Бүген безнең “Кыңгырау” балалар бакчасында Саба районының балалар бакчаларында эшләүче яшь белгечләр өчен семинар-практикум үтте. Семинар

“Федераль дәүләт белем бирү стандартларын (ФДББС) тормышка ашыруда танып-белү юнәлеше буенча мәктәпкәчә яшьтәге балалар белән эшне оештыру” темасы астында үтте. Яшь белгечләр өчен беренче кечкенәләр төркемендә тәрбияче Хазиева А.Г. “Кышны каршылыйбыз!”, зурлар төркеме балалары белән рус теле тәрбиячесе Мавлявиева Л.А. “Путешествие в космос” темаларына ачык эшчәнлекләр күрсәттеләр. Тәрбияче Габбасова Л.Р. “Сабын күбекләре белән рәсемлибез!” темасына мастер-класс күрсәтте. Якынлашып килүче “Әниләр көне” уңаеннан педагогларыбыз “Заманча Кызыл калфак” спектаклен сәхнәләштереп күрсәттеләр. Мәгариф бүлегенең методисты Сабирова Э.Ф.”Милли төбәк компонентын белем бирү эшчәнлегендә куллану” темасы астында чыгыш ясады һәм   яшь белгечләр белән төп юнәлешләр буенча практик эш уздырды. Педагоглар бик актив катнаштылар. Семинарны йомгаклап Эльвира Фаритовна “Кыңгырау” балалар бакчасының эшчәнлегенә уңай бәя бирде һәм районыбызның яшь белгечләренә үзенең юлламаларын җиткерде.

Режим вакытлары “Кыңгырау “ балалар бакчасының икенче кечкенәләр төркеме балаларында эчтәлекле үтә. Тәрбияче апалары Хайриева Г.Т. белән  алар кызыксынып китаплар укыйлар,укылган әсәр турында фикер алышалар. Матур әдәбият әсәрләре,тәрбияви эчтәлекле әсәрләр белән танышу аша балалар хыялланырга, иҗат итәргә, башкаларның рухи халәтен аңларга өйрәнәләр,әдәп-әхлак кагыйдәләре белән танышалар,тормыш тәҗрибәсе туплыйлар

“Әниләргә бүләк” Буген  зурлар төркемендә (тәрбияче Богавеева Г.Ш.) кисеп-ябыштыру шөгыле Әниләр көненә багышланды. Балалар үз әниләренә йөрәктән чыккан хисләрен белдереп, кечкенә генә бүләк, чәчәк ясадылар. Шөгыльдә әниләр турында мәкальләр, шигырьләр, җырлар тыңланды. Балаларда бу шөгыль аркылы әниләренә карата мәхәббәт тәрбияләнде.

Бу атна бакчабызда “Әнием кадерлем” темасы астында үтә. Әни – дөньядагы иң газиз, иң изге, иң кадерле кеше.

Мәктәпкә әзерлек төркеме балалары (тәрбияче Шамсутдинова Л.М) шул темага багышланган интегральләштерелгән(ана теле- кисеп ябыштыру)  шөгыль күрсәттеләр. Кар бөртекләре арасыннан авазларны эзләп табып ӘНИ сүзен төзеп тактага ябыштырдылар. “Әнием-алтыным” уенында әниләргә карата матур сүзләр әйтеп, ромашка чәчәгенең таҗын җыйдылар.Өйдә әниләренең портретларын ясарга кушылган иде, шул рәсемнәрдән “Безнең әниләр” дигән күргәзмә әзерләдек, һәр бала бик теләп үзенең әнисе турында сөйләде. Әниләргә бүләк итү өчен, мамык дискасыннан, пластилиннан, фетр тукымасыннан ромашка чәчәге ясап ябыштырдык.Шөгыльне “Кояш гомере” җырын җырлап тәмамладык. Әниләре турында сөйләшү балаларга бик ошады.

Бүген безнең"Кыңгырау" балалар бакчасында зурлар төркеме балалары  ДАИ хезмәткәре Закиров Динар Рамилевич белән очраштылар. Балалар юл йөрү кагыйдәләре буенчы “Москвичок маҗаралары” исемле әдәби кичә күрсәттеләр. Динар Рамилевич алар белән әңгәмә үткәрде һәм мультфильм күрсәтте.

Бу атнада зурлар төркеме балалары математика белем бирү эшчәнлегендә 8,9 санының барлыкка килүе белән таныштылар, 9-га кадәр санарга өйрәнделәр һәм геометрик фигураларны кабатладылар. Бу эшчәнлектэ тәрбиячеләре Хамидуллина Р.Р. га ярдәмгә тылсымлы туп килде.  "Сигез куян" шигыре дә, ял моменты да белемнәрне ныгытырга булышты.

Мәктәпкә әзерлек төркеме (тәрбияче Шамсутдинова Л.М) балалары математика шөгылен игътибар белән тыңлап, бирелгән биремнәрне җиренә җиткереп эшләргә тырышалар.

Бүгенге шөгыль дә уен рәвешендә үтте. Беренче биремдә балалар крокодилга ничә төрле ризык ашаганын санарга булыштылар. Бу биремдә ике кечкенә саннан 10 санын китереп чыгару, тәртип буенча санау ныгытылды. Алдагы биремдә геометрик фигураларны, санау таякчыклары белән эшләүне искә төшерү максатыннан “Конструктор” дип аталган дидактик уен оештырылды. Тәрбияче укыган шигырьләрне тыңлап, балалар геометрик фигуралардан, санау таякчыларыннан төрле предметлар (өй, чыршы, машина, велосипед) ясадылар. Шөгыль ахырында “Кызыклы кагыйдә” дигән уен-күнегү үтте. Монда тәрбияче белән берлектә адымнар санап, төркемнең озынлыгы, киңлеге үлчәнелде.

Шөгыль барышының төрлелеге балаларга бик ошады.

"Кыңгырау" балалар бакчасының зурлар төркеме балалары режим моментларын файдалы һәм кызыклы үткәрәләр. Саф һавада кышкы уеннар уйныйлар, табигатьнең матурлыгына сокланалар һәм кар белән уйнауларына шатланалар. Аларның тизрәк кардан тау өеп, шуннан шуасылары килә. 

Ябалак кар, яу-яу!

Без ясыйбыз кардан тау.

Ак мамыктай тузгып яу!

Бик дәү булсын безнең тау!

Бакчабызда “Минем гаиләм, өем, йорт җиһазлары” атналыгы  узды. Атналык кысаларында  мәктәпкә әзерлек төркеме балалары тәрбиячеләре Шамсутдинова Лениза Мисбаховна һәм Якупова Галия Гаптелфартовна белән берлектә “Гаилә агачы” “үстерделәр”.