10 нче гыйнвар көнне "Башлангыч сыйныфлар айлыгы" кысаларында укучылар арасында "Отканга - мәкаль, тапкырга - табышмак" исемле табышмаклар кичәсе үткәрелде. Кичә барышында укучыларның зирәклеге, тапкырлыгы һәм логик фикерләү сәләтләре тикшерелде. Укучылар бик актив катнаштылар һәм сынатмадылар.

Мәктәбебез янындагы боз мәйданчыгы балалар тавышыннан гөрләп тора. Укучылар сәламәтлек сәгатьләре, физкультура дәресләрендә тимераякта шуалар. Шулай ук хоккей уеннары да уздырыла.

8 нче гыйнвар көнне мәктәбебездә "Башлангыч сыйныфлар айлыгы" башланып китте. Укучылар айлык дәвамында үткәреләчәк чаралар белән таныштылар. 

9 нчы гыйнвар көнне башлангыч сыйныф укучылары кабат Кыш бабай һәм Кар кызы янында кунакта булдылар. Чыршы янында төрле уеннар уйнап, җыр җырлап күңел ачтылар.

Мәктәбебездә изгелек акциясе ел буе дәвам итә. Укучыларыбыз үзләре билгеләнгән өлкәннәргә йөриләр. Алар кар түгәләр, себерәләр, сулар китерәләр. Ә менә 5нче сыйныф укучылары һәйкәл янын кардан чистарталар.

5 нче январь көнне ООО “Татарстан” призына уздырылган шахмат ярышында каташып, Корбанов Ильяс 4 нче урынга ия булды. Алга таба да уңышлар юлдаш булсын!

“Могҗиза” лагерының санаулы гына көннәре калып бара. 9-11 класс укучылары химия, биология, информатика, җәмгыять, география, татар теле, физика фәннәреннән белемнәрен кабатлый, ныгыта. Яңа елны матур нәтиҗәләр белән башлап җибәрергә насыйп булсын.

Хөрмәтле коллегалар!
Кадерле бер кунак көткән кебек
Яңа елны көтә йөрәкләр.
Беләкләрдә яңа хезмәт дәрте,
Күңелләрдә яңа теләкләр.
Өмет тулы матур күзләр
тулган айда балкый бу кичтә.
Әмма “Хуш, иске ел” дигән сүзләр
Җанга якын түгелдер һич тә.
Әкрен генә йомшак карлар ява,
Күңелләргә сафлык , моң салып.
Яңа елда саулык , бәхет килсен
Кышкы бураннарга уралып.
Күңелләрдә шатлык ташып торсын
Сагышларга урын калмасын,
Алда туар көннәр якты булсын,
Ходай кайгылардан сакласын.

Иң изге теләкләр белән Бөрбаш урта мәктәбе коллективы

Санаулы көн тиз уза бит ул. Менә кышкы лагерыбызның да яртысыннан артыгы үтеп тә китте.

Менә кышкы каникуллар да килеп җитте. Каникуллар белән бергә 9-11 нче класс укучылары өчен имтиханнарга әзерлек максатында кышкы лагерь да башланып китте. “Могҗиза” лагеры укучыларыбыз өчен чын могҗиза. Консультацияләр арасында волейбол уеннары уйнарга да, ял итәргә дә вакыт табабыз. Ә повар апаларыбыз безне тәмледән-тәмле ризыклар белән сыйлый. Сынау имтиханнарын да матур күрсәткечләр белән бирергә бөтен шартлар тудырылган. “ Укыйсы, тырышасы, игътибарны арттырасы гына безгә” - ди укучыларыбыз.