Яңа балалар бакчасы төзелеше бетү алдында тора. Шулай да, җыю-җыештыру эшләре шактый әле.

Казан шәһәрендәге “Тартария“ лагеры – Россиянең төрле төбәкләреннән җыелган 14-16 яшьлек балаларны берләштерүче җәйге смена. 30июнь-19 август аралыгында бу лагерьда мәктәбебезнең 5 сыйныф укучысы Садриев Гадел ял итә.

Мәктәп яны укыту-тәҗрибә участогында үстерелгән продукция мәктәп ашханәсендә туклану өчен тотыла. Бу инде укучылар ел дәвамында ашламасыз үстерелгән, чиста, витаминлы ризык белән тукланачак дигән сүз. Буген пешекче апалар кышкы табынга куяр өчен кыярлар тозладылар.

Кошман мәктәбе укучылары буген Олы Урсак авылына бәйрәмгә бардылар.Биредә республика программасы буенча төзелгән спорт мәйданчыгы ачылды.   Кошман һәм Олы Урсак укучылары футбол уйнады. Уен, урсаклылар файдасына, 3:0 исәбе белән төгәлләнде.

Мәктәп һәм балалар бакчасы эшләсә, авыл яши, диләр. Авылыбыз  киләчәге өметле. Районның тугызъеллык мәктәпләрендәге укучылар санын чагыштырсак, иң күп укучылар биредә. Монда 70 бала белем ала. Авылның «Тиенкәй» балалар бакчасына да сабыйлар күп йөри. Урын җитмәү сәбәпле, әби-бабайлары белән өйдә утыручылары да, район үзәгендәге балалар бакчасына йөрүчеләре дә шактый. Әлеге проблеманың мөһимлеген күз уңында тотып, Кошманда яңа балалар бакчасы төзелеше башланды. Район башкарма комитеты җитәкчесе Алексей Макаров әйтүенчә, балалар бакчасы “Мәгариф үсеше” федераль программасы ярдәмендә төзелә. Моның өчен акчаның бер өлеше Татарстан Республикасы, икенче өлеше федераль бюджеттан бүлеп бирелгән. 50 урынга исәпләнгән яңа балалар бакчасы мәктәп территориясендә булачак. Мәктәп коллективы да бу төзелешкә үзләренең өлешләрен кертәләр.

Татарстан Республикасының Экология һәм табигый байлыклар министрлыгы тарафыннан оештырылган “Чиста яр буе“ акциясе дәвам итә. Акция кысаларында сулыкларны, елга-күл буйларын чистарту, тәртипкә китерү күз уңында тотыла.  Ул июнь аенда башланып киткән иде.  Мәктәбебез укучылары һәм укытучылары бу акциядә актив катнаштылар. Сулар һавабызның сафлыгы, эчәр суларыбызның чисталыгы үзебездән тора. Әйләнә-тирәбезне чиста тотыйк, елга-күлләргә сакчыл караш белән карыйк! Өмәләргә бердәм чыгыйк!

Республикадагы районнарга илебездәге, чит илләрдәге татарлар күп яши торган төбәкләрдә Сабантуй үткәрү өчен аерым төбәкләр беркетелгән. Бу гамәл Татарстан Президенты аппаратының төбәкләр белән эшләү идарәсе белән килештереп тормышка ашырыла. Кайбычлылар өч ел рәттән Мордовиянең Ләмбрә районы үткәргән Сабантуйда катнашса, быел Аксюн авылының 350 еллык юбилеен бәйрәм итәргә бардылар. Безнең район бу бәйрәмдә Татарстанның йөзен күрсәтте.