7 март көнне Кече Шыңар авыл мәдәният йортында   мәктәбебез  укучылары һәм укытучылары, Олы Шыңар авыл җирлеге һәм мәдәният хезмәткәрләре катнашында Бөек Җиңүнең 70 еллыгы уңаеннан тыл ветераннарына медальләр тапшыру тантанасы булды. Тыл ветераннарына медальләрне Олы Шыңар авыл җирлеге башлыгы Рөстәм Фидаилевич Заһидуллин һәм “Туган як” күмәк хуҗалыгы җитәкчесе Мөхәммәтов Илфат Шәкурович тантаналы шартларда тапшырганнан соң, сүзне үзешчән сәнгать коллективлары алды. Кичә түгәрәк өстәл артында дәвам итте. Ветераннар хатирәләре белән уртаклаштылар, олы рәхмәтләрен җиткерделәр.

Бүген мәктәбебездә "Әлифба" бәйрәме үткәрелде. Беренче сыйныф укучылары үзләренең белемнәрен күрсәттеләр,табышмаклар чиштеләр.Шулай ук матур шигырьләре, җырлары белән сөендерделәр. Аларга кунакка әти-әниләр һәм  5нче сыйныф укучылары  да килгән иде. Соңыннан мәктәп директоры А.М.Юмагулов укучыларга үзенең матур теләкләрен җиткерде, бүләкләр тапшырды. 

Бүген район балалар иҗат йортында "Иң шәп әйдәман"  республика конкурсының район туры узды. Конкурста катнашучылар үз эшчәнлекләренә презентация ясадылар, үзләре иҗат  шефлык иткән отряд укучылары белән берлектә мероприятие уздырдылар,ситуацияләр чиштеләр.

Конкурста безнең 10 сыйныф укучысы Илсинә Мөхәммәтова "Иң ярдәмчел отряд әйдәманы" номинациясендә җиңү яулады.Котлыйбыз, Илсинә!

23 февраль - Ватанны саклаучылар көне уңаеннан сыйныфларда төрле чаралар узды.  Мөхетдинова А.Р. 5 сыйныфта  "Солдат белән очрашу" оештырды. Әле күптән түгел генә армия сафларыннан кайткан Набиуллин Ниязның укучыларга сөйләр сүзе күп иде. Укучыларны кызыксындырган сорауларга да ул бик теләп җавап бирде. Чараны Алия Рафаэлевна мавыктыргыч итеп оештырган. Әлеге очрашу барыбызга да ошады.

Бүген мәктәптә "Казан утлары" редакциясе хезмәткәрләре белән очрашу булды. Чарада язучы Камил Кәримов, шагыйрә Гөлзада Бәйрәмова һәм яшь талантлы шагыйрь Фәнил Гыйләҗев катнашты. Очрашуда олы тарихы булган журнал белән таныштыру, шигырьләр уку, җанлы аралашу булды. Укучылар бу чарадан журнал турында күп мәгълүмат һәм рухи азык алдылар.  

Бүген мәктәптә "Ватанны саклаучылар" көненә багышланган "Аҗаган" хәрби-патриотик уены узды. Әлеге чарада 9-11 сыйныф укучылары катнашты. Укучылар мылтыктан ату, автомат сүтеп җыю, турникта тартылу (егетләр), гәүдә күтәрү (кызлар), вакытка ОЗК кию һ.б. ярышларда катнаштылар. Һәр сыйныф үзенең нык әзерлекле булуын күрсәтте. 

Бүген  6 сыйныф укучылары белән "Бу без!" темасына отряд җыены узды. Җыенда варислар уеннар ярдәмендә үзләре һәм иптәшләре турында күбрәк белделәр, үз отрядларының  "Таң" балалар оешмасындагы эшчәнлегенә бәя бирделәр, яңа уеннар өйрәнделәр. "Кыңгырау" отрядында җыен бик җанлы узды. Бер варис та читтә калмады. Педагог-оештыручы аларны бердәм, актив катнашулары өчен мактады. Җыен, гадәттәгечә, "Очкын җибәрү" белән тәмамланды. 

15 нче февраль - халкыбызның патриот шагыйре Муса Җәлилнең туган көне. Бу истәлекле дата мәктәбебездә һәр елны оешкан төстә билгеләп үтелә. Быел да бу уңайдан

   "Бөек шагыйрь Муса Җәлил халкым улы,

    Ил күгендә балкып калды гомерең юлы"

 дип исемләнгән радиотапшыру әзерләнде. Шагыйрьнең тормыш юлы һәм иҗатына багышланган күргәзмәләр оештырылды, сыйныфларда 

  "Җәлилләр, Алишлар ялкыны

   Мәңгелек ут булып балкыды"

темасына тәрбия сәгатьләре уздырылды.

Бүген мәктәбебездә, хәрби-патриотик тәрбия һәм физкультура-спорт айлыгы кысаларында, 5-8 сыйныф укучылары арасында "Баскетбол ярышлары булып үтте. Әлеге ярышка укучылар ныклап әзерләнгәннәр иде. Гомуми нәтиҗәләр түбәндәгечә:

1 урын- 8 сыйныф

2 урын 7 сыйныф

3 урын 6 сыйныф

Җиңүчеләрне уңышлары белән котлыйбыз! Молодцы!

Мәктәбебез Әфган сугышында һәлак булган якташыбыз Чулпыч авылы егете Илфат Зиннәтуллинны онытмый. Бүген укучыларыбыз, тәрбия эшләре буенча директор урынбасары Р.Г.Мөбарәков һәм ОБЖ укытучысы Ф.Ә.Галимов җитәкчелегендә, аның каберенә венок куйдылар. Чарада ветеран әфганчылар комитеты рәисе И.З.Әхмәтшин, Татарстан Республикасы Хәрби комиссариатының Саба һәм Теләче районнары бүлеге начальнигы Ф.Ф.Закиров, ветеран әфганчы Р.М.Ягъфәров катнашты.