларны, укучы малайлар һәм егетләрне,  хезмәткәрләрне Ватанны саклаучылар көне уңаеннан котлап, концерт номерлары бүләк иттеләр.

Бүген 10нчы сыйныф укучысы Гыйльманова Чулпан (җитәкчесе Хадиева Г.Ә.) КФУ үткәргән "Төрки лингвокультурология: проблемалар һәм перспективалар" дип исемләнгән халыкара фәнни-гамәли конференциядә катнашып, дипломга ия булды. Без аларны чын күңелебездән котлыйбыз һәм алга таба да уңышлар теләп калабыз.

11нче сыйныф укучысы Юсупова Ризәлә рус теленнән республика олимпиадасында катнашып, призер булды. Ризәләне чын күңелебездән котлыйбыз, киләчәктә дә уңышлар теләп калабыз. 

Мәктәп балалар Думасының белем бирү комитеты членнары укучыларның дәреслекләренең  тышланганлыгын, чисталыгын тикшерде.